“Azərbaycanın yaradılmasında Rusiyanın böyük rolu var” — Arif Rəhimzadədən ŞOK MÜSAHİBƏ

“Azərbaycanın yaradılmasında Rusiyanın böyük rolu var”
15:11
16.06.2017
693
Siyasət
A

Milli Məclisin deputatı, eyni zamanda MM regional məsələlər komitəsinin sədri, Yeni Azərbaycan Partiyası Siyasi Şurasının və İdarə Heyətinin üzvü, keçmiş dövlət müşaviri Arif Rəhimzadə “Ölkə.Az” xəbər portalına müsahibə verib. Həmin müsahibəni oxuculara təqdim edirik:

“Ümumrusiya Azərbaycan Konqresinin bağlanmasında Rusiya dövlətinin təqsiri yoxdur”

– Ümumrusiya Azərbaycan Konqresinin birdəfəlik bağlanılması ilə bağlı fikirlər səsləndirilir. Bu məsələ ilə bağlı vəziyyət necədir? 

– Ümumrusiya Azərbaycan Konqresinin bağlanması həmin təşkilatın öz təqsiri üzündən olub. Burada Rusiyanın ciddi təqsirini görmürəm. Rusiya dövləti Ümumrusiya Azərbaycan Konqresinə bir neçə dəfə xəbərdarlıq edib ki, lazım olan sənədləri qaydasına salsın. Ancaq Konqres deyilənlərin heç birini etməyib. Belə bir halda Rusiya nə etməli idi? Bu addım Rusiyanın normal dövlətçilik tədbiridir. Ona görə də Azərbaycan-Rusiya münasibətləri heç zaman pisləşə bilməz. Bizi birləşdirən daha böyük və qlobal məsələlər var. Təbii ki, biz istəməzdik ki, belə bir hal da olsun. Ancaq Ümumrusiya Azərbaycan Konqresinin bağlanması Rusiya-Azərbaycan münasibətlərinə xələl gətirən məsələ deyil. Mən şəxsən belə hesab edirəm. 

“Rusiyada yaşayan azərbaycanlıların təşkilatına çox barmaq edə bilmərik”

– Bəs bu məsələ baş verən ərəfədə Milli Məclisdə etiraz çıxışları olmuşdu, Azərbaycanın bir çox rəsmi və tanınmış şəxsləri bu qərara görə Rusiyaya etiraz etmişdi. Ancaq onlar heç də sizin kimi düşünmürdülər...

– Bilirsiniz, elə dərindən düşünəndə Ümumrusiya Azərbaycan Konqresi həmin ölkənin ərazisində yaşayan azərbaycanlıların təşkilatıdır. Biz onlara çox barmaq edə bilmərik. Rusiyada yaşayan azərbaycanlılara nəzarət etmək, onlara hər hansı göstərişlər vemək heç bizim işimiz də deyil. Azərbaycanda da rusların diaspor təşkilatı mövcuddur. Görün, Rusiya həmin təşkilatın fəaliyyətinə qarışır? Bura adam qoyub, adam çıxarırmı? Onların fəaliyyətinə nəzarət edirmi? Təbii ki, xeyr! Əgər Rusiya bunu edirsə, bizim də işimiz ondan ibarət olmalıdır ki, biz Rusiyadakı azərbaycanlıların problemlərinə müəyyən köməklik göstərək. Yəni, çalışmalıyıq ki, Rusiyada olan soydaşlarımızın başı ağrımasın, rifahları və dolanışıqları yaxşı olsun. Bizim fəaliyyətimiz yalnız bu cür olmalıdır. İndi bu məsələyə görə Rusiya əleyhinə sərt çıxış edənləri başa düşə bilmirəm. Axı onlar nə düşünür? Düşünürlər ki, Ümumrusiya Azərbaycan Konqresi sırf Azərbaycan təşkilatıdır? Axı bu bizim dövlətin təşkilatı deyil! Bu, bizim xalqın, Azərbaycandan gedən insanların, ancaq Rusiya dövlətinin təşkilatıdır. Ümumrusiya Azərbaycan Konqresində təmsil olunanlar arasında təkcə azərbaycanlılar deyil. Onların arasında rusu və digər millətlərdən olanları da var. 

