KORONAVİRUSA YOLUXANLARIN SAYI - CANLI STATİSTİKA

Azərbaycan Hərbi Dəniz Qüvvələri taktiki təlim keçirir — FOTO

Azərbaycan Hərbi Dəniz Qüvvələri taktiki təlim keçirir
19:45
17.10.2019
4027
Ölkə
A
Azərbaycanın Xəzər dənizindəki ərazi sularında enerji infrastrukturunun mühafizəsi üzrə Hərbi Dəniz Qüvvələrinin (HDQ) taktiki təlimi keçirilir.

Müdafiə Nazirliyinin Mətbuat xidmətindən "Ölkə.Az"a verilən məlumata görə, gəmi taktiki qruplarının qarşılıqlı fəaliyyətdə döyüş əməliyyatlarının planlaşdırılması və aparılması məsələlərinin işlənilməsi üzrə keçirilən təlimin məqsədi gəmi birləşmələri tərkibində birgə fəaliyyətin təşkilidir.

Təlimdə qüvvələrin idarəolunması üzrə komandirlərin və qərargahların bacarıqları təkmilləşdirilir, gəmi birləşmələrinin döyüş tapşırıqlarının yerinə yetirilməsi hazırlıqları yoxlanılır.

ŞƏRH YAZ
0

Vətəndaş 190 manatı ala bilmir, nazirlik İŞ TƏKLİF EDİR — ŞİKAYƏT

Vətəndaş 190 manatı ala bilmir, nazirlik İŞ TƏKLİF EDİR
13:17
Bu gün
105
Ölkə
A
Pandemiya dövründə işsiz qalan insanlara dövlət tərəfindən yardım məqsədi ilə 190 manat sosial yardım təyin edilib. Lakin buna baxmayaraq, bir çox insanlar haqqı olsa da, bu yardımı ala bilməyib. Şikayətçilər bununla bağlı daha çox sosial şəbəkələrdə etirazlarını bildiriblər.

Bu problemlə bağlı  Həsənova Esmira Veysəl qızı da "Ölkə.Az"a müraciət edib. Şikayətçi bildirir ki, adına heç bir mülkiyyətin olmadığı və məşğulluq idarəsində qeydiyyatdan keçdiyi halda 190 manatlıq sosial yardımı ala bilməyib.

“Mən Həsənova Esmira Veysəl qızı 1961-ci ildə Mingəçevir şəhərində anadan olmuşam. Özüm Mingəçevirdə qeydiyyatdayam, ancaq 2005-ci ildən Bakıda Xırdalan şəhərində kirayədə yaşayıram.

Mən heç bir yerdə çalışmıram və adıma da heç bir mülkiyyət yoxdur. Bir müddət əvvəl işsiz kimi qeydiyyatdan keçmişəm. Mənə məşğulluq idarəsindən işsiz kimi qeydiyyata alınmağımla barədə sms gəldi. Sonra mənə ASAN xidmətdən 190 manat birdəfəlik ödəməni ala bilməyim üçün  təsdiq kodu (155232,327698) gəldi. Bir müddət keçdikdən, təxmini 12-13 gündən sonra, mənə bu yardımı ala bilməyəcəyim haqqında 4.1.3  (sahibkarlar, mülkiyyətində kənd təsərrüfatına yararlı torpaq payı olanlar, ailə kəndli təsərrüfatının üzvləri;) maddəsini rəhbər tutaraq, yenidən ASAN xidmətdən imtina kodu gəldi. Ancaq mən yenə də təkrarlayıram, mənim adıma heç bir torpaq sahəsi və ya ev, ümumiyyətlə heç bir mülkiyyət yoxdur. Bununla əlaqədar əvvəl Vergilər Nazirliyinə, sonra Məşğulluq idarəsinə gedib adımda hər hansı bir vergi borcunun və ya mülkiyyətin olub –olmadığını yoxlatdım. Hər iki qurum mənə bir daha təsdiqlədi ki, adımda heç nə yoxdur. Sonra Həsənbəy Zərdabi küçəsində yerləşən Dövlət Sosial Müdafiə Fonduna gedib, şəxsiyyət vəsiqəmlə yenə adımı yoxlatdırdım. Orada da eyni cavab adıma heç bir mülkiyyətin olmadığını aldım. Cavan bir oğlan idi, mənə dedi ki, sizə 190 manat birdəfəlik ödəmə verilməlidir, ola bilsin imtina haqqında sms- də yanlışlıq olub.  Mən heç bir yerdə çalışmıram, təqaüd almıram və adıma da heç bir mülkiyyət yoxdur. Mənə çox maraqlıdır ki, hansı əsasla mənə imtina mesajı gəlib?”

