Azərbaycan manatının gələcək taleyi barədə

“Ölkə.Az” xəbər verir ki, ekspertlərin əksəriyyətinin fikrincə, FED nümayəndələri oktyabrda balansı 4,5 trln. dollardan aşağı salacaq.

"Qısamüddətli perspektivdə müvəqqəti faktorlar FED-in bu qərarını ləngidə bilər. Buna baxmayaraq, federal maliyyələşmə dərəcələrinin hədəf aralığının normallaşdırılması dekabrda davam edəcək", - deyə "Bank of the West"in San-Fransiskoda yerləşən ofisinin baş iqtisadçısı Skot Anderson deyib.

İllik müqayisədə avqustda istehlak qiymətləri indeksinin 1,9% artmasından sonra davamlı inflyasiya fonunda FED-in üçüncü dəfə faiz dərəcələrini artırmaması ilə bağlı ehtimallar da zəifləyib. Respondentlərin çox az hissəsi iqtisadi artım və inflyasiyanın əsasən zəifləyəcəyini qənaətindədir. Ümumilikdə, ekspertlər FED-in 2018-ci ildə üç dəfə faiz dərəcələrini artıracağını düşünür. Uçot dərəcələrinin gələn il ilk artımı iyun ayına təsadüf edə bilər.

FED-in bu qərarı Azərbaycan valyutasına necə təsir edəcək. Yerli mütəxəssislərin fikirincə, manatın vəziyyəti FED-in qərarından çox Mərkəzi Bankın aparacağı siyasətdən asılı olacaq. İqtisadçı ekspert Sabit Bağırov “Ölkə.Az”a açıqlamasında bildirib ki, FED uçot dərəcələrini artırmayacaq. Onun sözlərinə görə, bu qərardan asılı olmayaraq, Azərbaycan manatının gələcək taleyi Mərkəzi Bankın necə siyasət aparacağından asılı olacaq.

“Azərbaycan manatının dəyərdən düşməsinə gəlincə, hökumətin kifayət qədər imkanları var ki, valyutamızı sabit saxlasın. Valyuta ehtiyatlarımız buna imkan verir. İndi Mərkəzi Bankın yürüdəcəyi siyasətdən çox şey asılıdır”, - deyə Sabit Bağırov bildirib.

İqtisadçı ekspert Azər Mehtiyev isə “Ölkə.Az”a açıqlamasında bildirib ki, ilin sonuna qədər FED uçot dərəcəsinin artırarsa, dollar bahalaşacaq. Ekspertin fikrincə, bu da manatın məzənnəsinə təsir göstərəcək.

“İndiki dövrdə manatın məzənnəsinə təsir göstərən amil neft gəlirləridir. Hazırda isə neftin qiyməti Azərbaycana sərf edən vəziyyətdədir. Lakin baş verən proseslər indi olmasa da, növbəti illərdə neftin qiymətinin aşağı düşə biləcəyinə səbəb ola bilər”, - deyə Azər Mehtiyev bildirib.

Ziya Səccad
Ölkə.Az