KORONAVİRUSA YOLUXANLARIN SAYI - CANLI STATİSTİKA

"Bacım və ailəsi evimizi əlimizdən alır" — XANIM BƏSTƏKARLA QALMAQALLI MÜSAHİBƏ

15:38
24.04.2019
14080
Mədəniyyət
A
Təxminən 10-12 il öncə ölkənin populyar ifaçıları onun mahnılarını oxuyurdular. Amma son illər sanki yaradıcılığında durğunluq hökm sürür. Daha doğrusu, "UZİ Gülər" kimi tanınan həkim bacısı Gülər İbrahimovanın ailəsiylə aralarındakı qalmaqal belə demək mümkünsə, Sədaqət Arifqızının yaradıcılığını ikinci plana keçirib. Əslində, elə ilk sualım da yaradıcılıqla bağlı oldu, amma görünür iki bacı arasındakı mülk qalmaqalı hələ də bitməyib.

- Sədaqət xanım, yaradıcılığınızda hansı yeniliklər var, hansı müğənnilərlə işləyirsiniz?

- Yaradıcılıq bir yana, hətta atamın adı da az qala yadımdan çıxıb. Bunlar məni o qədər bezdiriblər ki, iki ildir ümumiyyətlə yaradıcılıqla məşğul ola bilmirəm. 

- Kimlər?

- Bacım və bacımın oğlu.

- Mətbuatda bu barədə oxumuşdum. Amma istərdim ki, özünüzdən ətraflı eşidək.

- 2010-ci ildə oğlum Ağası Hüseynov həyat yoldaşı və iki övladıyla birlikdə bir illik Amerikaya getdi. Amerikaya iş qurmaq üçün getmişdi. Elə oldu ki, 12 yaşlı nəvəm ağır xəstələndi və Bakıya dönməli oldular. Nəvəm Nyu-Yorkda əməliyyat olunsa da, heç bir xeyri olmadı və 2011-ci ildə uşağı itirdik. Həmin ərəfədə oğlum yeni tikilən binadan dörd otaqlı mənzil almışdı. O mənzildə oğlum ailəsiylə cəmi səkkiz ay yaşayıb Amerikaya köçmüşdü. Nəvəmin yas məclisini verdik. Təbii ki, oğlum və gəlinim, hamımız çox pis haldaydıq. Oğlum dedi ki, bu mənzildə yaşaya bilmirəm, hər şey mənə uşağı xatırladır, evimi satıram. Oğlum atası ilə birlikdə həmin mənzili satdı. Bacımın oğlu Fuad İbrahimov dedi ki, sənin başın yasa qarışdığından yaxşı mənzil axtarıb tapa bilməyəcksən, sənin üçün yaxşı ev taparam. Fuad  "Lider" telekanalının yaxınlığındakı binalardan birinə köçmüşdü, oğluma da həmin binadan ev tapdı. "Tamam MTK"-ya aid binadakı mənzil isə qohumumuzun idi.  Fuad gəldi ki, pulu ver, aparım alqı-satqını edim. Fuadın anası-bacım Gülər İbrahimova çox vaxt xəstə olub deyə, o uşaqlara da anamla mən baxmışam. Fuadı öz balalarımdan ayırmamışam, qucağımda böyüyüb. Ona görə də oğlum Fuada inandı. Oğluma mənzil təklif etdiyi binanın isə nə kupçası, nə orderi yoxdur, yalnız müqaviləylə alqı-satqı olunur. Halbuki neçə ilin binasıdır. Mənzili də Günel adlı qohumumuza atası Lütfi almışdı, sonradan ərə getdi və atası dedi ki, evi satıram, qızımın mənzilə ehtiyacı yoxdur. Fuadın vasitəsilə alqı-satqı edildi və mənzil oğlumun adına alındı. İki il o mənzildə yaşadıqdan sonra oğlum dedi ki, burada özümə yer tapa bilmirəm, yenidən Amerikaya köçürəm. Çünki Ağası övladının dərdini unuda bilmirdi. İki il sonra bacımın oğlanları Rəşad, Taleh və Fuad İbrahimovlar, bacımın əri, Ağasının atası qonaqlıq edib oğlumu yola saldılar.

- Sədaqət xanım, bir ara kürəkəniniz barədə də mətbuatda məlumatlar yayılırdı...