“Sovet İttifaqı illərində özümüzü azərbaycanlı hesab etmirdik”

– Azərbaycanda rus dili tədrisinin ləğv olunması ilə bağlı müəyyən çağırışlar var. Bu barədə siz necə düşünürsünüz? 

– Bu cür çağırışlar tamamilə əsassızdır. Bu cür düşüncələrin heç bir əsası yoxdur. Biz rus dilinə Rusiyanın xoşuna gəlmək üçün icazə vermirik. Yaxud da buna görə Rusiya bizə nə isə üstünlük versin! Rusiya, rus dili, elmi və mədəniyyəti bizə lazımdır. Çünki biz ruslarla tarixən əlaqədə olmuşuq. Rus dilindən də imtina edək və təcrid olunmuş vəziyyətdə qalaq, o zaman biz dünyaya hansı dillə çıxacağıq? Biz bir məsələni anlamalıyıq ki, Azərbaycan xalqının və dövlətinin formalaşmasında Rus İmperiyasının, Sovet İttifaqının, Rusiyanın böyük rolu olub. Doğrudur, müəyyən zamanlarda Rusiyada Azərbaycana qarşı qısqanclıq olub. Bunu heç kəs də inkar etmir. Ancaq Azərbaycanda və müsəlman Şərqində ilk demokratik və müstəqil ölkənin yaradılmasında Rusiyanın böyük rolu var. 1918-ci ildə Cənubi Azərbaycanda da demokratik respublika yaradaydılar da, bəs nə üçün yarada bilmədilər? Deməli, 1918-ci ildə Azərbaycan Xalq Cümhuriyyətinin yaradılması da məhz Rusiyanın təsiri nəticəsində mümkün olub. Buna rəhbərlik edənlər Rusiyada təhsil almış insanlar idi. Gəlin etiraf edək də! Sovet İttifaqının ilk illərində biz özümüzü azərbaycanlı hesab etmirdik. Bir zamanlar özümüzü müsəlman, sonra isə türk adlandırırdıq. Ancaq biz Azərbaycan xalqıyıq. Xalq kimi formalaşmağımızda da Sovet İttifaqının müsbət rolu vardır. Yəni, demək istəyirəm ki, ruslardan bizə qarşı qəddarlıq  və digər xoşagəlməz hallar olsa da, ancaq bununla yanaşı müsbət cəhətləri də olub. Biz rus dilini ona görə yaymırıq ki, Rusiyanın xoşuna gələk. Bu, ilk növbədə bizim özümüzə lazımdır. Çünki biz indiyədək rus dili vasitəsilə Avropa və dünyaya çıxmışıq. Bəlkə də gələcəkdə hamımız rus dilini ingilis dili qədər bilsək, o zaman bu dilə ehtiyac olmaz. Ancaq indi rus dilini atıb ingilis və ya digər xarici dillərə üstünlük vermək doğru deyil.

Mən rus dilini ingilis dilindən o mənada üstün bilirəm ki, bu dili artıq Azərbaycan xalqı bilir. Ona görə də mən deyirəm ki, biz dünyaya daha çox rus dili vasitəsi ilə çıxmalıyıq. Təsəvvür edin ki, sabah rus dilini atıb, yerinə ingilis dilinə üstünlük verirsən. Bəs ingilis dilini öyrənmək və bununla dünyaya çıxmaq üçün nə qədər vaxt lazımdır? Bəs o zamana qədər nə edəcəksən? Hansı dillə dünyaya çıxacaqsan? 

“Rusiya çox istəyir ki, Azərbaycan onun maraqlarına uyğun hərəkət etsin”

– Rusiyanın Azərbaycana qarşı həyata keçirdiyi siyasət nəticəsində belə bir fikir formalaşıb: “Rusiya Azərbaycana ermənidən daha çox düşmənçilik edib”. Bu deyimlə razısınızmı? 

