Azərbaycanlı alim İstanbul universitetində türk mifologiya və folklorundan dərs deyəcək

"Ölkə.Az" xəbər verir ki, "Mövlanə mübadilə proqramı" çərçivəsində baş tutan layihə çərçivəsində azərbaycanlı alim nüfuzlu İstanbul Universitetində ümumi, eyni zamanda türk mifologiyası və folklorundan dərs verəcək.

Türk və Azərbaycan universitetləri arasında 2017-ci ildə elan edilən mübadilə proqramı həm tələbələri, həm də müəllimləri əhatə edir. Proqrama müraciət edən Yeganə İsmayılovaya 6 ay müddətində dərs vermək təklif edilsə də, alim işlərinin çoxluğundan və bir neçə kitab üzərində işlədiyi üçün 15 gün dərs verəcəyini bildirib. Proqramda müəllimlərə 1 ay, 3 ay və 6 ay dərs vermək təklif edilir.

Bakı dövlət universitetinin filologiya fakultəsinin müəllimi, filologiya elmləri doktoru, professor Yeganə İsmayılova hazırda iki kitab üzərində işləyir.

Qeyd edək ki, Yeganə İsmayılova "Mövlanə mübadilə proqramı" çərçivəsində Türkiyə universitetində Bakı Dövlət Universitetini filologiya sahəsində təmsil edəcək yeganə alimdir.

Hikmət Həsənov
Ölkə.Az