Esmira xanım yoldaşının vəfatından sonra qaynı tərəfindən evdən qovulduğunu, hazırda 2 aydır kirayədə yaşadığı evin pulunu ödəyə bilmədiyini də deyib. Bundan əlavə o, tezliklə ev üçün ödəmə etmədiyi təqdirdə oranı tərk etmək məcburiyyətində olduğunu da qeyd edib.

“Yoldaşım rəhmətə getdikdən sonra qaynım Mingəçevirdə olan evimizi də əlimizdən aldı. Ev onun adına olduğu üçün bizi küçəyə atdı. Sonra mən Bakıya köçdüm. Hazırda oğlumla kirayədə yaşayıram. Oğlumdan başqa heç kəsim yoxdur. İndi mənim bu pula ehtiyacım var, iki aydır kirayə pulunu ödəyə bilmirəm. Heç yerdə iş yoxdur, ev sahibi də məndən ödəməni tələb edir. Sonra mənə dedilər ki, nazirliyin özünə müraciət edim. Ora da getdim, mənə ərizə yazdırdılar. Daha sonra məsələni araşdırıb, özləri mənimlə əlaqə saxlayacaqlarını dedilər. Lakin aprel ayından bəri heç bir xəbər yoxdur. Çox çarəsiz vəziyyətdə qalmışam. Bu mənim haqqım olan puldu, buna ehtiyacım var. Ödəməni etməsəm ev yiyəsi bizi evdən çıxaracaq, yenə küçələrdə qalacam. Dəfələrlə maraqlanmaq üçün, nazirliyə getmişəm. Ancaq hər zaman suallarım cavabsız qalıb”,- deyə o, qeyd edib.

Məsələ ilə bağlı Əmək və Əhalinin Sosial Müdafiəsi Nazirliyinə müraciət etdik. Qurumun mətbuat katibi Fazil Talıbov şikayətçinin yenidən ərizə ilə müraciət etdiyi təqdirdə məsələnin araşdırılacağını qeyd etdi.

“Vətəndaş rəsmi ərizə ilə nazirliyə müraciət etsə, şikayəti araşdırılaraq ona tez bir zamanda lazımı cavab verilə bilər”.

Bundan başqa F. Talıbov vətəndaşın məşğulluq idarəsində işsiz kimi qeydiyyatdan keçdiyi üçün onu işlə təmin edə biləcəklərini də bildirib.

“Əgər xanım işsiz kimi qeydiyyatdan keçibsə, onu haqqı ödənilən ictimai işlərə cəlb edə bilərik. Bu işlərdə əmək haqqı minimum 250 manatdır. Bu da 190 manatdan artıq məbləğ edir. Həm də 190 manat müvəqqəti passiv sosial dəstək tədbiridir”, - deyə o, vurğulayıb.

Vüsalə Balayeva

Ölkə.Az

ŞƏRH YAZ
0

Azərbaycan elminə AĞIR İTKİ

Azərbaycan elminə AĞIR İTKİ
13:03
Bu gün
684
Ölkə
A
Geokimya sahəsində tanınmış alim, Azərbaycanın Əməkdar geoloqu, AMEA-nın Geologiya və Geofizika İnstitutunun şöbə müdiri, geologiya-mineralogiya elmləri doktoru Çingiz Kaşkay 79 yaşında vəfat edib.

"Ölkə.Az" xəbər verir ki, bu barədə Azərbaycan Milli Elmlər Akademiyası məlumat yayıb. 

Məlumat üçün bildirək ki, Çingiz Mirəli oğlu Kaşkay 1941-ci il iyulun 31-də Bakıda anadan olub. 1962-ci ildə Azərbaycan Dövlət Universitetinin (indiki BDU) Geoloji-coğrafiya fakültəsini bitirib. 1962-ci ildən Azərbaycan Elmlər Akademiyasının Geologiya İnstitutunda (hazırki AMEA Geologiya və Geofizika İnstitutu) fəaliyyətə başlayıb. 1967-ci ildə “Alunitlərin əmələ gəlməsinin fiziki-kimyəvi şəraiti” mövzusunda namizədlik, 1975-ci ildə isə “Alunit qrupu və onun struktur analoqları” mövzusunda doktorluq dissertasiyalarını müdafiə edib. Alim eksperimental yolla alunitlərin və onların struktur analoqlarının əmələgəlmə şəraitlərini öyrənib, ilk dəfə müxtəlif növ alunit qrupu minerallarını sintez edib, onların termodinamiki parametrlərini təyin edib, fasiləsiz termik analiz üçün yeni üsul və cihazlar işləyib hazırlayıb. O, eksperimental və tətbiqi geokimya sahəsindəki tədqiqatlarında təbii proseslərin modelləşdirilməsinin riyazi üsullarından geniş istifadə edib.