- Bəli, bundan sonra kürəkənim barədə mətbuatda xoşagəlməz yazılar dərc edilməyə başladı.   Sonra mənim fotolarımı saytlara, səhifələrə qoyub yazdırırdılar ki, ucuz mahnılar müəllifi, əlli manata mahnı yazır. Halbuki heç bir mahnıma görə müğənnidən pul almamışam. Nəvələrimin, qızımın fotosunu paylaşıb xoşagəlməz sözlər yazırlar. Biz də dəli olmuşuq ki, bunları kim yazır, kim yazdırır. Yaxşı adamların sayəsində öyrəndik ki, bu yazıları yazan bacım oğlu Fuadla, bacımın həyat yoldaşıdır. Ondan sonra istər-istəməz aramız dəydi. Əslində, nəvəmin hüzr məclisindən aramız dəymişdi, münasibətlər soyumuşdu. Halbuki o yazılar gedən ərəfədə Ağası Fuada demişdi ki, bu yazıların altından sən çıxsan, məndən incimə. Fuad da dedi ki, sən nə danışırsan, əsla mən deyiləm. 

- Hüzr ərəfəsində bacınızla aranızın dəyməsinə səbəb nə idi?

- Nəvəmin səhhəti pisləşən gün bacım toyda imiş. Onu dəfələrlə yığdım, cavab vermədi. Sonradan öyrəndim ki, bacım zənglərimi görüb deyirmiş ki, yəqin nəvəsinin vəziyyəti pisləşib. Bizim evdəki yasdan bir gün sonra isə ailəlikcə toya getmişdilər. Demişdi ki, sənin dərdindən mənə nə? Bir nəfərdən də eşitdim, deyib ki, Allah kimə nə dərd verdiyini bilir. 

- Bəs bacınız oğlunun sizin oğlunuzu məhkəməyə verməyinə səbəb nə idi?

- Günlərin birində Amerikaya faksla bildiriş göndərilir ki, Ağası Hüseynov, sizi Fuad İbrahimov məhkəməyə verib. Guya o vaxt evi Fuad alıb və bu ev onun adına keçməlidir. Sonradan Fuad belə bir söhbət uydurdu ki, Ağasının mənə borcu var. Fuadın sənə necə borcu ola bilər ki, 17 yaşından işləyib, iki universitet bitirib, gömrük idarəsində qaçaqmalçılığa qarşı mübarizə idarəsində rəis müavini olub, atası da normal yaşayıb. Fuadın sənin puluna ehtiyacı ola bilməz axı. Ağasının qızı vəfat edəndə 32-33 yaşı var idi, imkanı da yaxşı idi. Niyə səndən borc almalıdır ki? Fuad yazır ki, Ağası Amerikaya borca görə qaçıb. Amma Ağasını onların Amerikaya necə təmtəraqla yola salmağının videosu da var. Qaçan adamı o cür təntənə ilə yola salarlarmı? Sadəcə, bilinəndən sonra ki, sən nəslimizdən, qohum-əqrəbadan anonim yazılar yazırsan, aranız dəydi.  Kürəkənimi məhkəməyə verməyə gücü çatmadığı üçün oğlumu məhkəməyə verdi və qaynatası ilə qayınını şahid qoydu. Guya ki Ağası mənzilin pulunu Fuada verməyib. Üç ildir məhkəmə gedir. Əvvəlcə onlar məhkəməni uddular, sonradan biz qalib gəldik. İndi də məhkəmənin qərarı olmaya-olmaya deyirlər ki, mənzili boşaldın. Hazırda o mənzildə oğlumun atası yaşayır. Binanın sahibi də, hüquqşünası da deyir ki, mənzil Fuadındır. Belə şey heç yerdə görülməyib. 

- Maraqlıdır ki, məhkəmə prosesləri gedir və oğlunuzla gəlininiz hələ də Amerikada yaşayırlar.

