“Azərbaycanda ikili vətəndaşlığa icazə verilməlidir” — DEPUTATDAN MÜHÜM ÇAĞIRIŞ

“Azərbaycanda ikili vətəndaşlığa icazə verilməlidir”
15:05
22.08.2017
224
Siyasət
A
Milli Məclisin Hüquq siyasəti və dövlət quruculuğu komitəsinin üzvü, deputat Rafael Cəbrayılov Azərbaycanda da ikili vətəndaşlığa icazə verilməsi məsələsini təklif edib.

R.Cəbrayılov “Ölkə.Az”-a açıqlamasında bildirib ki, hazırda Azərbaycan ikili vətəndaşlığın verdiyi imkanlardan yararlana bilmir: 

“Hesab edirəm ki, yaxın gələcəkdə ikili vətəndaşlıq məsələsi Azərbaycan qanunvericiliyinə gətirilməlidir və ölkəmiz bundan yaralanmalıdır. Bu mənim şəxsi fikrimdir. Misal üçün, biz Rusiyada yaşayan azərbaycanlıları nəyə görə ya Azərbaycanı, ya da Rusiyanı seçməsi üçün dilemma qarşısında qoymalıyıq? Bu gün Rusiyada, ABŞ-da və ya digər ölkələrdə yaşayan azərbaycanlı iş adamlarımız var. Onlar nə üçün Azərbaycan vətəndaşı ola bilməsin? Düşünürəm ki, ikili vətəndaşlığa pis baxılması keçmiş SSRİ dövründən qalan haldır. Bilirsiniz ki, Sovet İttifaqı dövründə ikili vətəndaşlıqdan söhbət gedə bilməzdi. Həmin dövrdə ikili vətəndaşlıq məsələsi mütləq siyasətlə əlaqələndirilirdi. Ancaq bu gün vəziyyət tamam fərqlidir. Bu gün dünyada nəinki iqtisadiyyat, hətta idman da siyasətlə əlaqəlidir. Ona görə də biz də qlobal dünyanın tələblərinə uyğun addımlar atmalıyıq. Ən azı çalışmalıyıq ki, Azərbaycan da ikili vətəndaşlığın imkanlarından yararlana bilsin. Daha xaricdə yaşayan soydaşlarımızı dilemma qarşısında qoymaq lazım deyil. Bu cür addımlar Azərbaycan vətəndaşlarının itirilməsinə gətirib çıxara bilər. Düşünürəm ki, bu da indiki vəziyyətdə Azərbaycanın mənafelərinə uyğun deyil”.

Deputat deyib ki, ikili vətəndaşlığa icazə verilsə, o zaman ayrı-ayrı xarici ölkələrdə yaşayan və Azərbaycana bağlı olan insanlar bu imkandan yararlana biləcək:

“Əks halda Azərbaycana bağlı və ya azərbaycanlı olan insanları dilemma qarşısında qoymuş oluruq. Yəni, biz həmin insanları ya Azərbaycan, ya da digər ölkənin vətəndaşı olmağa məcbur edirik. Yaxşı olardı ki, həmin insanlar yaşadıqları ölkələrin vətəndaşı olmaqla yanaşı, həm də Azərbaycan vətəndaşı olsunlar. Bunun üçün də mütləq Azərbaycan qanunvericiliyində dəyişiklik edilməlidir. Ümumiyyətlə, bu məsələ ilə bağlı bir neçə il öncə Azərbaycan qanunvericiliyinə əlavə və dəyişikliklər olunub. Hətta, biz Cinayət Məcəlləsinə də əlavələr etmişik. Bütün bunlar olsa da, ancaq Azərbaycan qanunvericiliyi ikili vətəndaşlığa imkan vermir”. 

R.Cəbrayılov qeyd edib ki, ikili vətəndaşlığı qadağan edən analoji qanun bu gün çox az ölkələrdə qalır:

“Bunlardan biri də Rusiyadır. Amma təcrübə də göstərir ki, qanunvericiliklə ikili vətəndaşlığa icazə verən ölkələr bu imkanlardan daha çox bəhrələnirlər. Bundan həmin ölkələr daha çox qazanır. Hesab edirəm ki, Azərbaycanda da buna imkan yaradılsa, ölkəmizə fayda verəcək”.  

