"Azərbaycanlı turistlər Gürcüstana daha çox bir-birinin bəhsinə gedirlər" — Hadi Rəcəbli

11:43
06.12.2018
3700
Siyasət
A
Milli Məclisin Əmək və sosial siyasət komitəsinin sədri, deputat Hadi Rəcəbli Azərbaycanda yeni ulduz təsnifatlaşdırma sistemi tətbiq edildikdən sonra hotellərə gizli müştərilərin göndəriləcəyi ilə bağlı məsələyə münasibət bildirib.

Komitə sədri "Ölkə.Az"a açıqlamasında deyib ki, bu cür addımlar otellərdə keyfiyyətli xidmətin aparılmasına dəstək ola bilər:

"Əlbəttə ki, bu cür addımlar keyfiyyətli xidmətin aparılmasına yönəlib. Bu yaxşı haldır".

H.Rəcəbli Azərbaycanın bütün dövlət qurumlarının turizmin inkişafına dəstək olmağa çağırıb:

"Bütün dövlət strukturları turizmin inkişafına dəstək olmalıdır. Yalnız belə olan halda Azərbaycandakı otellər ayaqüstə dayana və inkişaf edə bilərlər. Nəticədə isə orada turistlərin sayı arta bilər. Misal üçün yay aylarında otellərdə 2-3 ay çoxsaylı turistlər olur, amma digər aylarda bu olmur. Nəticədə də otellər 2-3 ayda qazandığı vəsaiti ilboyu özünü saxlamaq üçün sərf edir. Bütün bu problemlərin aradan qaldırılması vacibdir. Əsas məqsəd də odur ki, Azərbaycanda turizm inkişaf etsin, əməktutumlu iş yerləri yaradılsın. Bu gün əməktutumlu iş yerləri iki sahədə var. Bunlardan biri kənd təsərrüfatı, digəri isə turizm sahəsidir. Əgər biz rayonlarda iş yerlərinin sayını artırmaq istəyiriksə, o zaman turizmi inkişaf etdirməliyik".

Deputat qeyd edib ki, dünyada turizmi inkişaf etdirmək üçün səmərəli və geniş yayılmış formalar var:

"Bu gün Türkiyədə turizm mərkəzləri sayılan Bodrumun, Antaliyanın necə inkişaf etdirilməsinin səbəbləri var. Vaxtilə bu bölgələrdə bütün deklarasiya məsələlərini ləğv ediblər, 5 illik vergi güzəştləri edilib, dövlət tərəfindən bütün kommunikasiyalar çəkilib. Nəticədə isə bu gün Bodrum və Antaliya öz özünü ayaqda saxlaya bilir. Təbii ki, buna oxşar hallar Azərbaycanda da var. Ancaq bunun daha da çox olmazı vacibdir. Bu gün Azərbaycan turizm ölkəsi kimi inkişaf edir. Möhtərəm Prezidentimiz daim deyir ki, iki və üç ulduzlu otellərin sayı artırılsın, ölkəmizdə turizm daha çox inkişaf etdirilsin və sairə. Ölkədaxili turizmi inkişaf etdirmək lazımdır. Bununla bağlı ardıcıl işlər görülməlidir, otellərin dəqiq uçotu aparılmalıdır".

Azərbaycan əhalisinin istirahət üçün daha çox qonşu Gürcüstana üstünlük verməsi məsələsinə də toxunan H.Rəcəbli hazırda bu sahədə vəziyyətin dəyişdiyini söyləyib:

"Hazırda vəziyyət elə deyil. Bu gün Azərbaycanda turizm sahəsində yüksək xidmət və dövlət tərəfindən qayğı var. Amma bizim adamlarda bəhs-bəhs var ki, filankəs Gürcüstana və ya Bodruma gedirsə, mən də ora gedirəm. Gürcüstana üstünlük verənlərin də çoxu belədir. Bu gün Azərbaycan otellərində dünya standartlarına uyğun olan şərait var. Bütövlükdə Azərbaycanda xidmətin səviyyəsi Gürcüstandan heç də pis deyil. Hər bir ölkədə yaxşı və pis xidmətlər olur. Bəzən biz Avropa ölkələrinə, Türkiyəyə gedirik, orada da otellərdə pis xidmətlər görürük. Bu cür aşağı səviyyəli xidmətlər başqa dövlətlərdəki otellərdə də olur. Bizim məqsədimiz odur ki, Azərbaycanda turizmin səviyyəsi daha da yüksək olsun. Bunun üçün şərait və baza var. Möhtərəm Prezidentimiz də turizmin inkişaf etdirilməsilə bağlı vacib qərarlar verir".