– Belə bir klassik fikir var ki, siyasətdə daimi dost yox, daimi maraqlar olur. Ona görə də Rusiyanın öz, Azərbaycanın isə öz maraqları var. Rusiyanın maraqlarını ermənilərin maraqları ilə heç müqayisə etmək olmaz. Çünki ermənilər bizi tamamilə məhv etmək və ərazilərimizi zəbt etmək istəyir. Ancaq Rusiyada belə ideyalar yoxdur. Əlbəttə ki, Rusiyanın Azərbaycanda maraqları var. Rusiya çox istəyir ki, Azərbaycan onun maraqlarına uyğun hərəkət etsin. Hətta, Rusiya heç zaman istəməz ki, biz neft-qaz ehtiyyatlarımızı müstəqil şəkildə dünyaya nəql edək. İstərdi ki, Azərbaycan neft-qazını Rusiyanın istəyi ilə nəql etsin. Bütün bu istəklərə baxmayaraq, ulu öndər Heydər Əliyevin və Prezident İlham Əliyevin uzaqgörən və balanslaşmış siyasəti nəticəsində bu problemin həllinə də nail olmuşuq. Bu gün Rusiyanın Azərbaycanda maraqları olduğu kimi, bizim də bu ölkədə öz maraqlarımız var. Rusiya böyük və qonşu dövlətdir. Ona görə də biz Rusiyanın maraqlarını müəyyən qədər nəzərə almalıyıq. Çalımalıyıq ki, Rusiya-Azərbaycan münasibətlərinə xələl gəlməsin.    

– Bu günlərdə Rusiyanın təhsil və elm naziri Olqa Vasilyeva MDB məkanında vahid kiril əlifbasına keçməklə bağlı çağırış edib. Bu təklifi Rusiyanın imperiya iddialarının artırması kimi başa düşmək olarmı?

– Hesab edirəm ki, Azərbaycanda buna ehtiyac yoxdur. Deyə bilmərəm, bəlkə buna digər MDB ölkələrində ehtiyac var, ancaq Azərbaycanda bu lazım deyil. Azərbaycan dili var və inkişaf edir. Türk dilləri içərisində ən inkişaf etmiş dil Azərbaycan dilidir. Bu dil daha da inkişaf etməlidir. 

Vasif Həsənli
Ölkə.Az

ŞƏRH YAZ
0

Kolinda Qrabar-Kitaroviçdən İlham Əliyevə təbrik

Kolinda Qrabar-Kitaroviçdən İlham Əliyevə təbrik
20:39
19.04.2018
1302
Siyasət
A
Xorvatiya Respublikasının Prezidenti Kolinda Qrabar-Kitaroviç Prezident İlham Əliyevi təbrik edib.

"Ölkə.Az" xəbər verir ki, təbrik məktubunda deyilir:

Hörmətli cənab Prezident.

Yenidən Azərbaycan Respublikasının Prezidenti seçilməyiniz münasibətilə Sizi Xorvatiya Respublikasının vətəndaşları adından və şəxsən öz adımdan ürəkdən təbrik edirəm.

Xorvatiya Respublikası ölkələrimiz arasında xalqlarımızın getdikcə daha çox müxtəlif sahələrdəki ortaq maraqlarına xidmət edən tərəfdaşlığı və dost münasibətlərini yüksək qiymətləndirir. İnanıram ki, prezidentliyinizin yeni dönəmində də ölkələrimiz üçün xüsusilə böyük əməkdaşlıq potensialına malik olan və hər iki dövlət üçün mühüm əhəmiyyət kəsb edən iqtisadi və enerji sahələrində sıx münasibətlərimiz davam edəcək. Əminəm ki, Xorvatiya və Azərbaycan şirkətləri arasında əməkdaşlığı genişləndirmək üçün hər iki tərəfdə sərmayə qoyuluşuna maraq oyatmaq xüsusilə çox əhəmiyyətlidir.

