Azərbaycan mənşəli “IT Solutions” şirkəti qlobal bazarda necə işləyir?
Canubi Koreyanın Hyundai Engineering şirkətinin başçılıq etdiyi şirkətlər konsorsiumu bütün işləri planlaşdırılan tarixdən 8 ay əvvəl başa çatdırdı. Layihənin ümumi dəyəri 3,4 milyard dollardan çox, Lukoil şirkətinin Özbəkistan layihələrinə yatırdığı investisiyaların ümumi həcmi isə 7 milyadr dollardan çox təşkil edir. Qeyd etmək lazımdır ki, KQEK Lukoil şirkətinin Özbəkistandakı ən iri investisiya layihəsidir. İstehsal həcmi ildə 8 milyard kubmetr qaz olan bu kompleks hidrogen sulfidli qazı emal edərək təmiz «mavi yanacaq», stabil qaz kondensatı və kükürd ticarət məhsulu əldə edəcək. Obyekt iki texnoloji xətt və qazın ixracatı üçün nəzərdə tutulan magistral boru xətti də daxil olmaqla yükləmə terminallarından ibarətdir. Kandın Qaz Emal Kompleksi şirkətin yanacaq-enerji sahəsindəki ən irimiqyaslı investisiya layihələrindən sayılır. Respublikada fəaliyyət göstərdiyi 15 il ərzində şirkət burada ən irimiqyaslı layihələrdə, o cümlədən, Hauzak, Şadı, Cənub-Qərb Gissar və Kandım yataqları layihələrində iştirak edib. Digər tərəfdən, Daşkənddə Lukoil ofisinin tikinti və təchizat işləri başa çatıb. Buradan şirkət Mərkəzi Asiya regionunda, o cümlədən, Özbəkistandakı «Kandım-Hauzak-Şadı», «Cənub-Qərb Gissar» və «Aral», Qazaxıstandakı bir sıra quru mədən layihələrindəki, habelə Xəzər boru xətti konsorsiumundakı biznes fəaliyyətini idarə edəcək.
Bundan sonra sizdə sual yarana bilər: «Bunların Azərbaycana və İnformasiya texnologiyalarına nə dəxli var?».
- Azərbaycan mənşəli IT Solutions şirkəti «Lukoil Uzbekistan Operating Company» ilə 2008-ci ildən bəri yaxın əməkdaşlıq edir. Hələ 21-ci əsrin ilk onilliyinin sonlarında biz sözügedən struktur üçün bir sıra layihə, o cümlədən, İT infrastrukturasının Lukoil korporativ standartlarına uyğunluğuna dair audit həyata keçirdik. Növbəti iri layihəmiz Hauzak və Adamtaş yataqlarında ultra-qısa dalğa rabitə sisteminin layihələndirməsi oldu. Lukoil rəhbərliyinin Daşkənddə ofis açmaq qərarından sonra isə bizim şirkətimiz binanın intellektual idarəetmə sisteminin montajı layihəsi üzrə, eləcə də, bütün «Lukoil Uzbekistan Operating Company» üçün böyük rabitə qovşağının yaradılması daxil olmaqla, yeni İT avadanlığının layihələndirməsi və təchizatı üzrə keçirilən tenderdə inandırıcı qələbə qazandı», - IT Solutions şirkətinin direktoru Anar Heydərov deyib.
Mütəxəssislərimiz binanın bütün sistemlərini, o cümlədən, istilik, havalandırma, kondisioner, yanğın-mühafizə, binaya giriş-çıxış nəzarəti, su və qaz sızması, video nəzarət, telefon və lokal şəbəkə daxil olmaqla rabitə sistemini, binanın işıqlandırması və elektrik təminatı sistemini; multirum konsepsiyası çərçivəsində audio və video texnika vasitəsilə tək nöqtədən idarə olunması, nəhayət, bütün sistemlərə məsafədən nəzarət sistemini binanın vahid idarəetmə sisteminə inteqrasiya etdilər. Quraşdırılan sistem bina daxilində gedən bütün prosesləri nəzarət altında tutmağa imkan verir. Mərkəzi idarəetmə pultuna obyektdə quraşdırılmış bütün sensorlardan binanın fəaliyyətini dəstəkləyən sistemlərinin, mühəndis avadanlığının vəziyyəti haqqında verilənlər daxil olur, təhlükəli hallar aşkarlanaraq bu barədə xəbərdarlıqlar verilir, hadisələr qeydə alınır, jurnal aparılır və s.
