Azərbaycan yığmasından 3 medal

Ölkə.Az xəbər verir ki, ilk yarış günündə Azərbaycanın 3 çəkidə dərəcəsi üzrə 4 təmsilçisi tatami üzərinə çıxıb.

Onların hamısı mübarizəyə 1/16 final mərhələsindən başlayıb. Günün yekununda 3 bürünc medal qazanılıb. Həmin medallara Orxan Səfərov, Nicat Şıxəlizadə və Hidayət Heydərov sahib çıxıb.  

60 kq çəki dərəcəsindəki Orxan Səfərov finala gedən yolda onun rəqibi yaponiyalı Naohişa Takato olub. İpponla uduzan Səfərov bürünc görüşündə braziliyalı Erik Takabatakeni vazari ilə yenərək, fəxri kürsüyə qaxmağı bacarıb. 

66 kq çəkidə yer alan Nicat Şıxəlizadə 1/4 finalda rusiyalı Anzaur Ardanovla qarşılaşıb. Şıxəlizadə 33 saniyəyə ipponla uduzub. O, bürünc medal uğrunda ilk təsəlliverici görüşdə israilli Tal Flikkeri yenərək, bürünc medal görüşünə vəsiqə qazanıb. Şıxəlizadə bu dəfə kanadalı Antuan Buşarı 2 vazari ilə yenərək, Azərbaycanın aktivinə növbəti medalı yazdırıb.

73 kq-da Rüstəm Orucov yarımfinalda cənubi koreyalı Çanqrim Anla görüşüb. Qarşılaşmanı məğlub başa vuran Orucovun bürünc medal qarşılaşmasında rəqibi 23 yaşadək cüdoçular arasında Avropa çempionu Hidayət Heydərov olub.

Hidayət Heydərov isə 1/4 finalda yaponiyalı Soişi Haşimoto ilə qarşılaşıb. Azərbaycan təmsilçisi bu dəfə vazari ilə uduzub. O, bürünc medal uğrunda ilk təsəlliverici görüşdə fransalı Loik Korvalı yenib. Orucov - Heydərov görüşünün nəticəsindən asılı olmayaraq, Azərbaycanın aktivinə daha bir bürünc medal yazılıb. Amma onların qarşılaşmasının taleyi "qızıl xal"la həll olunub. Əsas vaxtda xal qazanılmadığı üçün 1 dəqiqəlik əlavə vaxtda gənc və perspektivli Heydərov fənd tətbiq edərək, görüşü qələbə ilə başa vurub və karyerasında ilk dəfə "Böyük Dəbilqə"nin medalına yiyələnib.

Qeyd edək ki, daha 2 çəkidəki 4 cüdoçu fevralın 12-də mübarizəyə qoşulacaq.