“Azərbaycan Ordusu regionun ən güclü ordusudur” — Millət vəkili

“Azərbaycan Ordusu regionun ən güclü ordusudur”
10:48
04.04.2019
1914
Analitika
A
Azərbaycan prezidenti İlham Əliyev dəfələrlə bəyan edib ki, Qarabağ münaqişəsinin sülh yolu ilə həllində real nəticəyə nail olmaq və danışıqlar prosesini irəliyə aparmaq üçün substantiv təkliflər müzakirə olunmalıdır.

Bunu “Ölkə.Az”a açıqlamasında millət vəkili Sabir Hacıyev bildirib.

 Onun sözlərinə görə, sülh danışıqları ilə paralel olaraq ordumuz da daim gücləndirilir:

  “Azərbaycan prezidenti İlham Əliyev  dəfələrlə bəyan edib ki, torpaqlarımız nə qədər işğal altındadır  ordumuzu gücləndirəcəyik. Azərbaycan ordusu güclənib və ordumuzun qüdrəti bundan sonra da artırılacaq. Bunun nəticəsidir ki, Azərbaycan ordusu dünyanın ən güclü orduları sırasında olmaqla, regionun ən güclü ordusu hesab olunur. Biz hələləlik danışıqlara üstünlük veririk. Yəni, güc yol ilə işğal altında olan torpaqlarımızı işğaldan azad etmək ən sonuncu variantdır”.

 Deputat bildirib ki, Azərbaycan prezidenti Qarabağ münaqişəsinin  beynəlxalq hüquq normalarına uyğun olaraq Azərbaycanın ərazi bütövlüyü çərçivəsində həllinin tərəfdarı olduğunu martın 29-da Vyanada keçirilən sonuncu görüşün yekunu ilə bağlı açıqlamasında bir daha bəyan edib:
“Ölkə başçısı bildirib ki, Azərbaycan torpaqları işğaldan azad olunduqdan sonra  iki dövlət arasında münasibətlər  bərqərar ola bilər. Ona görə də Azərbaycan prezidenti bəyan etdi ki, problemin sülhlə nəticələnməsi üçün danışıqları irəliyə aparacaq substantiv  təkliflər müzakirə olunmalı və bu istiqamətdə konkret addımlar atılmalıdır.

Təbii ki, ordunu da gücləndirməliyik və ordumuz da yetərincə güclüdür. Bunu istər 2016-ci il Aprel döyüşləri, istərsə də 2018-ci ilin mayında Naxçıvan döyüşləri sübut etdi”.

Ermənistan baş naziri Nikol Paşinyan və müdafiə naziri David Tonoyanın səsləndirdiyi bəyanatlara  gəldikdə isə S. Hacıyev bildirib ki, onların müdafiə naziri ABŞ-da erməni diasporu ilə görüşdə hansısa maraqları güdərək belə çıxış edib:

 “Paşinyan isə deyib ki, Azərbaycan tərəfi hücum edərsə, cavab verəcəyik. Ancaq Azərbayacn tərəfi dəfələrlə bəyan edib ki, münaqişənin müharibə yolu ilə deyil, sülh yolu ilə həllini istəyir. Ona görə də Ermənistan danışıqlarda konstruktivlik nümayiş etdirib, substantiv danışıqlara razılıq verməlidir. Daha Azərbaycanı münaqişəni güc yolu ilə həllinə vadar etməməlidir. Çünki Ermənstan tərəfi keçən əsrdən qalan münaqişənin həllində real addımlar atmaq istəmir və hər dəfə destruktivlik nümayiş etdirir. Bir daha təkrar edirəm ki, Azərbaycan tərəfi məsələnin danışıqlar yolu ilə, qan tökülmədən həllini istəyir. Ermənistan tərəfidə sülh tərəfdardırsa və ya buna sadiqdirsə, o zaman danışıqları irəliyə aparacaq konkret addımlar atmalıdır.

Lakin son danışıqlardan  bəlli olan odur ki, danışıqlar prosesinə yenidən start verilib  və odur ki, bir müddət gözləmək lazımdır. İndidən hansısa konkret fikir söyləmək olmaz”.

Danışıqlar nəticə verməyəcəyi təqdirdə güc yolu ilə torpaqların işğaldan azad olunmasına gəldikdə isə  S. Hacıyev bildirib ki, bu,  Ali Baş Komandanın  səlahiyyətində olan məsələdir: “Belə bir qərarı ancaq o verə bilər. Biz danışıqlar prosesinin hansı yerdə olduğunu və situasiya barədə tam bilgiyə malik deyilik. Real vəziyyəti bilmədiyimiz üçün bir fikir söyləyə bilmərik. Vəziyyəti bilən və  belə bir qərar verə biləcək şəxs Ali Baş Komandandır”. 

