Bakı pomidoru, Rusiyaya buraxılmayan “qarabağlı”, Qurbanovun maaşı, “Ölkə.Az”a 581 dollara bilet təklifi — BÖYÜK BAYRAM BAŞLANDI

Bakı pomidoru,  Rusiyaya buraxılmayan “qarabağlı”, Qurbanovun maaşı, “Ölkə.Az”a 581 dollara bilet təklifi
12:03
14.06.2018
5923
Maraqlı
A
Nəhayət, başlandı! Bu gündən düz iyulun 15-dək bütün dünyanın gözü Rusiyanın 11 şəhərinə dikiləcək. Hə, Rusiya ilk dəfə 11 şəhərin 12 stadionda keçiriləcək dünya çempionatına ev sahibliyi edəcək. Yarışma iyulun 15 Moskvanın «Lujniki» stadionunda keçiriləcək final oyunuyla sona çatacaq.

“Ölkə.Az” olaraq dünya çempionatının formatı, təqvimi, komadaların heyəti və digər məqamlarla bağlı uzun-uzadı yazıb sizlərin vaxtını almaq istəmirik. Biz tamam başqa məqamlardan söhbət açacağıq. Hətta, dünya çempionatına getməsə belə Azərbaycanla bağlı da məqamlar yer alacaq bu yazıda. Odur ki, başlayaq.

21-ci dünya çempionatı 32 komandanın iştirakı ilə keçiriləcək. İlkin mərhələdə yığmalar 8 qrupa bölünür. Çempionatın belə formatı 1998-ci ildən etibarən mövcuddur. 1/8 final çıxmaq üçün qrupdakı ilk iki yerdən birini tutmaq lazımdır.


36 ilin ayrılığı, ilk dəfə üzü gülənlər

Əvvəlcə onu qeyd edək ki, Dünya Kubokunda oynamağa vəsiqə qazanan 31 komandadan 20-si Braziliyada keçirilmiş son çempionatda da iştirak ediblər. Bununla bərabər, İslandiya və Panama futbol tarixlərində ilk dəfə bu turnirə qatıldılar. Digər maraqlı məqamlar isə müxtəlif milli komandaların uzun müddətdən sonra yenidən bu turnirdə iştirak hüququ qazanması oldu:
Məsələn, Misir 28 ildən sonra Dünya Kubokunun final mərhələsində mübarizə aparacaq. 20 illik fasilədən sonra Marakeş yenidən bu turnirdə iştirak edəcək. Ən uzun ayrılıq isə Perunun qismətindəymiş. Onlar 36 ildən, 1982-ci il dünya çempionatından sonra yenidən dünya kubokundadırlar.

Hələ çempionatdan əvvəl bəzi yığmaların kaprizləri və onlara qoyulan qadağalar məlum olub.
Məsələn, Almaniya millisinin baş məşqçisi Yoahim Löv futbolçularına bir sıra məhdudiyyətlər tətbiq edəcəyini açıqlayıb.

Seksə yasaq, içmək olar və bol meyvə

Belə ki, təcrübəli çalışdırıcı dünya çempionatına hazırlıq dönəmində yetirmələrinə həyat yoldaşları, uşaqları və sevgililəri ilə görüşlərə icazə versə də, bu, Rusiyaya yollanacaqları tarixdən qadağan olunacaq. Lövün sözlərinə görə, bununla yanaşı, mundialın gedişində futbolçular sekslə məşğul ola bilməzlər.
O, həmçinin komanda üzvlərinə sosial şəbəkələrə girişi də dayandırmağı tapşırıq verib. Löv qeyd edib ki, həmin müddətdə Facebook, Instaqram və Tvitter tam qadağan olunacaq. Lakin o, futbolçuların hər birinin 1 qədəh spirtli içki içməsinə icazə veriləcəyini də vurğulayıb.
Mundiala gələn böyük komandalar təşkilatçılar üzərinə müəyyən tələblər də qoyublar.

Futbolun yaradıcısı olan İngiltərə qaldığı bazanın ətrafında 6 metrlik hasar və futbolçuların yaşayacağı otaqlarda oyun aparatlarının olmasının vacibliyini bildiriblər. Onlar televiziyalara ingiliscə kanalların yüklənməsini, həmçinin çarpayıların genişlənməsini tələb ediblər.
Portuqaliyalılar plazma televizorları, oyun aparatları ilə yanaşı, balkonlarına mebellərin yerləşdirilməsini və otaqların divarlarının başqa rəng olmasını istəyiblər.

