Azərbaycanlı aktyor: "Məni otağa salıb 38 qapaz vurdular"
Yeni ildə təqdim olunacaq filmlərdən biri də "3 badam 1 qoz" filmidir.
Ölkə.Az xəbər verir ki, gənc aktyorlar güclərini birləşdirərək yeni film ərsəyə gətiriblər. Sosial şəbəkələrdə minlərlə izləyiciləri olan gənc aktyorlar "3 badam 1 qoz" filmi haqqında saytımıza danışıblar.
Filmin baş qəhrəmanlarından biri olan Altun Mətləboğlu bildirib ki, bu onların ilk işidir: "Bu ilk böyük işimizdir. Rəsulla ağlımıza belə bir şey gəldi və Sabirlə Mənsur ilə də bunu bölüşdük. Hamımızın ağlına batdı. 2 ildir vayn çəkirik. Və bu sahədə yetəri qədər uğur qazandıq. İzləyicilərimiz də bizdən film istədi, biz də bu istəyə əməl etdik. Film çox maraqlıdır. Sizi darıxdırmayacaq. Gülməkdən öləcəksiniz sözünün haqqını verəcək bir filmdir. Gözləntilərim çoxdur. Azərbaycanda kommersiya filmləri arasında rekord vuracağına inanıram. Filmdəki rolum da çox maraqlıdır. Hətta filmdə məni otağa salıb 38 dənə şapalaq vururlar. Bir-bir saymışam. (gülür) Bir şeyi də vurğulayım ki, bir neçə həftə öncə Murat Boz Bakıya gəlmişdi. Və bizim millət onu böyük ajiotajla qarşıladı. Sizdən xahiş edirəm ki, bizi onların yanında gözdən salmayın. Normaldır belə fanatlıq etməyiniz. Amma Murat Boza 10 qat ajiotaj yaradırsınızsa, bizə 15 yaradın. Bizim onlardan nəyimiz əksikdir?! Yaxşı, bizi kənara qoyun, başqa sənətçilərimizə göstərin o dəstəyi. Onlar da görsünlər ki, özümüzü aşağı səviyyəyə endirmirik. Sonda hər birinizi yanvarın 12-i Nizami kino mərkəzində "3 badam 1 qoz"un qala gecəsinə dəvət edirəm. Qala gecəsində iştirak edə bilməyənlər ayın 13-ündən bütün kinoteatrlarda filmi izləyə bilərlər".
Aktyor Rəsul Abbasov da Altunun fikrlərinə qatıldığını bildirib: "2 ilə yaxındır vayn çəkirik. Heç vaxt düşünməzdim ki, nə zamansa film çəkəcəyik. Şükürlər olsun ki, izləyicilərimiz və dostlarımız bizi bu işə inandırdılar və dəstək göstərdilər. Biz bu işə maddi tərəfdən baxmırıq. Sırf iş olaraq görürük. Bu iş bizim zövqümüzü oxşuyur. Ümid edirik ki, tamaşaçılar gəlib filmə lazımı qiyməti verəcəklər. İnanırıq ki, hər bir şey ürəyimizcə olacaq. Film işinin ağırlığını bildiyimiz üçün bu işə canımızı qoymuşuq. İnşallah uğur əldə etdikdən sonra tamaşaçıları çox yeniliklər gözləyir. Bizimlə yanaşı digər yeni film çəkən komandalara da uğurlar arzu edirəm. Bu filmimiz uğurlu olandan sonra sizi yeni layihələr gözləyir. Bu sahə üzrə irəliləmək niyyətindəyik. Qala gecəsi 3 gün sonra Nizami kino mərkəzində olacaq. Qala gecəsindən dərhal sonra kinoteatrlarda filmi izləyə bilərsiniz".
"3 badam 1 qoz" filminin informasiya dəstəyi Ölkə.Az saytına məxsusdur.
Niyam Şirinov
Fotolar: Nurlan Gülməmmədov