- Gəlinim hazırda Amerikada universitetdə oxuyur, gec-tez qayıdacaqlar və olan-qalan bir mənzilləri var. Sən niyə mənim oğlumun mənzilinə yiyələnməlisən? Oğlumun antikvar maşınını öz adına keçirdi. Halbuki o məsələdə də saxtakarlığa yol vermişdi. Sadəcə, maşın məsələsində gördü ki, biz bacarmadıq, bunun qolu güclü çıxdı. İndi də oğlumun mənzilinə əl atır. Sənin dörd-beş yerdə mənzilin var, hardan aldığını da soruşan yoxdur. Amma Ağasının dərdi başından aşır, övladını itirib, valideynləri xəstədir. Bunu Elgiz Əkbərin verilişində də demişəm ki, onsuz da bizim həyatımız bundan sonra boz rəngdədir, oğlum yeganə qızını itirib. Amma sən deyirsən ki, hər şeyinizi alacam, sizi dilənçi edəcəm. Sizə göstərə də bilərəm ki, Elgizin verilişindəki çıxışımın altından nə qədər şər-böhtan, təhqir yazdılar.  Yasamal rayonu 29-cu polis bölməsinə verdim, məlum oldu ki, ərəb nömrəsiylə başqa adama yazdırırlar. Qızımın, oğlumun, özümün haqqında ağızlarına gələni yazırlar, yazdırırlar. Nazir müavini olan qohumları var, ona arxayındırlar. Bizim də başqa əlacımız qalmayıb, ölkə rəhbərliyinə müraciət etmişik. Mənzilini aldığımız Güneli məhkəməyə aparıb. Güneldən soruşublar ki, mənzili Fuada satmısan, yoxsa Hüseynov Ağasıya? Günel də deyib ki, Ağasını tanımıram. Bəs sən necə Ağasını tanımırsan ki, ev Ağasının adınadır, kommunal ödənişlər edilir. Günelin atasına zəng vurdum ki, sənin qızına ayıb deyil, axı pulu biz vermişik. Atası da getdi məhkəmədə ifadə verdi ki, mənzili Hüseynov Ağasıya satmışıq, pulumuzu da qəpiyənə qədər almışıq. Fuad isə deyir ki, pulu özümdən vermişəm, Ağası mənə 85 min borcludur. Özündən rəqəmlər kəşf edir. Yoldaşıma da şər atdılar ki, guya Fuadın qayınatasından altmış min borc alıb. Həmin qayınata isə təqaüdlə dolanan kasıb adamdır. Mənim yoldaşım da tanınmış həkimdir, alimdir, uzun müddət 2 nömrəli tibb məktəbinin direktoru müavini işləyib,  bir müddət isə direktor vəzifələrini icra edən şəxs olub.  Sizcə, belə bir adam mənim bacımın su satan qudasından altmış min borc alar? Biz həmin məhkəməni udduq.  Əslində,  bu məsələ barədə danışmaq istəməzdim, amma bıçaq sümüyə dirənib. Oğlumun mənzilini niyə ona verək?  On iki yaşlı məsum nəvəmin qəbrinə and içirəm ki,  bizim bacıma, bacımın ailəsinə, övladlarına borcumuz yoxdur. "Quran"a da əl basaram. 

İntiqam VALEHOĞLU
Ölkə.Az

ŞƏRH YAZ
1

İTV Mikayıl Müşfiqin acı taleyinə film həsr etdi — VİDEO

İTV Mikayıl Müşfiqin acı taleyinə film həsr etdi
20:35
05.06.2020
1910
Mədəniyyət
A
Azərbaycan poeziyasının görkəmli nümayəndəsi Mikayıl Müşfiqin doğum günü münasibətilə televiziya filmi ərsəyə gətirilib.

"Ölkə.Az" xəbər verir ki, qanlı Stalin repressiyasının ən gənc ziyalı qurbanlarından olan M.Müşfiqə həsr olunmuş film “Bəraət: №1109” adlanır.

Ekran işində nakam şairin acı taleyi, repressiya qurbanı olaraq seçilməsinin səbəbləri gözlər önünə sərilib. oxu.az

Film 22:00-da İctimai Televiziyada yayımlanacaq:

ŞƏRH YAZ
0

Azərbaycanda xanəndə sevgilisinə görə 20 otaqlı ev tikdi, özündən 35 yaş cavan qızla evləndi, pula görə.. — FOTO

Azərbaycanda xanəndə sevgilisinə görə 20 otaqlı ev tikdi, özündən 35 yaş cavan qızla evləndi, pula görə..
18:12
05.06.2020
3143
Mədəniyyət
A
Azərbaycanda xanəndə sevgilisinə görə 20 otaqlı ev tikdi, özündən 35 yaş cavan qızla evləndi, pula görə... FOTO

