\"Azərbaycanın müstəqilliyinə gedən yolda heç bir əngəl yaratmamışam\"

Bu fikirləri "Ölkə.Az"a açıqlamasında Azərbaycanın sabiq prezidenti Ayaz Mütəllibov bildirib. 

A.Mütəllibov deyib ki, Müstəqillik Aktında imzası olan şəxslər dərin hörmətə layiq insanlardır: 

"Həmin dövrdə müstəqillik məsələsi könüllü idi. Heç kimlə məsləhətləşməmişdik. Oktyabrın 18-də müstəqilliyimizi elan etdiyimiz gün kimsə deyə bilməzdi ki, Sovet İttifaqı məhv olacaq. Heç kəsin də xəbəri yox idi ki, nə vaxtsa 3 müttəfiq respublika bir araya gəlib sənədə qol çəkəcək və SSRİ buraxılacaq. Biz o zaman böyük riskə getdik. Suverenliyin dolğun şəkildə təmin olunmasına nail olduq. Biz 1991-ci ilin əvvəlindən bu işə başlamışdıq. Həmin vaxt çox gərgin və təlatümlü dövr idi. Moskvanın özündə elə hadisələr baş vermişdi ki, hadisələri qiymətləndirəndə, görürsən ki, vəziyyət qarışıq idi. Həmin vaxt Ali Sovetin sədri, rəhmətlik Elmira Qafarova ilə söhbət edəndə, dedik ki, artıq müstəqilliyimizi elan etməyin zamanıdır. Həmin dəqiqədən sonra Ali Sovetin tərkibində olan qurumlar, təşkilatlar layihə hazırlamağa başladılar. Ali Sovetin binasında Müstəqillik Aktına imza atdıq. Sovet hakimiyyəti buna görə bizə təzyiq göstərə bilmədi”.

Ayaz Mütəllibov əlavə edib ki, Azərbaycanın müstəqilliyinə gedən yolda o zamankı SSRİ hakimiyyəti daim tənqid olunurdu: 

“Mən hər zaman Azərbaycanın dövlət müstəqilliyini istəyən, buna can atan adam olmuşam. Bu tarixdir, bunu danmaq olmaz. Həmin dövrdə prezident mən idim, müstəqilliyə gedən yolda bir rəhbər kimi heç bir əngəl yaratmadım. Həmin vaxt konfederativ respublika yaradılmasını təklif etdim. O zaman müstəqillik tam şəkildə müttəfiq respublikalara keçəcəkdi. Müstəqilliyimiz tam və dolğun şəkildə formaşalacaqdı. İqtisadi məsələlərdə həlledici rol oynayacaqdıq. Suveren dövlət olacaqdıq. Qorbaçov gözünü mənə zilləyərək qulaq asırdı. Təhlükəsizlik və xarici siyasət məsələsinə gəldikdə, bu, mərkəzdən idarə olunacaqdı. Yerdə qalan məsələlər bizim tabeliyimizdə olacaqdı. Bu məsələlər gizli deyil və müstəqilliyimiz birdən-birə meydana gəlməyib. 1990-cı ilin sonu, 1991-ci ilin axırına kimi sürətlə bu məsələləri müzakirə edirdik. Sadəcə, siyasi iradə nümayiş etdirərək bu təklifi verdim. Bilirdim ki, buna gedilməyəcək. Bunlar tarixi məsələlərdir".

Vasif Həsənli
Ölkə.Az