Mürtəza
Ölkə.Az

ŞƏRH YAZ
0

“Bəzi qüvvələrin məqsədi Azərbaycanı emosional addımlara sövq etməkdir” — Ekspert Keşikçidağ məsələsindən danışdı

“Bəzi qüvvələrin məqsədi Azərbaycanı emosional addımlara sövq etməkdir”
12:25
16.07.2019
26031
Analitika
A
Son dövrlərdə Cənubi Qafqaz bölgəsində gesosiyasi proseslər yeni bir mərhələnin astanasına qədəm qoyub. Bölgədə marağı olan beynəlxalq güclərin bölgə uğrunda mübarizəsi açıq formada özünü biruzə verməkdədir. Gürcüstanda baş verən olaylar bunun bariz göstəricisidir. Hətta bəzi qüvvələr yaranmış situasiyadan faydalanaraq Gürcüstandakı daxili qüvvələrin rolundan istifadə edərək Azərbaycanla münasibətlərin korlanmasına cəhd edirlər. Bu qüvvələr müxtəlif xarakterli təxribatlara əl atmaqla iki ölkə və xalq arasında münasibətlərin gərginləşdirilməsinə çalışırlar. Bu istiqamətdə son bir neçə ayda davamlı olaraq bir sıra təxribatlar həyata keçirməkdədirlər. Növbəti təxribat isə iki gün öncə Azərbaycan sərhədləri daxilində yerləşən “Keşikçidag” məbədində sərhədçilərimizə qarşı baş verdi. Ancaq Azərbaycan tərəfi təmkinlilik və ayıqlılıq nümayiş etdirərək təxribatçıların təxribatına uymadı.

Rəsmi Tiflis əvvəlki hadisələrdən fərqli olaraq bu dəfə tez reaksiya verərək hadisəni pislədi. Rəsmi Bakı isə diplomatik kanallar vasitəsi ilə öz etirazını çatdırdı.

Bölgədə yaranmış durumla bağlı ekspert  Zaur İbrahimliyə müraciət etdik.

 “Ölkə.Az”a açıqlamasında bölgədə baş verən prosesləri dəyərləndirən Z. İbrahimli deyib ki, Azərbaycan  geosiyasi tələyə düşməkdən qaçmalıdır.
“Azərbaycan sərhədçisi ilə bağlı insidenti müzakirə edərkən aşağıdakı məqamlar və ümumi kontekst də mütləq nəzərə alınmalıdır: Birincisi, hazırda Gürcüstanda daxili siyasi mühit gərgin olaraq qalır və bu ölkənin qeyri-rəsmi rəhbəri Bidzina İvanişvilinin mövqelərini getdikcə zəiflədir. Rusiyalı deputatlarla bağlı etirazlara laqeyd qala bilməyən Moskva eyni zamanda İvanişvilinin də çox zərbə almasında maraqlı deyil. Məhz buna görə Tbilisiyə qarşı iqtisadi sanksiyalar tətbiq edilmədi. Bu vəziyyətdə prezident Zurabaşvili də daxil olmaqla İvanişvili komandasını xilas etmək, həm də öz simasını saxlamaq Kremlin əsas vəzifələrindən sayılır. Bunun ən yaxşı üsullarından biri daxili siyasi diskursu dəyişmək, ictimai diqqəti, vətəndaşları siyasi gündəlikdən yayındırmaqdır. Həmçinin İvanişvili komandasına xal qazandırmaqdır. Bunun ən optimal yolu isə Keşikçidağ məsələləsini yenidən aktuallaşdırmaqdır.

İkincisi, Bakıda Azərbaycan-Türkiyə-Gürcüstan üçtərəfli görüşü dünən baş tutub. Üçtərəfli formatda görüşlər, hərbi təlimlər Rusiya tərəfindən ABŞ və NATO-nun layihəsi kimi nəzərdən keçirilir. Tbilisinin Türkiyə və Azərbaycanla hərbi-siyasi müstəvidə əməkdaşlığı dərinləşdirməkdən çəkindirmək də Rusiyanın Cənubi Qafqazda əsas geosiyasi ev tapşırıqlarından biridir. Azərbaycanla ərazi mübahisələrinin qabardılması Türkiyə ilə münasibətləri də zərbə altında qoyacaq. Bir az əvvəl isə Rusiya TV-ləri Batumi və və digər turist zonalarının guya türklər tərəfindən alınaraq zəbt edilməsi barədə intensiv təbliğat aparırdılar”, - ekspert qeyd edib.

