Azərbaycanla Macarıstan arasında mədəniyyət sahəsində əməkdaşlıq proqramı imzalanıb — FOTO

Azərbaycanla Macarıstan arasında mədəniyyət sahəsində əməkdaşlıq proqramı imzalanıb
01:20
28.04.2019
2605
Mədəniyyət
A
Aprelin 24-də Azərbaycan Respublikası mədəniyyət nazirinin birinci müavini Vaqif Əliyevin rəhbərlik etdiyi nümayəndə heyəti ilə Macarıstan İnsan Resursları Nazirliyinin Beynəlxalq məsələlər üzrə Dövlət Katibi xanım Orsolya Paçay-Tomaşiç arasında görüş keçirilib.


"Ölkə.Az" azərtac-a istinadən xəbər verir ki, Azərbaycan Milli Kitabxanasından bildirilib ki, nazir müavini Vaqif Əliyevin Macarıstana 3 günlük səfəri çərçivəsində reallaşan görüşdə tərəflər humanitar sahədə əməkdaşlığın geniş spektrini müzakirə edib və mədəniyyət sahəsində əməkdaşlıq proqramı imzalayıblar.

Görüş zamanı xanım Orsolya Paçay-Tomaşiç Azərbaycan nümayəndə heyətini salamlayaraq, təmsil etdiyi nazirliyin fəaliyyət istiqamətləri barədə məlumat verib. Dövlət katibi İnsan Resursları Nazirliyinin mədəniyyət, təhsil, sosial məsələlər, gənclər, idman sahələrini əhatə etməklə Macarıstanın ən böyük nazirliyi olduğunu bildirib. Macarıstan rəsmisi Azərbaycan nümayəndə heyəti ilə görüşün sadalanan sahələr üzrə aktual məsələlərin müzakirəsi baxımından səmərəli olacağına əminliyini bildirib, imzalanması nəzərdə tutulan əməkdaşlıq proqramının mədəniyyət sahəsində əlaqələrin daha da dərinləşdirilməsi üçün vacib bir yol xəritəsi olacağını söyləyib. Hazırda Macarıstanın təqdim etdiyi təqaüd proqramı çərçivəsində 600-dən çox Azərbaycanlı tələbənin bu ölkədə təhsil aldığını deyən Dövlət katibi bu gənclərin təhsillərini başa vurduqdan sonra iki ölkə arasında əlaqələrin inkişafına öz töhfələrini verəcəklərinə inamını ifadə edib.

Macarıstanla türkdilli dövlətlər arasında münasibətlərə toxunan Dövlət katibi hazırda ölkəsinin istər ikitərəfli əsasda, istərsə də Türkdilli Dövlətlərin Əməkdaşlıq Təşkilatı, TÜRKSOY, TÜRKPA kimi təşkilatlar çərçivəsində bu dövlətlərlə əməkdaşlığın daha da genişləndirilməsində maraqlı olduğunu qeyd edib.

Mədəniyyət nazirinin birinci müavini Vaqif Əliyev öz növbəsində səmimi qəbul üçün Macarıstan tərəfinə minnətdarlığını ifadə edərək, iki ölkə arşında təşəkkül tapmış strateji tərəfdaşlıq və dostluq münasibətlərindən məmnunluğunu ifadə edib. Nazir müavini görüş zamanı baş tutan fikir mübadiləsinin iki ölkə arasında humanitar sahədə əlaqələrin inkişafına töhfə verə biləcəyinə ümidvar olduğunu qeyd edərək, bu istiqamətdə hər iki tərəfdən nümayiş etdirilən xoş məramın xüsusi əhəmiyyət kəsb etdiyini bildirib: “Hazırda hər iki ölkənin bir sıra böyük mədəniyyət müəssisələri arasında, o cümlədən direktoru bu gün görüşdə iştirak edən Azərbaycan Milli Kitabxanası ilə Macarıstan Milli Kitabxanası arasında memorandum mövcuddur və bu sahədə müəyyən işlər görülür, ancaq bu gün imzalanacaq proqram sənədi dövlət səviyyəsində bu əlaqələrin daha da səmərəli təşkilinə yönələcəkdir”.

Əməkdaşlığın genişləndirilməsində qarşılıqlı səfərlərin vacibliyinə diqqət çəkən Vaqif Əliyev xanım Orsolya Paçay-Tomaşiçi Azərbaycana səfərə dəvət edib.

Görüş əsnasında, həmçinin son dövrlər Azərbaycanda gedən hərtərəfli inkişaf prosesləri barədə qarşı tərəfi məlumatlandıran Vaqif Əliyev məhz bunun nəticəsində Azərbaycanda çoxsaylı millətlərin nümayəndələrinin sülh və əmin-amanlıq şəraitində, sabitlik mühitində yaşadıqlarını qeyd edib. Ölkəmizin son illər bir çox beynəlxalq əhəmiyyətli mədəni və idman tədbirlərinə ev sahibliyi etdiyini deyən nazir müavini Azərbaycanın dünyada multikulturalizm adasına çevrildiyini bildirib.

Sonra tərəflər “Azərbaycan Respublikası Mədəniyyət Nazirliyi ilə Macarıstan İnsan Resursları Nazirliyi arasında mədəniyyət sahəsində əməkdaşlıq Proqramı”nı imzalayıblar.

Görüşdə Azərbaycanın Macarıstandakı səfiri Vilayət Quliyev və Azərbaycan Milli Kitabxanasının direktoru Kərim Tahirov iştirak ediblər.

