”Azərbaycanda media tam azaddır və istədiyi mövzunu işıqlandırır”
Bunu “Ölkə.Az”a açıqlamasında millət vəkili Sona Əliyeva ABŞ Dövlət Departamentinin Azərbaycanda insan hüquqlarının durumu ilə bağlı hazırladığı hesabata mövqeyini açıqlayarkən deyib.
Deputat bildirib ki, heç uzağa getmədən bir neçə ay bundan öncə Fransada baş verən iğtişaşları misal çəkə bilərik:
“Qərb demokratiyanı, insan hüquqlarının müdafiəsini bir ölkənin daxili işi hesab etmədiyini bəyan etsə də, biz onların timsalında bunun tamamilə əksinin şahidi olduq. Fransada baş verən iğtişaşlara görə, hətta İtaliya ilə münasibətləri gərginləşdi. Bu aksiyalarda insanlar həyatını itirdi, yüzlərlə insan yaralandı, həbs olundular və müxtəlif formada təzyiqlərə məruz qaldılar”.
Deputat hesab edir ki, cəmiyyət və insan varsa, orada mütləq problem olacaq:
“Biri haqlıdırsa, digəri haqsız olacaq. Azərbaycandakı duruma gəldikdə isə deyə bilərəm ki, ölkəmiz demokratik və hüquqi dövlət olduğundan insanların hüquqları da qanunla müdafiə olunur. Demokratik cəmiyyət olaraq söz və fikir azadlığı mövcuddur. Hər kəs mövqeyindən asılı olmayaraq fikrini sərbəst ifadə edir və buna görə hər hansı təzyiqə, təqibə də məruz qalmır. Azərbaycanda media da tam azaddır və istədiyi fikri, mövzunu işıqlandırır. Qaldı ki, hansısa şəxsin həbsinə... Bu onların peşə fəaliyyətinə görə deyil, törtədiyi qanunzidd hərəkətləri ilə bağlıdır. Törətdiyi cinayətlərlə bağlıdır. Amma kimsə bu gün Azərbaycanda medianın məhdudlaşdırılması və jurnalistin təqib olunması qeyri-ciddi və əsassız fikirlərdir”.
Deputat hesab edir ki, bəzi qüvvələr, ölkələr Azərbaycana qarşı qarayaxma kampaniyasını aparıblar və aparmaqdadırlar:
“Əslində bu gün bu metodlarla, taktikalarla Azərbaycana qarşı təzyiqlər edilir. Çünki onların gözü Azərbaycanın inkişafını götürmür. Ona görə də hər hansı xirda məsələni şişirdərək, bir insanın qanunsuz əməlinə siyasi don geyindirərək Azərbaycana qarşı təzyiqlər ediblər və gələcəkdə də bu metoddan istifadə edəcəklər. Burada digər bir məqam da ondan ibarətdir ki, Azərbaycan mürəkkəb geocoğrafi məkanda yerləşdiyindən bir çox güclərin maraqları toqquşur. Azərbaycanın güclənməsi bu qüvvələrin bir çoxunun marağında olmadığından, narahat etdiyindən, bizə qarşı təzyiqlər olur. Mən bu hesabatları ölkəmizə qarşı təzyiq hesab edirəm. Bu cür ikili münasibət olub və olacaq da. Odur ki, onlara əhəmiyyət vermək lazım deyil”.
Mürtəza
Ölkə.Az