Kandım QEK-nin işə salınması prosesində bilavasitə yaxından iştirakımızla yanaşı biz eləcə də Rusiya Federasiyasının əraziləri xaric olmaqla Lukoil şirkətlər qrupunun qlobal İT sisteminə müqavilə əsasında xidmət göstəririk - Meksika Körfəzindən İraq və Suriyadakı yanacaq yataqlarınadək. Bizim vəzifələrimiz arasında məsafədən dəstək, Lukoil binalarına, o cümlədən, şirkətlər qrupunun Yaxın Şərq regionunda fəaliyyətini tənzimləyən LUKOIL International Services şirkətinin Dubaydakı ofisinə zəmanət və zəmanətsonrası xidmətinin göstərilməsi daxildir. Odur ki, iftixarla deyə bilərik ki, IT Solutions, yəqin ki, belə qlobal bazarda fəaliyyət göstərən yeganə Azərbaycan şirkətidir.
- Lukoil ilə müqavilə çərçivəsində vəzifələndirilmiş IT Solutions əməkdaşlarının sayı nə qədərdir?
- Müqaviləyə əsasən layihədə 20 nəfər işləyir. Burada bir mühüm qeydə ehtiyac var: söhbət 20 əməkdaşdan deyil, həftənin 7 günü, günün 24 saatı ərzində yerinə yetirilən 20 vəzifədən gedir. Lukoil şirkətinin fəaliyyət göstərdiyi ölkələrdə bizim öz ofislərimizin mövcud olması ilə yanaşı əməkdaşlarımız bu və ya digər məsələlərin həlli üçün tez-tez xaricə səfər etməli olurlar. Buna baxmayaraq, işimizin əsas hissəsi məsafədən görülür, qurduğumuz infrastruktura əvvəldən məhz bunu nəzərdə tuturdu. Üstəlik, Lukoil şirkətinin xaricdəki obyektlərinin əksəriyyəti kifayət qədər avtomatlaşdırılması da buna imkan yaradır.
Lukoil bazarda olduqca aqressiv fəaliyyətilə seçilən şirkətdir və son 10 il ərzində dünyanın müxtəlif ölkələrində aktivlər alaraq öz infrastrukturasının inkişafına külli miqdarda yatırım qoyub. Məhz buna görə satın alınmış zavodların, yanacaq doldurma məntəqələrinin, enerji şirkətlərinin, neft və qaz satışlarında ixtisaslaşan müəssisələrin, habelə mədən və yataqların, almaz çıxartma şirkətlərinin və digər qurumların fəaliyyət istiqamətinin dərhal dəyişdirilməsi məsələsi gündəmə gəldi. Biz bu işi uğurla yerinə yetirdik və buğun satın alınmış aktivlər vaxt itirmədən Lukoil İT ekosisteminə dərhal qatılmağa hazırdır.
Yeri gəlmişkən, Lukoil ilə müqavilə əsasında fəaliyyət göstərən mütəxəssislərimizin peşəkar səviyyəsini də qeyd etmək lazımdır. Onların əldə etdiyi bir sıra sertifikat buğun Azərbaycanda başqa heç kimdə yoxdur. Burada sadəcə konkret layihələri həyata keçirmək üçün sertifikat alan mütəxəssislər deyil, eləcə də texniki xidmət göstərən və əməliyyat fəaliyyətilə məşğul olanlar da daxildir. Bunsuz mümkün deyil: deyək ki, Meksika Körfəzi yanacaq bazarında uğur qazanmaq üçün gərək Chevron, Exxon və BP kimi şirkətlərlə rəqabət apara biləsən. Bunun üçün sizin geniş həcmli bacarıq paketiniz olmalıdır, çünki yataq yalnız quyu qazmaqla neft çıxarmağı bacaran şirkətə əsla təhvil verilməz.
