“Azərbaycanda nüfuzlu yarışların keçirilməsi erməni lobbisini qıcıqlandırır”

Bunu “Ölkə.Az”a açıqlamasında Milli Məclisin Gənclər və idman komitəsinin üzvü, deputat Cavid Osmanov deyib.

Onun sözlərinə görə, idmanda millətindən asılı olmayaraq insanlar müxtəlif ölkələri təmsil edir, beynəlxalq yarışlarda onların bayraqlarını qaldırırlar. 
“Əgər belə demək mümkünsə, idman qeyri-rəsmi olaraq ölkələr, xalqlar arasında münasibətlərin qurulmasında, diplomatiya rolunu oynayır. İdmanın ölkələrarası əlaqələrin inkişafında müstəsna rolu var. Ancaq təəssüflə qeyd etmək lazımdır ki, bir çox hallarda idmandan da bəzi qüvvələr öz xoş olmayan niyyətlərini gerçəkləşdirmək üçün istifadə edirlər.  Biz son illərdə mötəbər idman, mədəniyyət tədbirlərindən bir siyasi təzyiq vasitəsi kimi istifadə olunmasının şahidi olmaqdayıq. Bu isə yolverilməz haldır. Əgər proses belə davam edərsə, nəticədə  bundan uduzan  bütün dünya olacaq. İdmandan bir  təzyiq vasitəsi kimi deyil, əksinə, ölkələr, xalqlar arasında əlaqələrin inkişaf etdirilməsində, dünyada sülhün bərqərar olmasında istifadə etmək laızmdır”,- deputat bildiirb.

O, əlavə edib ki, son illərdə Azərbaycanda keçirilən mötəbər mədəniyyət və idman yarışları zamanı belə təzyiqlərin şahidi olmaqdayıq. 
“UEFA-nın final matçının Bakıda keçirilməsi zamanı da buna şahidlik etməkdəyik. Azərbaycanın inkişafını gözü götürməyən, ölkəmizi  sevməyən və ermənipərəst qüvvələr qısqanclıqdan Bakıda keçiriləcək final matçının əhəmiyyətini, ölkəyə turist axının qarşısını almaq   məqsədi ilə  ən müxtəlif səviyyələrdə qarayaxma kampaniyasını həyata keçirirlər. Bununla da idmanı siyasətin qurbanına çevirilər. İdmanı siyasətə qurban vermək olmaz. Bu yanlış düşüncədir,”- C.Osmanov bildirib.

Deputat qeyd edib ki, təsəvvür edin Azərbaycan ən yüksək səviyyədə İngiltərənin “Arsenal” komandasında oynayan milliyətcə erməni Henrix  Mxitaryanın təhlükəsizliyi ilə bağlı heç bir sorunun olmadığının, təhlükəsizliyinin ən yüksək səviyyədə təmin olunacağı bildirsə də, son anda erməni lobbisinin təsiri ilə o, Bakıda keçiriləcək oyunda iştirakdan imtina edir: “Baxmayaraq ki, Ermənistanla münasibətlərin ən kəskin dövründə belə erməni millətindən olan insanlar Azərbaycana səfər edib, buradakı müxtəlif yarışlarda və toplantılarda iştirak ediblər. Onlara həmin zaman bir söz deyilmədiyi halda bu gün Mxitaryandan bir alət kimi istifadə edib, Azərbaycanı gözdən salma halı qarayxma kampaniyasının tərkib hissəsidir. Bu yolla Azərbaycana təzyiq etmək istəyirlər. Bu yolla Azərbaycanın qısa zamanda əldə etdiyi uğurlara kölgə salmaq istəyirlər. Ancaq bu qüvvələrin niyyətləri baş tutumayacaq. Final matçı yüksək səviyyədə keçiriləcək və paytaxtımızım qonaqları da yüksək səviyyədə, Azərbaycan xalqına məxsus qonaqpərvərlik, istiqanlılıqla qarşılanıb yola salınacaq. Əksinə final matçı Azərbaycanın dünyadakı möhkəmlənən mövqeyinin daha da möhkəmlənməsinə və nüfuzunun artmasına ciddi təkan verəcək.Düşmənlərimizin məkrli niyyətləri ürəyində qalacaq”.

O əlavə edib ki, artıq Bakı asta-asta qonaqlarını qəbul etməkdədir. 

“Bu bir daha yüksək səviyyəli, nüfuzlu beynəlxalq idman yarışlarının, dünya və Avropa çempionatlarının Azərbaycana salınması, ölkəmizdə keçirilməsinə razılıq verilməsi Azərbaycana olan hörmətin, etibarın və etimadın nəticəsi, göstəricisidir. Bu, həm də Azərbaycanın gündən-günə beynəlxalq aləmdə, o cümlədən, dünya idman ictimaiyyəti arasında nüfuzunun, çəkisinin artmasının bariz nümunəsidir.

Azərbaycan bu cür beynəlxalq, yüksək səviyyəli idman yarışlarını çox uğurlu şəkildə təşkil etməklə, əslində, dünyaya öz sülhsevər mesajlarını çatdırır”.

Mürtəza
Ölkə.az