O, əlavə edib ki, Gürcüstanla bağlı proseslər iyunun binici yarısında bu ölkənin baş naziri Mamuka Baxtadzenin ABŞ-a səfərindən sonra başladı: 
“ABŞ rəsmiləri faktiki olaraq Tblisidən Anakliya limanının tikintisini dəstəkləməyi ultimativ şəkildə tələb etdilər. Bundan sonra hökumət bəyan etdi ki, limanın tikilıməsi ilə bağlı konsorsiuma maliyyə öhdəliklərinin icrası ilə əlaqədar güzəşt edəcək. Halbuki, az əvvəl konsorsiumla müqavilənin pozulması gündəliyə gəlmişdi. Rusiya XİN rəsmisi Karasin isə bildirmişdi ki, ABŞ bütün qırmızı xəttləri keçir. Çünki Vaşinqtonda açıq bəyan etmişdilər ki, Tblisinin NATO yolunu açmağa çalışırlar. Bu hadisələrin ardından Gürcüstanda daxili siyasi proseslər gərginləşdi və İvanaşvili iqtidarı üçün real təhdidlər yaranıb. İndi Moskvanın əsas vəzifəsi 4 ilə əvvəl Moldovoda olduğu kimi İvanişvilini qorumaq və zaman udmaqdır. Bunun da əsa yolu milli hissləri körükləmək, “xarici düşmənə qarşı birləşmək” zərurəti yaratmaqdır. 

Burada digər əsas məqamlardan biri də  İvanaşvilinin hər zaman əsas vəzifəsi Gürcüstan-Azərbaycan əlaqələrində strateji inkişafı tormozlamaq, müəyyən həddə qədər durdurmaq olub. Azərbaycandan enerji daşıyıcılarının ixracından tutmuş, tranizt razılaşmaları və digər məsələlərdə hər zaman mövcud konsensusu pozmaq, maksimalist mövqe tutulması da bu yanaşmanın təzahürüdür”.

Ekspertin fikrincə, Azərbaycan təmkinini qorumalıdır: 

“Topxana hadisələri ilə bağlı müqayisə aparmaq olar, amma indi fərqli zamandır, şərtlər fərqlidir. Bu məsələdə hökumətdən çox cəmiyyətimiz, diasporamız fəal olmalıdır. Amma qurulan tələyə düşməmək şərtilə. Yuxarıda qeyd etdiyim səbəblərdən emosiylara yol vermək olmaz. Bu addımların əsas məqsədi məhz Azərbaycanı emosional addımlara sövq etməkdir. Bütün strategiya buna hesablanıb. Diqqətli, təmkinli, müdrik və fəal olmağımız gərəkir”.

 Mürtəza
Ölkə.Az

ŞƏRH YAZ
0

Biznes dünyasında SOCAR Azərbaycan ilə assosiasiya olunur — Aleksey Kalaçevin şərhi

Biznes dünyasında SOCAR Azərbaycan ilə assosiasiya olunur
10:39
15.07.2019
5660
Analitika
A
Dünya brendlərinə çevrilmiş milli şirkətlər, məhsulun istehlakçıları olan şirkətlər və vətəndaşlar üşün ölkənin siması deməkdir.

 “Ölkə.Az” xəbər verir ki, bunu Media.Az-la söhbətində Rusiyanın “FİNAM İnvestisiya holdinqi” Səhmdar Şirkətinin analitik-eksperti Aleksey Kalaçev deyib.
Onun sözlərinə əsasən, məhsula və brendə olan xoş münasibət əsasən ölkənin nümayəndələrinə də şamil edilir:

“”Qazprom” bir çoxları üçün Rusiyanı, “Microsoft” və “Apple” ABŞ-ı, “Mercedes” Almaniyanı, “Mitsubishi” Yaponiyanı ifadə edir və SOCAR da biznes dünyasında Azərbaycanla assosiasiya olunur. Bunun məqsəd olmasından asılı olmayaraq, bu assosiasiya şirkətin imicinə, ölkənin obrazına təsir edir”.
Müsahibimiz qeyd edir ki, idman və mədəni tədbirlərin sponsorluğu hazırda şirkət imicinin əhəmiyyətli bir hissəsidir. Bunu öz növbəsində şirkətin dünya arenasında nüfuzunun artmasına xidmət edən “yumşaq güc” də adlandırmaq olar.

“Bundan başqa, qeyd etmək istəyirəm ki, bu gün inkişaf edən dünyada müasir iqtisadiyyat biznesin sosial funksiyasına daha böyük önəm verir. Keyfiyyətli məhsul təklif etmək azdır, effektiv və gəlirli olmaq kifayət etmir, biznesin cəmiyyətə təqdim etdiyi xoş niyyətləri və faydanı nümayiş etdirmək lazımdır”, - deyə Aleksey Kalaçev qeyd edib.

Ölkə.Az

 

ŞƏRH YAZ
0
BAĞLA