Deputat onu da vurğulayıb ki, iki vətəndaşlıq məsələsi ilə bağlı beynəlxalq konvensiyaya ehtiyac var: 

“Çünki dünyada qloballaşma və inteqrasiya proseslərinin getdiyi vaxtda dünya ölkələrinin vətəndaşlıq haqqında qanunlarının bir-birinə uzlaşdırılması çox vacib məsələyə çevrilib. Bu gün dünyada elə ölkələr var ki, bir neçə vətəndaşlığa, elə ölkələr də var ki, Azərbaycan kimi yalnız tək vətəndaşlığa icazə verir. Bütün bunlara görə də bir çox ölkələrin vətəndaşlıq haqqında qanunları arasında toqquşma yaranır. Bir çox beynəlxalq konvensiyalar zaman-zaman tənzimləndiyi üçün hesab edirəm ki, bu sahədə də tənzimlənmələrə ehtiyac var”. 

Vasif Həsənli
Ölkə.Az

ŞƏRH YAZ
0

"Qarabağ münaqişəsinin həlli yolunu tapmaq lazımdır" — Avropa İttifaqı

22:30
18.06.2018
2932
Siyasət
A
Qarabağ münaqişəsi tərəfləri danışıqlar masasına oturmalı və razılıq əldə etməlidirlər.

"Ölkə.Az" Ermənistan mətbuatına istinadən xəbər verir ki, bu sözləri Avropa Parlamentinin xarici işlər üzrə komitəsinin sədri Deyvid Makallister iyunun 18-də Yerevanda keçirdiyi mətbuat konfransı zamanı deyib. 

Ermənistana səfər edən Avropa Parlamentinin nümayəndə heyətinin rəhbəri vurğulayıb ki, atəşkəs rejiminə riayət etmək və hərbi ritorikanı dayandırmaq lazımdır.

"Qarabağ münaqişəsinə həll tapmaq lazımdır. Daha əvvəl də dedim və bir daha təkrarlayacağam - münaqişənin hərbi yolla həlli yoxdur. Status-kvo hər iki tərəfdən əziyyət çəkən insanlar üçün qəbuledilməzdir ", - deyə McAllister deyib.

Azərbaycan qoşunlarının təmas xəttinə səfərbər olunması və cəbhədə təhlükəli vəziyyətin yaranması ilə bağlı son məlumatlara dair sualları cavablandıran nümayəndə heyətinin üzvü Saccad Kərim bu məlumatların narahatlıq yaratdığını bildirib.

"Aİ tərəfləri tərəfləri dəyişən şərtlər qarşısında potensial yeni imkanlara zərər verə biləcək istənilən addımdan çəkinməyə və qarşılıqlı formada razılıq əldə etməyə çağırır", - deyə Səccad Kərim qeyd edib.

Ölkə.Az

ŞƏRH YAZ
0

İnam Kərimov yeni şöbə müdiri təyin etdi — FOTO

İnam Kərimov yeni şöbə müdiri təyin etdi
22:16
18.06.2018
2505
Siyasət
A
Kənd Təsərrüfatı Nazirliyində (KTN) yeni təyinat olub.

"Ölkə.Az" xəbər verir ki, kənd təsərrüfatı naziri İnam Kərimovun müvafiq əmri ilə 1987-ci il təvəllüdlü Əkbərov Fərahim Fərman oğlu Aqrolizinq ASC-nin Kadrların İdarə olunması şöbəsinin müdiri təyin olunub.

Qeyd edək ki, Fərahim Əkbərov bu təyinata qədər Vergilər Nazirliyinin Beynəlxalq Münasibətlər şöbəsində, sonra Əmək və Əhalinin Sosial Müdafiəsi Nazirliyində işləyib, Avropanın Gənc Azərbaycanlı Dostları Assosiasiyasının (AYAFE) sədridir.

Ölkə.Az

ŞƏRH YAZ
0
BAĞLA