Cabbar Qaryağdıoğlu 1861-ci ildə Şuşada "Seyidli" məhəlləsində Boyaqçı Məşədi İsmayıl kişinin ailəsində dünyaya göz açıb. Atası oğlunun da onun kimi boyaqçı olmasını istəsə də, oğlunun gözəl səsi, anadangəlmə istedadı Cabbarı xanəndəliyə istiqamətləndirir.
***
Cabbargilin evi şəhərin ən səfalı yeri olan Cıdır düzünə yaxın idi. Uşaqlıqdan məhəllə uşaqları ilə "Qayabaşı"da, "Qırxpilləkən"də", "Ağzıyastı kaha"da quzu otaran Cabbar saatlarla "Dəlikdaşın" üstündə oturaraq zümzümə edərmiş.
Cabbar ilk musiqi təhsilini Şuşada Xarrat Qulunun məktəbində alıb. O, on yaşında ikən şəhərdəki məktəbə daxil olur, müəllimi Mirzəli Zeynalabdin oğlundan musiqi elmini və fars dilini öyrənir. 16 yaşında ilk dəfə müəllimi ilə getdiyi toyda tarzən Cavadbəyin müşayiəti ilə “Kürdü-Şahnaz” oxuyur, zil və təravətli səsi ilə təkcə dinləyiciləri deyil, musiqiçiləri də məftun edir. Qoca xanəndə Hacı Hüsü onun alnından öpüb, “Gələcəkdə bizim yerimizi bu cavan xanəndə tutacaqdır”, deyir. Bu hadisədən sonra məşhur tarzən Sadıq Əsəd oğlu (Sadıqcan) Cabbarı rəhbərlik etdiyi sazəndələr dəstəsinə qəbul edir. Cabbar bu dəstə ilə Şuşada “Xandəmirovun teatr salonu”nda təşkil edilən “Xeyriyyə gecəsi”ndə “Heyratı” oxuyur.

Cabbar Qaryağdıoğlu 1905-ci ildə Gəncə şəhərində məşhur xanəndə İslam Abdullayevin vasitəsilə tanış olduğu tarzən Qurban Pirimov və kamançaçı Saşa Oqanezaşvilidən ibarət ikinci bir musiqi üçlüyü yaradır. Xanəndə "Heyratı"nı qrammafon valına 1906-cı ildə yazdırıb. Eyni zamanda onun ifasında olan "Ovşarı" muğamı da yüksək ifaçılıq məharətindən və onun səsinin qeyri-adi gücündən xəbər verir. Cabbar Qaryağdıoğludan sonra bu günə qədər bu muğamı hələ heç kəs oxumağa cürət etməyib.
"Şərq musiqisinin peyğəmbəri" adlandırılan Cabbar Qaryağdıoğlu dəfələrlə İran şahlarının, Türkiyə sultanlarının məclislərinə dəvət olunmuş, öz gözəl ifası ilə onları məftun etmişdir. O, yaradıcı sənətkar idi. Bir muğamı 2-3 saat, bəzən isə böyük məclislərdə 4 saat belə oxuyardı.
***
Cabbar Qaryağdıoğlu bizə məlum olan sonuncu mogikandır. Ondan əvvəl kimlərin olması barədə məlumatımız çox azdır. Ona görə də Cabbarı az adam görüb. O modern dövrə, 20-ci əsrə muğamın ənənələrini ötürə bilib. Deyilənə görə çox böyük, möhtəşəm və əvəzsiz ifaçı olub. İnsanların çox onun qocalıq dövrünü və bir neçə səs yazısını görə biliblər. Bizim əlimizdə irs olaraq qalan muğam Cabbar Qaryağdıoğlundır.
***
Şuşada xanəndə kimi məşhur olan Cabbar Qaryağdıoğlu Bakıya gəlir. Öz evi olmadığından, kirayədə yaşamağa başlayır. Qonşuluqda 13 yaşlı Səlməxatun adlı bir qıza vurulur. Qıza elçi düşür. Səlməxatunun atası inad eləyir, deyir, öz evi-eşiyi olmayan bir adama qız vermərəm. Cabbar Qaryağdıoğlu da bundan sonra üçmərtəbəli, iyirmi otaqlı mülk tikdirir. Binanın tikintisində sementdən yox, ancaq yumurtadan istifadə olunur. Bundan sonra Səliməxatunuun atası qızını ona verməyə razı olur.