Alim 1978-1991-ci illərdə Geologiya İnstitutunda Filiz yataqlarının geokimyası və mineralogiyası laboratoriyasının və Geokimya şöbəsinin rəhbəri vəzifələrində çalışıb, 1992-2003-cü illərdə Türkiyənin Gəbzə və İstanbul Texniki Universitetlərində fəaliyyət göstərib. 2012-ci ildən Metallogeniya şö­­­­­bə­­­sinin əsasında yaradılmış Filiz və qeyri-filiz faydalı qazıntı yataqlarının geologiyası və geokimyası şöbəsinə rəhbərlik edib.

Azərbaycanda ilk dəfə təməli qoyul­muş ekoloji təhlükəsiz geotexnologiya elm sahəsinin inkişafı və bu elmin tətbiq sahəsi olan filizlərdən nəcib metalları zərərsiz məh­lul­larla bilavasitə yer altında yuyulub çı­xara biləcək üsulların işlənilməsi istiqamə­tində tədqiqatlar Çingiz Kaşkayın rəhbərliyi ilə yerinə yetirilib. Bu istiqamətin inkişafı Nazirlər Kabineti­nin xüsu­si sərəncamı ilə dəstəklənib.

Ç.Kaşkayın elmi rəhbərliyi ilə Azərbaycanda ilk dəfə qızıl və onu müşayiət edən ele­mentlərin filizlərdən çıxarılması üçün ekoloji zərərsiz yeral­tı aşındırma texnologiyası üzrə elmi-tədqiqat işləri apa­­­­­rılıb. Həmçinin kom­püter və eksperimental mo­­­delləşdirmədən isti­fadə edilərək seçilən hər bir yatağın filizlərin­dən qızılı və onu mü­şayiət edən elementləri çıxara biləcək ən optimal texnoloji rejimlər aş­kar edilib. Texnoloji prosesləri bila­vasitə yataq üzərində aparmaq məqsədilə “Mo­bil pilot kompleksi” yaradılması da alimin rəhbərliyi ilə reallaşmış və yerin altında yuyu­cu məhlulların hərəkətini istiqamətləndirən və təmzimləyən yeni texnoloji üsul üzrə pa­tent alınıb.

Alim əməkdaşları ilə birlikdə Prezident yanında Elmin İnkişafı Fondunun “Gәdәbәy filiz sa­hә­sindә zә­rәr­siz xlorit metodu ilә geo­tex­noloji işlәrin apa­rılmasının araşdırıl­ması” mövzu­sun­da qrant layihəsini yerinə yetirib, nəti­cə­də Gədəbəy filiz sahəsində və Azərbay­canın başqa bu tip yataqlarında tətbiq oluna biləcək klassik sianid texnologi­yasından geri qalmayan, hətta bəzi parametr­lərə görə on­dan üstün olan xlorit texnologiyası işlənil­ib. 

O, filizlərdən və filiz tullantılarından sənaye əhəmiyyətli metalların membran texnologiyası əsasında çıxarılması üsullarının işlənilməsi istiqamətində apardığı son tədqiqatlar nəticəsində sənaye əhəmiyyətli elementlərin səmərəli yolla əldə edilməsinə imkan yaradan 2 innovativ təklif irəli sürülmüşür ki, bu innovasiyaların dağ-mədən və kimya texnologiyası sənayesində istifadəsi nəzərdə tutulur.

Geoloq alim 100-dən çox elmi əsərin, o cümlədən 7 monoqrafiyanın, 6-sı ABŞ-da, Kanada, Fransa və İsveçrədə alınmış 23 müəlliflik şəhadətnaməsinin müəllifidir. Onun rəhbərliyi altında 4 elmlər namizədi hazırlanıb.

Allah rəhmət eləsin!

ŞƏRH YAZ
0
BAĞLA