Azərbaycanın sosial-iqtisadi inkişafı dövlət proqramına xarici neft şirkəti də qoşuldu

“Salyan Oil Ltd.” Şirkətinin böyük meneceri T.Yolçuyev “Ölkə.Az”-a açıqlamasında deyib ki, təmsil etdiyi şirkətin guya Şirvan dövlət qoruğuna və rayonun təbiətinə ziyan vurması barədə yayılan xəbərlər həqiqəti əks etdirmir.

“Əksinə, bir neçə il öncə Salyan və Neftçala rayonlarının ərazisində yerləşən Şirvan Dövlət Təbiət Qoruğunda flora və faunanın yaxşılaşdırılması məqsədilə 14 kilometr uzunluğunda olan su kanalı şirkətin maliyyə vəsaiti hesabına bərpa edilib. Yararsız vəziyyətə düşmüş su kanalının bərpası 2002-ci ildə Hasilatın Pay Bölgüsü sazişləri əsasında Azərbaycan Respublikası Dövlət Neft Şirkəti (SOCAR) ilə Çin Milli Neft Şirkəti (CNPC) arasında bağlanan müqavilənin şərtlərinə uyğun olaraq silsilə tədbirlər çərçivəsində həyata keçirilib. Eyni zamanda Azərbaycan və Çinin maraqlarını təmsil edən “Salyan Oil Ltd.” əməliyyat şirkəti tərəfindən Şirvan Dövlət Təbiət Qoruğunda yeni elektrik xətlərinin və su nasoslarının quraşdırılması işinə böyük həcmdə maliyyə dəstəyi göstərilib”.

Şirkət rəsmisi həmçinin qeyd edib ki, “Salyan Oil Ltd.” əməliyyat şirkəti Salyan rayonunda mərkəzi parkın abadlaşması, mərkəzı rayon idman kompleksinin inşası, Kürsəngi kənd orta məktəbinin əsaslı təmiri, Kolanı kənd ibtidai məktəbın inşası, Kürsəngi bələdiyyə binasının inşası və bu yerlərdə “Novruz” milli bayram şənliklərinin keçirilməsinə də yaxından dəstək olub.

“Şirkətimiz rayondakı contrakt zonasında yaşayan az təmınatlı ailələrə Milli bayramlarda ərzaq yardımı göstərilməsi, Qarabağlı kənd mədəniyyət evinin tikintisi və rayonlararası Şorsulu əsəb dispanserinin əsaslı təmiri, Qarabağlı və Qırxçıraq kənd orta məktəblərinin inşası və ətraf mühitin qorunması mövzusunda çoxtirajlı kitabların nəşri, Kürsəngi ambulator klinika binasının inşası və II Varlı kənd məktəbinin tikilməsı, Kürsəngi – Qarabağlı yolunun təmiri, Qaraçala qəsəbə xəstəxanası binasının əsaslı təmiri və həmin qəsəbədə uşaq baxçasının inşasına da yaxından köməklik göstərib. Ümumiyyətlə, “Salyan Oil Ltd.” əməliyyat şirkəti Azərbaycanın Kürsəngi və Qarabağlı neft yataqlarında neft-qaz əməliyyatları apararaq müasir standartlara uyğun və ekoloji normalara ciddi riayət edərək, müvafiq saziş öhdəliklərini yerinə yetirir. Cənab Prezident İlham Əliyevin tapşırığı ilə rayonların sosial-iqtisadi inkişafı dövlət proqramına dəstək olmaq məqsədi ilə “Salyan Oil Ltd.” əməliyyat şirkəti tərəfindən həmişə uğurlu addımlar atılır.

T.Yolçiyev bildirib ki, sərmayəçi Çin şirkətləri ekologiyaya ciddi əhəmiyyət verərək, işlərini təhlükəsizlik texnikası qaydalarına uyğun həyata keçirir və bu işlər hər zaman nəzarət altında olur.

“Biz bu sahədə SOCAR-la daim əməkdaşlıq edirik. Bilirsiniz ki, “Salyan Oil Ltd.” quruda neft-qaz hasil edən ən qabaqcıl şirkətdir. Şirkət bu fəaliyyətində birinciliyi indiyədək qoruyub saxlayıb. Quruda neft-qaz hasil edən xarici şirkətlərlə müqayisədə Azərbaycan dövləti üçün ən sərfəli şərtlərlə çalışan “Salyan Oil Ltd.” təkcə yüksək hasilat göstəriciliyi ilə deyil, həm də ekoloji, sosial, təhsil, idman və tibb sahələri üçün Salyan rayonunda yuxarıda adları çəkilən bir çox layihələr həyata keçirib. Ekoloji vəziyyətin qorunması sahəsində şirkət vaxtaşırı olaraq Ekologiya və Təbii Sərvətlər Nazirliyi və SOCAR-ın müvafiq idarələri ilə də sıx əməkdaşlıq edir. Məhz “Salyan Oil Ltd.” şirkəti uğurlu işlərinə görədir ki, 2 dəfə “Uğur”mükafatına layiq görülüb, dəfələrlə dövlət orqanlarının layiqli tərifinə nail olub”.

Böyük menecer vurğulayıb ki, “Salyan Oil Ltd.” şirkətinə 2 il öncə təyin olunmuş yeni Baş Menecer Şan Liancenqin daha müasir yanaşma ilə idarəciliyə başlaması layihənin səmərəliliyini daha da artırıb. Nəticədə tərəflərlə işin gələcəkdə də belə templə inkişaf etdirilməsinə böyük ümidlər yaranıb”.
 
Vasif Həsənli
Ölkə.Az