\"Azərbaycan tərəfi bu faktdan ciddi şəkildə yararlanmalı və buna ciddi etiraz etməlidir\"
Ermənistan hava hücumundan müdafiə bölmələri tərəfindən cəbhənin Xocavənd-Füzuli istiqamətində “OSA” zenit raket kompleksindən buraxılan idarəolunan raket heç bir hədəfə dəymədən nəzarətimizdə olan ərazidə boş sahəyə düşüb.
Ermənistan tərəfinin Azərbaycan, Rusiya və Ermənistan XİN rəhbərlərinin görüşü ərəfəsində Azərbaycana raket zərbəsi endirməsi birmanəalı qarşılanmır. Ekspertlər bunu təxribat kimi qiymətləndirirlər.
Ermənistan tərəfinin Azərbaycana açdığı raket zəribəsi barədə hərbi ekspert Üzeyir Cəfərov Ölkə.Az-a danışıb:
"Aprelin 28-də Ermənistan ordusu Azərbaycan silahlı qüvvlərinin mövqelərinə zenit raket zərbəsi endirib. Bəzi şəxslər bu raketi müddəti ötmüş, oyuncaq kimi təqdim edirlər. Bunun fərqi nədir? Əsas məsələ odur ki, Azərbacan mövqelərinə atəş açılıb. Mütləq bir xətər yetirməlidir, ondan sonra biz hansısa narahatçılığımızı bildirməli idik?
Bu faktla bağlı Azərbaycan xarici işlər naziri Elmar Məmmədyarov Moskva görüşündə öz narazılığını və etirazını bildirməli idi. Azərbycanın Xarici işlər nazirliyi və Müdafiə nazirliyi günü bu gün ATƏT-ə foto və video görüntüləri təqdim etməlidirlər ki, Ermənistan Azərbaycan ərazilərini “OSA” zenit raket kompleksindən atəşə tutub. İndi məlum olur ki, ermənilər əslində 1 yox, əslində 3 raket atıblar. Belə desək xoşbəxtlikdən hərbçilərə və mülki əhaliyə xətər yetirməyib. Ermənilərin xisləti, məkirli niyyəti ondan bilinir ki, onlar görüş keçirilən vaxtda bu hərəkəti ediblər. Ona görə də, hesab edirəm ki, Azərbaycan tərəfi bu faktdan ciddi şəkildə yararlanmalı və buna ciddi etiraz etməlidir. “OSA” zenit raket kompleksi avtomat deyil, qumbaratan deyil. O raket şəxsi heyətin, mülki əhalinin arasına düşsə idi təbii ki, itkilərimiz olacaqdı.
Raketi atan düşmən ordusudur. Onların yaxşısı da, pisi də düşmənindir. Biz onunla özümüzü sakitləşdirməməliyik. İnformasiya müharibəsi tamam başqa bir şeydir. Hesab etmirəm ki, ermənilər o raketləri dünən elə-belə atmışdılar. Hər halda o raketi ermənilər ermənilər tərəfinə buraxmamışdılar, o raketi məhz Azərbaycan tərəfinə buraxıblar və Azərbaycan tərəfinə də düşüb. Ermənilərin necə ordusu var onu yaxşı bilirik, ancaq bu çox ciddi hadisədir. Hesab edirəm ki, bazarertəsi Azərbaycan Xarici işlər nazirliyi bu faktla bağlı etirazını və narazılığını bildirməlidir. Azərbaycan mətbuatı da bu məsələdə çox ciddi iş görməlidir.
Dünənki hadisə ilə bağlı ATƏT-in Minsk qurupunun "həmişə narahat olan" həmsədrləri narahatçılığını bildirməli idi. Hər halda Azərbaycan tərəfi yox, erməni tərəfi Azərbaycan tərəfinə atəş açıb".
Baş verən hadisəyə reaksiyaya gəldikdə isə hərbi ekspert bildirdi ki, biz vaxtında və düzgün reaksiya vermirik:
"Dünən onlar ölmüş əsgərləri ilə bağlı mətbuatlarında hay-küy qaldırdılar. Biz dəfələrlə bildirmişik ki, Qarabağda olan əsgər atəş açacacaqsa Azərbaycan tərəfi mütləq cavab verməlidir. Müdafiə naziri Zakir Həsənov dəfələrlə deyib ki, ermənilərin 1 atəşinə 5 atəşlə cavab verəcəyik. Bütün bunları bildikləri halda ermənilər bu təxribatı törətdilər. Azərbaycan tərəfi dünən Moskvadakı görüşə görə ciddi reaksiya verməyib, ancaq bu o demək deyil ki, biz yumşaq bəyanatlarla bu məsələnin üstündən keçməliyik. Dünənki hadisə ilə bağlı Azərbacan XİN-i narazılğını bildirməlidir.
Dünənki görüşdə Elmar Məmmədyarovun Rusiya XİN-i Sergey Lavrova təşəkkürü anlaşılan deyildi. Rusiya hansı səy göstərir ki, Azərbaycan tərəfi bu mənasız görüşlərə görə Rusiyaya təşəkkür edir. Elmar Məmmədyarov ən azı Lavrova dünənki məsələ ilə bağlı narazılığını bildirməli idi. Bizim xarici işlər nazirimiz mədəniyyət nazirinin gününə düşüb. Yumşaq, humanist bəyanatlar səsləndirir. Elmar Məmmədyarova suallar ünvanlanır, nazir isə cavabında deyir buna Hikmət Hacıyev (red. XİN mətbuat xidmətinin rəhbəri) cavab verib. Hikmət Hacıyev axı Azərbaycanın xarici işlər naziri deyil. Azərbaycanın xarici işlər nazirinin dilindən çıxan sözü bütün dünya yayımlayır, Hikmət Hacıyevin açıqlamlarını isə bəzi mətbu orqanlar istəyəndə verir, bəziləri isə vermir. Ən azından dünən ermənilərin qatı havadarlarının gözü qarşısında Elmar Məmmədyarov borclu idi ki, narazılığını və narahatçılığını bildirsin".
Səxavət Məmməd
Ölkə.Az
