"Azərbaycanda devalvasiya üçün heç bir əsas yoxdur" — Deputatdan Samir Şərifovun fikirlərinə REAKSİYA

14:23
06.12.2018
6585
İqtisadiyyat
A
Azərbaycanın sabiq Baş nazirinin birinci müavini, Milli Məclisin İqtisadi siyasət, sənaye və sahibkarlıq komitəsinin üzvü, deputat Vahid Əhmədov maliyyə naziri Samir Şərifovun devalvasiya ilə bağlı açıqlamasına münasibət bildirib.

V.Əhmədov "Ölkə.Az"a açıqlamasında maliyyə nazirinin sözügedən çıxışının başadüşülməz olduğunu söyləyib:

"Mənə elə gəlir ki, maliyyə naziri Samir Şərifovun fikirləri müəyyən qədər konteksdən çıxarılıb. Yaxud da o, öz fikirlərini axıra çatdıra bilməyib. Əlbəttə ki, indiki vəziyyətdə Azərbaycana manatın dayanıqlı olması vacibdir. Bu gün həm əhali, həm də sahibkarlar üçün dayanıqlı manatın olması lazımdır ki, hər hansı ciddi problem yaranmasın. 2015-ci ilin devalvasiyası çoxlarının yadına gəlir. Həmin devalvasiyadan nə qədər insanlar əziyyət çəkdi, əhalinin nə qədər milli valyutası dəyərdən düşdü, banklarda olan əmanətlər dəyərini itirdi, bankların vəziyyəti ağırlaşdı, buna görə əhali ilə banklar arasında problemlər yaşandı və sairə. 

Ən əsası isə bu gün manatın dəyərdən düşməsi üçün heç bir problem və ya əsas yoxdur. Çünki hazırda dünyada neftin qiyməti 60 dollardan yuxarıdır, Azərbaycanın idxal-ixrac əməliyyatlarında müsbət saldo var və Mərkəzi Bank tərəfindən pul kütləsinə çox ciddi nəzarət olunur. Ona görə də mən hesab edirəm ki, indiki şəraitdə sadaladığım bu üç əsas amil Azərbaycanın xeyrinə olduğu üçün indiki şəraitdə manatın devalvasiyasından söhbət gedə bilməz. Hazırda Azərbaycan dövlətinin 45 milyrad dollardan çox valyuta ehtiyyatı var. Axı nə üçün manat devalvasiya olunmalıdır? Bu baxımdan da düşünürəm ki, hazırda gedən proseslər və ölkədə aparılan iqtisadi siyasətə görə Azərbaycanda heç bir devalvasiya gözlənilmir. Yəni, yaxın vaxtlarda biz bunun şahidi olmayacağıq".

Deputat bir daha deyib ki, manatın sabitliyi Azərbaycan əhalisi üçün çox vacibdir:

"Çünki əhali bu cür məsələlərdən çox narahat olur, manat dəyərdən düşəndə infilyasiya yaradır. Digər tərəfdən isə Azərbaycanın kifayət qədər xarici dövlət borcu mövcuddur. Manat ucuzlaşanda, dollar bahalaşanda dövlət borcumuz da artır. Ona görə də bu cür məsələləri dəqiq fikirləşib danışmaq lazımdır. 

Mən maliyyə naziri Samir Şərifovun bu cür açıqlamasına qarşıyam. Hesab edirəm ki, Nazirlik bu məsələyə aydınlıq gətirməlidir. Şəxsən mən nazir Samir Şərifovun dedikləri ilə qətiyyən razı deyiləm. Əgər doğrudan da belə bir proses var idisə, o zaman Milli Məclisdə Dövlət Büdcəsi məsələsi müzakirə olunan zaman bu açıqlanmalı idi. Biz 15 günə yaxın müzakirələr apardıq və manatın dayanıqlığını təsdiq etdik. Bəs belə söhbət var idisə, nə üçün nazir bunu açıqlamırdı? Bu gün dayanıqlı manat Azərbaycana çox lazımdır. Bu çox ciddi məsələdir. Bu gün əhali arxayındır ki, onun vəsaiti sabit məzənnədə saxlanılır. Ona görə də  hesab edirəm ki, Maliyyə Nazirliyi bu məsələyə əlavə şərh verməlidir".  