Vasif Həsənli
Ölkə.Az

ŞƏRH YAZ
1

“Narkotik vasitələrin qanunsuz dövriyyəsinə qarşı mübarizəyə dair Dövlət Proqramı” qəbul edilib

“Narkotik vasitələrin qanunsuz dövriyyəsinə qarşı mübarizəyə dair Dövlət Proqramı” qəbul edilib
22:42
Bu gün
406
Siyasət
A
Azərbaycan Respublikasının Prezidenti İlham Əliyev “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019–2024-cü illər üçün Dövlət Proqramı”nın təsdiq edilməsi barədə sərəncam imzalayıb.

"Ölkə.Az" bildirir ki, sərəncama əsasən, “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019–2024-cü illər üçün Dövlət Proqramı” təsdiq edilib.

Bu Sərəncamın 1-ci hissəsi ilə təsdiq edilən Dövlət Proqramının həyata keçirilməsinə nəzarət və onun icrası zamanı işlərin müvafiq orqanlarla əlaqələndirilməsi Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasına həvalə edilib.

Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası bu Sərəncamın 1-ci hissəsi ilə təsdiq edilən Dövlət Proqramının icrası sahəsində görülən işlər barədə ildə bir dəfə Azərbaycan Respublikasının Prezidentinə məlumat təqdim edilməlidir.

Azərbaycan Respublikasının Nazirlər Kabineti bu Sərəncamdan irəli gələn məsələləri həll etməlidir.

Ölkə.Az

ŞƏRH YAZ
0

Elmar Məmmədyarov Litvanın Azərbaycandakı fövqəladə və səlahiyyətli səfirini qəbul edib

Elmar Məmmədyarov Litvanın Azərbaycandakı fövqəladə və səlahiyyətli səfirini qəbul edib
22:24
Bu gün
206
Siyasət
A
Xarici İşlər naziri Elmar Məmmədyarov Litva Respublikasının Azərbaycan Respublikasındakı fövqəladə və səlahiyyətli səfiri Valdas Lastauskası diplomatik fəaliyyətinin baş çatması ilə əlaqədar qəbul edib.

"Ölkə.Az"a Xarici İşlər Nazirliyindən verilən məlumata görə, görüşdə tərəflər iki ölkə arasında ikitərəfli münasibətlərin hazırkı durumu, əməkdaşlığın cari inkişaf səviyyəsi və perspektivləri barəsində fikir mübadiləsi apardılar.

Səfir Valdas Lastauskas diplomatik fəaliyyətinin və bu istiqamətdəki təşəbbüslərin həyata keçirilməsi üçün göstərilmiş dəstəyə görə Azərbaycan hökumətinə təşəkkürünü bildirdi.

Görüş zamanı ölkələrimiz arasında bir çox sahələrdə, o cümlədən iqtisadi, ticarət, nəqliyyat və digər sahələrdə, Parlamentlər arasında mövcud olan əməkdaşlıq yüksək qiymətləndirildi.

Habelə tərəflər arasında qarşılıqlı maraq doğuran regional və beynəlxalq məsələlər ilə bağlı fikir mübadiləsi aparıldı.

Nazir Elmar Məmmədyarov səfir Valdas Lastauskasın ikitərəfli münasibətlərin inkişafı istiqamətindəki səylərini yüksək qiymətləndirdi və ona gələcək fəaliyyətində uğurlar arzu etdi.

Ölkə.Az

ŞƏRH YAZ
0
BAĞLA