Azərbaycan tütününə alıcı tapılmır
"Ölkə.Az" xəbər verir ki, zavodun direktoru Fazil Rüstəmovun Fins.az-a verdiyi məlumata görə, hər il zavoda 1000-1500 ton tütün gətirilir.
Emal üçün zavoda gətirilən tütün Şəki, Qax və Zaqatalada əkilir. Əkilən tütün sortu isə ABŞ-ın Virciniya adlı növüdür.
F.Rüstəmov bildirib ki, il ərzində zavodda 1000 ton məhsul istehsal edilir. Emal edilən tütünün 300-400 tonu Rusiyaya, cəmi 20-30 tonu isə Belarusyaya satılır. Qonşu Gürcüstan isə 15 ton tütün alır.
Zavod rəhbəri yerli bazara isə ancaq xam tütünün satıldığını bildirdi. Satılmayan tütün anbarlarda yığılıb qalır.
F.Rüstəmovun sözlərinə görə, mövsümdə zavodda 60 nəfər, qeyri-mövsüm müddətində isə 20 nəfər işləyir. Hazırda zavodda tütün emalı dayanıb. Çünki zavod aprel- may aylarına kimi işləyir.