Xatırladaq ki, maliyyə naziri Samir Şərifovun "manatın məzənnəsinin kəskin möhkəmlənməsi ixraca da mənfi təsir edir. Bu xaricdən idxalın artmasına səbəb olur. Ona görə də, biz bir sıra məsələlərin həllinə çalışmalıyıq” kimi verdiyi açıqlama ictimaiyyət tərəfindən birmənalı qarşılanmayıb.  

Vasif Həsənli
Ölkə.Az

ŞƏRH YAZ
0

Azərbaycan ötən il Gürcüstana 240 mln. dollar investisiya yatırıb

Azərbaycan ötən il Gürcüstana 240 mln. dollar investisiya yatırıb
01:00
Bu gün
2295
İqtisadiyyat
A
Ötən il Gürcüstan iqtisadiyyatına 1 mlrd. 232,4 mln. ABŞ dolları həcmində investisiya yatırılıb.

"Ölkə.Az" report-a istinadən bildirir ki,, bu barədə ötənilki dövlət büdcəsinin icrası haqqında sənəddə bildirilir.

İllik müqayisədə qonşu ölkəyə qoyulan sərmayələrin həcmi 34,9% azalıb.

Hesabat ilində Gürcüstanın ən böyük investoru 240 mln. dollarla Azərbaycan olub. İkinci və üçüncü yerlərdə müvafiq olaraq Böyük Britaniya (203,7 mln. dollar) və Niderland (167,9 mln. dollar) qərarlaşıb.

Sənəddə qeyd olunub ki, 2018-ci ildə ən çox investisiya maliyyə (277 mln. dollar), nəqliyyat (210 mln. dollar) və energetika (157 mln. dollar) sahələrinə yatırılıb.

Dövlət büdcəsinin icrası haqqında sənəd mayın 27-də Gürcüstan parlamentinin büro iclasında təqdim olunacaq.

Ölkə.Az

ŞƏRH YAZ
0

Azərbaycanda külək enerjisi istehsalı artıb

Azərbaycanda külək enerjisi istehsalı artıb
19:32
24.05.2019
1961
İqtisadiyyat
A
Bu ilin yanvar-aprel ayları ərzində Azərbaycanda elektrik enerjisi, qaz və buxar istehsalı, bölüşdürülməsi və təchizatı sektorunda 711,7 mln. manat dəyərində məhsul istehsal olunub və xidmətlər göstərilib.

"Ölkə.Az"ın Dövlət Statistika Komitəsinə istinadən verdiyi məlumata görə, əvvəlki ilin müvafiq dövrü ilə müqayisədə 2,1%-lik artım müşahidə olunub. Su təchizatı, tullantıların təmizlənməsi və emalı sektorunda istehsal edilmiş məhsulların həcmi 9,4% artaraq 101,6 mln. manat təşkil edib.

Ötən dörd ay ərzində Azərbaycanda 8 197,3 mln. kVt/saat elektrik enerjisi istehsal edilib ki, bu da 2018-ci ilin yanvar-aprel aylarının göstəriciləri ilə müqayisədə 4,4% çoxdur.

Elektrik enerjisinin 434,5 mln. kVt/saatı su elektrik stansiyalarının istehsalının payına düşür ki, bu da 2018-ci ilin yanvar-aprel aylarının göstəriciləri ilə müqayisədə 16,4% azdır.

Enerji istehsalının 7 435,2 mln. kVt/saatı istilik elektrik stansiyalarının istehsalıdır ki, bu da 2018-ci ilin dörd ayının göstəriciləri ilə müqayisədə 5,9% çoxdur.

Bu ilin yanvar-aprel ayları ərzində Azərbaycanda 40,5 mln. kVt/saat küləklə işləyən stansiyaların enerji istehsalı olub ki, bu da 2018-ci ilin dörd ayının göstəriciləri ilə müqayisədə 7,5 dəfə çoxdur.

Bu ilin dörd ayı ərzində ölkədə 7,5 mln. kVt/saat günəş enerjisi ilə işləyən stansiyaların istehsalı olub ki, bu da 2018-ci ilin yanvar-aprel aylarının göstəricisi ilə müqayisədə 33,6% azdır.

ŞƏRH YAZ
0
BAĞLA