Cabbar Qaryağdıoğlu Səliməxatunla 48 yaşında evlənib. Onların bu evlilikdən səkkiz övladı dünyaya gəlib. Qaryağdıoğlu böyük qardaşının oğlu Cəlalı Şuşadan Bakıya, buradakı evinə gətirərək himayəsinə götürüb: “O, böyük rəssam olacaq”– deyə, təhsil verib. Gənc Cəlal da əmisinin etimadını doğruldub, tanınmış heykəltəraş Cəlal Qaryağdı olub.
***
Cabbar Qaryağdıoğlunun mülkündən sağda yerləşən bina isə Zeynalabdin Tağıyevin qış evi olub. Satirik şair, “Molla Nəsrəddin”çi Əli Nəzmi də burda yaşayıb.
***
Onun yaradıcılığı Üzeyir bəyin musiqi yaradıcılığına çox böyük təsir göstərib. Üzeyir Hacıbəyovun on iki yaşı olanda Şuşada Cabbar Qaryağdıoğlu Məcnunun Leylinin qəbri üstündəki ölüm səhnəsini aktyor kimi ifa edib. Bu ifanı izləyən Üzeyir Cabbar əmidən təsirlənir, sonralar müsəlman şərqinin ilk operasını “Leyli və Məcnun”u bu təsirlənmədən yazır. Bu fakt “Uzun ömrün akkordları” filmində də yer alıb. Cabbar Qaryağdıoğlu rolunu ifa edən isə Qədir Rüstəmov olub.

Cabbar Qaryağdıoğlunun metodik missiyası Seyid Şuşinskiyə ötürülüb. Seyid Şuşinski böyük ifaçı olsa da, metodikası o qədər də güclü olmayıb. Ancaq Seyid Cabbar Qaryağdıoğlundan götürdüyü ənənələri tədris edib. Bu ənənələr indiki muğam məktəbinin əsasını qoyub.
***
Xanəndənin qızı Şəhla Qaryağdı şair Əliağa Kürçaylının həyat yoldaşı olub. Atası rəhmətə gedəndə qızı Şəhlanın 14 yaşı olub. O, atasının qəbrinin yerini sonradan öyrənib.Yeri itib-batmasın deyə 1982-ci ildə məzarın ətrafına dəmir hasar da çəkdirib.
***
XX əsrin əvvəllərində Cabbar əminin mülkü Azərbaycan ziyalılarının toplaşdığı müqəddəs ocaq olub. M.Ə. Sabir, Əli Nəzmi, Əliağa Vahid, Qurban Pirimov, Seyid Şuşinski, Bülbül və bir çox ziyalı Cabbar ocağında görüşüb, çörək kəsiblər, mədəniyyətimizin, ədəbiyyatımızın, musiqimizin tarixini burada yaradıblar. Evin hər mərtəbəsi hazır olanda Cabbar əmi sevincindən bir muğam dəstgahı oxuyurmuş. Tam hazır olanda isə indi xalq mahnısı kimi bildiyimiz “Ay dərya kənarında bir ev tikmişəm” nəğməsini qoşur.

Ad - 00:21
ƏTRAFLI
hunergroup.az

Tükəzban İsmayılova Cabbar Qaryağdıoğlu ilə qonşuluqda yaşayıb. Bir gün qonşuluqda gözəl səslə oxuyan qızı görəndə Cabbar əmi onu yanına çağırıb. Dinləyəndən sonra, “Bu qızdan yaxşı oxuyan olacaq” deyib
***
Cabbar əminin yaşadığı məkan “Buynaqski” adlansa da, hələ sağlığında camaat ora “Cabbar məhəlləsi” deyirmiş. Qızı Şəhla xanım xatirələrində qeyd edir ki, hətta bir çox ziyalılar o vaxt tələbə ikən bu evdə yaşayıblar. Atası onlardan 1 qəpik olsun kirayə haqqı almayıb, əksinə, hər işlərində kömək əlini əsirgəməyib.
***
İrəvanın varlı adamlarından biri Cabbar Qaryağdıoğlunu oğlunun toyuna dəvət edir. Toyun axırıncı gecəsi qaydası üzrə bəy tərifi olur. Cabbar əmi də qayda üzrə bəyi tərif etməyə başlayır. Bu zaman qızın atası narazı şəkildə xanəndədən qızını tərifləmədiyi üçün inciyir. Cabbar əmi bunun həm adətə zidd, həm də qızın üzünü görmədiyini deyir. Ancaq gəlinin atasının pərtliyi keçmir. Cabbar əmi gəlinin nişanələrini xəbər alanda ona deyirlər ki, qızın üzündə qoşa xal var. Cabbar Qaryağdıoğlu tarzən Qurban Pirimova baxıb deyir: Qurban, tarı götür, gəl dalımca.Qaryağdıoğlu bədahətən sonradan hamıya yaxşı tanış olacaq “İrəvanda xal qalmadı” mahnısını bəstələyir.

