“Azərbaycanın dinamik inkişafı erməni lobbisini narahat edir\"

Bu fikirləri "Ölkə.Az"a açıqlamasında Milli Məclisin deputatı İlham Məmmədov bildirib. 

Deputat deyib ki, Qərbin bəzi dairələri və Avropa təsisatları tərəfindən sifariş xarakterli bu cür “sənədlər”in qəbul olunması dinamik inkişafa malik, dünyəvi müsəlman ölkəsi olan Azərbaycana qarşı gözügötürməzlikdən qaynaqlanır:

"Məlumdur ki, əvvəllər də Azərbaycana qarşı ayrı-ayrı vaxtlarda həyata keçirilən qarayaxma kampaniyaları Azərbaycan dövlətinin müstəqil xarici siyasət yürütməsi ilə bağlı olub. Azərbaycanın dinamik inkişafı erməni lobbisini və onun nəzarətində olan qüvvələri narahat edir. Azərbaycanın beynəlxalq aləmdəki nüfuzunun gündən-günə artmasının və gənc müstəqil dövlətimizin regionda söz sahibinə çevrilməsinin dünyadakı anti-Azərbaycan qüvvələri ciddi şəkildə narahat etdiyi danılmaz və təkzibedilməz faktdır. Şübhəsiz ki, bu “qətnamə”nin hazırlanmasında da erməni lobbisi, onun təsiri altında olan anti-Azərbaycan dairələr, o cümlədən insan haqlarının müdafiəsi adı altında fəaliyyət göstərən bəzi beynəlxalq təşkilatlar, QHT-lər yaxından iştirak ediblər. Onlar Azərbaycanın ünvanına heç bir əsası olmayan cəfəngiyatlar səsləndirməkdə davam edirlər. Elə bu səbəbdəndir ki, Avropa Parlamentinin qəbul etdiyi “qətnamə” barədə ilk məlumat məhz erməni mətbuatında işıqlandırılıb".

İ.Məmmədov qeyd edib ki, sözügedən qərarın qəbulunu ermənilər gözləyirdilər və bu məsələdə Avropa Parlamenti dəyirmanına su tökənlərin kim olduğu da artıq heç kimə sirr deyil:

"Bu baxımdan da Avropa Parlamentinin qəbul etdiyi “qətnamə”nin heç bir qüvvəsi yoxdur və zaman-zaman bəzi qüvvələrin Azərbaycan əleyhinə bu kimi alətlərdən istifadə etdiklərinin şahidi olmuşuq. Bu “qətnamə” gərəksiz kağız parçasından başqa bir şey deyil". 

Vasif Həsənli
Ölkə.Az