Xorvatiya Respublikasına planlaşdırdığınız səfəriniz zamanı Sizinlə görüşməyi səbirsizliklə gözləyirəm və inanıram ki, bu görüşümüz həm ölkələrimiz, həm də vətəndaşlarımız arasında mövcud olan dostluq və konstruktiv əməkdaşlıq münasibətlərinin bundan sonra da inkişaf etməsinə təkan verəcək.

Cənab Prezident, Sizə ən səmimi salamlarımı və ən yüksək ehramımı çatdırıram.

Ölkə.Az

 

ŞƏRH YAZ
0

Misirin dövlət başçısı və Mərakeşin Kralı İlham Əliyevi təbrik etdi

Misirin dövlət başçısı və Mərakeşin Kralı İlham Əliyevi təbrik etdi
20:26
19.04.2018
738
Siyasət
A
Misir Ərəb Respublikasının Prezidenti Əbdülfəttah əs-Sisi Azərbaycan Respublikasının Prezidenti İlham Əliyevə təbrik məktubu ünvanlayıb.

"Ölkə.Az"ın xəbərinə görə, təbrik mətnində deyilir:

"Zati-aliləri.

Prezident seçkilərində qələbəniz və dövlət başçısı səlahiyyətlərini yenidən icra etməyiniz münasibətilə Sizə ən səmimi təbriklərimi çatdırmaqdan böyük sevinc hissi duyur, dost xalqınızın ümid və istəklərini yerinə yetirmək istiqamətində şərəfli yolunuzun davamında uğurlar arzulayıram.

Sözsüz ki, seçkilərdə yüksək səs çoxluğu ilə qələbəniz xalqınızın Sizin müdrik rəhbərliyinizlə əldə etdiyi uğurları davam etdirmək əzminin əyani sübutudur.

Cənab Prezident, bu xoş fürsətdən istifadə edərək, dost ölkələrimiz və xalqlarımız üçün firavanlıq və rifaha yeni üfüqlər açan bütün sahələrdə qarşılıqlı əməkdaşlıq yollarının inkişafının əhəmiyyətini vurğulamaq istərdim.

Sizə möhkəm cansağlığı və xoşbəxtlik diləyir, Azərbaycan xalqına isə davamlı tərəqqi və rifah arzulayıram".

Bundan başqa, Mərakeşin Kralı Əlahəzrət VI Məhəmməd də Azərbaycan Respublikasının Prezidenti İlham Əliyevə təbrik məktubu ünvanlayıb. Məktubda deyilir:

"Hörmətli Prezident, Əziz Qardaşım.

Yenidən Azərbaycan Respublikasının Prezidenti seçilməyiniz münasibətilə Sizə ən səmimi təbriklərimi çatdırmaqdan böyük məmnunluq hissi duyuram. Ali dövləti vəzifənizdə uğurlarınızın davamlı olmasını, qardaş Azərbaycan xalqının maraqları naminə və ölkənizi bundan sonra da tərəqqiyə doğru aparmaq fəaliyyətinizdə Sizə yeni-yeni nailiyyətlər arzulayıram.

Azərbaycan xalqı Sizə yenidən etimad göstərərək Zati-alinizin müdrik dövlət xadimi kimi keyfiyyətlərini, eləcə də Azərbaycanın hərtərəfli və davamlı inkişafı istiqamətində apardığınız əzmkar və yorulmaz fəaliyyətinizi çox yüksək qiymətləndirdiyini nümayiş etdirdi.

Ölkələrimiz arasında səmərəli və dinamik inkişaf edən əməkdaşlıq münasibətlərinin indiki səviyyəsindən məmnunluq duyuram.

Zati-aliləri, ölkələrimiz arasında bütün sahələrdə əməkdaşlığı möhkəmləndirmək istiqamətində Sizinlə işləməyə davam etmək istərdim. Bu isə xalqlarımızın maraqlarına xidmət etməyin və onların arasındakı qardaşlıq əlaqələrinin təcəssümüdür".

Ölkə.Az

ŞƏRH YAZ
0
BAĞLA