Ölkə.Az

ŞƏRH YAZ
0

İsveçrəli məktəblilərə Azərbaycan rəqsləri öyrədilir

İsveçrəli məktəblilərə Azərbaycan rəqsləri öyrədilir
22:10
23.07.2019
289
Mədəniyyət
A
İsveçrədə yaşayan soydaşlarımız bu ölkənin ictimai və mədəni həyatında həyata keçirilən inteqrasiya səciyyəli tədbir və layihələrdə fəal iştirak etməyə çalışırlar. Bu layihələrdən biri də miqrantların mədəniyyətinin təbliğ olunması ilə bağlıdır.

“Ölkə.Az” Diasporla İş üzrə Dövlət Komitəsinə istinadən xəbər verir ki, artıq 3 ildir Aargau bölgəsinin Miqrasiya və İnteqrasiya Departamentinin maliyyə dəstəyi ilə həyata keçirilən layihə məktəblərdə təqdim olunur.

Layihənin rəhbəri İsveçrədəki Azərbaycan Mədəniyyət Mərkəzinin rəhbəri Qasım Nəsirovdur.

Q.Nəsirov bildirib ki, əsas məqsəd məktəbliləri ölkədəki miqrantların mədəniyyətləri ilə tanış etmək, onlara inteqrasiya barədə məlumat verməkdir. Layihə çərçivəsində məktəblilərə Azərbaycan rəqsləri də öyrədilir. Bunun üçün “Qarabağ” Azərbaycan məktəbinin müəllimi Gülnarə Axundova layihədə iştirak etməyə dəvət edilib. Üç ildir ki, G.Axundova isveçrəli uşaqlara milli rəqslərimizi öyrədir.

Qeyd edək ki, bu yaxınlarda Aargauda 16 yaşlı 100 məktəblinin iştirakı ilə təqdim olunan Azərbaycan rəqsləri böyük maraqla qarşılanıb.

Ölkə.Az

ŞƏRH YAZ
0

Dar cığırla hər gün çığırışa-çığırışa məktəbə gedib-gələrdik — Arif Babayevin AĞDAM XATİRƏLƏRİ

Dar cığırla hər gün çığırışa-çığırışa məktəbə gedib-gələrdik
15:40
23.07.2019
855
Mədəniyyət
A
“Mən and içmişəm, torpaqlarımız düşmən tapdağından azad olunan gün dizlərimi yerə qoyub, dizin-dizin Qarabağa, qapıma gedəcəyəm”.

Bu sözləri Xalq artisti Arif Babayev “Ölkə.Az”a Ağdam haqqında danışarkən bildirib. 

Xalq artisti deyib ki, geridə qalan 26 il onun üçün çox ağır keçib:

"Həmişə ümid etmişəm ki, Qarabağ qayıdacaq. Millətimiz şad- xürrəm o torpaqlara dönəcək. İnşallah, o ümidlə də yaşayırıq. Qarabağ yaralı yerimizdir. Qarabağ bütün millətin vətənidir. Təkcə mənim, onun deyil, hamının vətənidir. Ağdam mənim üçün də çox əziz yerdir. Böyüyüb başa çatdığım torpaqdı. Onun nisgili mənim hər zaman ürəyimdədir".

Ustad sənətkar artisti münaqişənin tezliklə həllini tapacağına ümid etdiyini dilə gətirib:

"Bizim güclü ordumuz  var, gecə-gündüz çalışan Prezidentimiz, Birinci vitse prezidentimiz - Mehriban xanımımız var. İnanıram ki, onların müdrik siyasəti sayəsində münaqişə tezliklə həllini tapacaq. Biz yenə öz torpaqlarımıza sahib olacağıq.  Əlavə qüvvələr mane olmasa, biz daha da irəli gedəcəyik. Görürsünüz ki, dost dediklərimiz birdə görürsən düşmən çıxır”. 

Əməkdaşımızın “Ağdamlı günlərinizi yada salıb, kövrəlirsiniz?”-sualına xalq artisti kövrələrək cavab verib:

“Vallah elə kövrəlirəm, elə kövrəlirəm, heç təsəvvür edə bilməzsiniz. O torpaqda doğulasan, böyüyəsən –indi gedib görə bilmirəm, o doğma yerlərimə həsrət qalmışam. Tez-tez uşaqlıq illərimi yada salıram, arada cavanlıq illərim gözümün qarşısına gəlir. O üzümlük bağları, bağçamızın ağacları - hamısını xatırlayıram. Xəyallarımda bir-bir ağacları sayıram, deyirəm, bax, orada armud ağacı vardı, hasarın dibindəki heyva agacı görəsən bar verir? Hər gün dar cığırla çığırışa-çığırışa məktəbə gedib-gələrdik. Düşünürəm, görəsən o yerlər necə oldu? Ağdamın hər yeri, nöqtəsinə kimi yadımdadı.  Mən yuxularımda, xəyallarımda hər gün  Ağdama qayıdıram.

Bir dəfə mənə o torpaqların videosunu göstərdilər, iki mərtəbəli evimiz vardı, darmadağın edilmişdi. Evdi, həyətdi bunlar boş şeylərdi mənim üçün, əsas torpaqlarımız qayıtsın. Torpaq hər şeydən əzizdir. Deyirlər “Ana qucağı hər şeydən əzizdir” mən deyırəm ki, torpaq hamısından əzizdir”.

Xatırladaq ki, Ağdam 1992 ci il 23 iyulda ermənilər tərəfindən işğal olunub.

Vüsalə Balayeva
Ölkə.Az

ŞƏRH YAZ
0
BAĞLA