Bülbül öz xatirələrində Cabbar əmi haqqında maraqlı bir əhvalatı nəql edir. “1934-cü ilin sonunda Cabbar əmi 200-dən yuxarı mahnı və təsnifi fonovalik vasitə ilə oxudu. Bunun üçün konservatoriya ona, o vaxtın pulu ilə 10 min manat qonarar verməli idi. Üzeyir bəy və Müslüm Maqomayevlə birlikdə konservatoriyada kabinetdə oturmuşduq. Üzeyir bəy Cabbar əminin dalıyca adam göndərdi. Cabbar əmi gələndən sonra Üzeyir bəy ona konservatoriiyadakı xidməti üçün10 min manat pul verilməli olduğunu deyir.
Cabbar əmi əsəbiləşir, cəld qəlyanını tənbəki ilə doldurub, bir qurtum çəkdikdən sonra narazı halda deyir:
- Canım, ayıb deyil? Bəs mənə nə deyərlər?! Belə iş olar ki, 60 il müddətində xalqdan öyrəndiyim və topladığım mahnıları təzədən oxuyub xalqa satam? Xalqın malını oğurlamaq olar?! Mən bu qoca vaxtımda xalqın malını oğurlaya bilmərəm. Mən o mahnıları pul üçün oxumamışam. 60 ilə 500-ə qədər mahnı toplamışam və bu gün xoşbəxtəm ki, heç olmasa onların 300-ə qədərini sizin köməyinizlə yazdıq. Bu mənim həm sənətkarlıq, həm də vətəndaşlıq borcumdu.
Bu sözlərdən sonra xanəndə ayağa qalxıb otaqdakılarla sağollaşır, üzünü Üzeyir bəyə tutaraq deyir: - Üzeyir bəy, təvəqqe edirəm, bir də məni belə işlərdən ötrü çağırmayasan”.

Yazdığı şeirləri yastığının altına qoyarmış. “Gülə-gülə”, “Bağçadan gələn nə səsdir?”, “Bu gələn yara bənzər”, “Sona xanım”, “Dağ başında qar kimi”, “Bulud üzlü, ay qabaqlı gözəlim”, “İravanda xal qalmadı”, “Ay dərya kənarında bir ev tikmişəm”, “Xumar oldum”, “Qalada yatmış idim” kimi mahnılarını çoxları xalq mahnısı bilsə də bunların müəllifi Cabbar Qaryağdıoğlu.
***
Şəhla xanım atasını belə xatırlayırmış: “Atam bizi çox istəyirdi. Amma anama olan məhəbbəti o qədər güçlüydü ki, biz kölgədə qalmışdıq. Yadımdadı, o, həmişə anamı mahnı, şeirlə oyadardı. Bir dəfə Cabbar əmi səfərdən qayıdır, evə girir, görür ki, heç kəs yoxdu, hamı bağdadı. Xanımının yoxluğu ona bərk təsir edir. Elə orda bir şeir qoşur:
Sən orda eylə seyr-səfa, bağ arasında,
Mən burda yanım, piltə kimi yağ arasında.
Rəngim saralıb, Səlimə xanım, ayrılığından
Necə ki, saralıb şamama tağ arasında...”

Cabbar Qaryağdıoğlu 1944-cü il aprelin 28-də dünyasını dəyişir. Dəfn mərasimi filarmoniyada keçirilir. Mirzə İbrahimovun sədrliyilə dəfn komissiyası yaradılır. Qərara alınır ki, Qaryağdıoğlu indiki Fəxri Xiyabanda torpağa tapşırılsın. Ancaq naməlum səbəblərə görə Yasamal qəbiristanlığında dəfn edilir.
***
Qızı Şəhla xanım söyləyir ki, Cabbar əmi dünyasını dəyişəndən bir həftə öncə övladlarına deyib: “Balalarım, heç kimin valideyni əbədi yaşamır. Bir gün gələr, mən də bu dünyadan köçərəm. Mənim üçün kimsəyə minnət etməyin, ağız açmayın. Əgər mən bu millətin mədəniyyəti üçün nə isə etmişəmsə, özləri gəlib axtaracaqlar”.kulis.az

ŞƏRH YAZ
0
BAĞLA