Asiya ölkələrində stolüstü tennisin sevilməsi Cənubi Koreya yığmasından da yan ötməyib. Bu ölkənin millisi bazasında tennis stollarının quraşdırılmasını zəruri hesab edib. Koreyalılar 6 metrlik hasar, 2 nəhəng televizorla yanaşı, ortopedik döşəklərin də olmasını tələb kimi önə çəkiblər.
Argentina yığması isə fərqli istəklə çıxış edib. Messi və komandası otaqlarında təmirin aparılmasını və çox sayda meydançaya malik olmalarını arzulayıblar. Onların ən gözlənilməz istəyi isə qolfkar, yəni qolf oyunu zamanı futbolçuları daşıyacaq elektriklə işləyən nəqliyyat vasitələridir.
Braziliya millisinin arzusu isə tam başqadır. Cənubi amerikalılar daha çox meyvə və buz xəyalındadılar.

Son dünya çempionu Almaniya təşkilatçılardan badam və düyü südü, həmçinin istirahət zonalarının geniş olmasını tələb ediblər.
Meydan sahibi olan Rusiya futbolçuları öz evlərindəki mundialda ciddi tələblər irəli sürməsə də, onların da daim ərköyünlük etdiyini söyləmək olar. Şimal qonşularımız qidalanmaya xüsusi fikir verirlər. Millinin öz aşpazı isə komanda ilə birgədir və bütün səfərlərdə də iştirak edir. Yığmanın menecerləri səfərlər zamanı komandanın istədiyi ərzaqları axtarıb, tapmalı olurlar. Amma elə ərzaq da var ki, yığmanın ölkədən kənarda çıxışı zamanı onu heç yerdən tapmaq mümkün deyil. Bu, Bakı pomidorlarıdır. Nədənsə, Rusiya yığması onları çox sevir və həmişə özləri ilə aparırlar.


Panamaya olar, Azərbaycana yox?

Çempionatda iştirak edəcək komandaların heyətlərindəki futbolçuların ümumi dəyəri açıqlanıb. Ən bahalı komanda Fransa millisidir. Bu yığmanın oyunçularnın qiyməti 1 milyard 400 milyon avrodur. İkinci yerdə İngiltərə (1 milyard 380 milyon), üçüncü yerdə isə Braziliya gəlir (1 milyard 260 milyon).

32 iştirakçı arasında ən ucuz komanda Panamadır. Transmarket.org bu yığmanın oyunçularının total qiymətinin 15 milyon avro olduğunu deyir. 
Maraqlıdır ki, Azərbaycan yığmasının da dəyəri təxminən o qədərdir. 

Adam “Qarabağ”lını Rusiyaya aparmadı

Dünya çempionatnı ən çox futbolçu göndərən klub “Mançester Siti"dir. İngiltərə klubundan mundiala 17 futbolçu gedəcək. 
Ən çox futbolçu göndərən 2-ci klub isə “Real”dır (16 oyunçu). Dünya çempionatnı futbolçu göndərən klublar arasında “Qarabağ” da ola bilərdi. Amma…
Polşa millisinin baş məşqçisi Adam Navalka mundial öncəsi 35 nəfərlik siyahı açıqlayıb. “Qarabağ”ın müdafiəçisi Yakub Jezniçak 61 yaşlı çalışdırıcının siyahısından kənarda qalıb.

Qurbanov 9 məşqçidən çox qazanır
Çempionat iştirakçıları arasında ən çox qazanan baş məşqçilərin də siyahısı məlum olub. İlk pilləni illik 3,8 milyon avro maaşla alman Yohhim Löv tutur. Braziliyanın baş məşqçisi Tite isə, fransız həmkarı Didye Deşamla birgə ilinə 3, 4 milyon qazanırlar.
Maraqlıdır ki, illik qazancı 1 milyon manat olduğu deyilən Azərbaycan yığmasının baş məşqçisi Qurban Qurbanov dünya çempionatna qatılan bu yığmaların baş məşqçilərindən çox qazanır:


1.Qernot Ror (Nigeriya, 0,497)
2. Yanne Andersson (İsveç 0,448)
3.Sin Txg En (Cənubi Koreya, 0,448)
4. Ernan Qomes (Panama, 0,398)
5. Nabil Maalul (Tunis, 0,348)
6.Oskar Ramires (Kosta-Rika, 0,348)
7. Mladen Krstaiç (Serbiya, 0,298)
8.Adam Navalka (Polşşa, 0,268)
9. Aliu Sisse (Seneqal, 0,2)


Zibil yığan hakim

Hələ mart ayından çempionatda hakimlik edənlərin kimliyinə aydınlıq gəlmişdi. Mundialda ədaləti 46 ölkədən 36 FİFA referisi, 63 köməkçi hakim qoruyacaq.
Onların arasında türk Cüneyt Çakır da var. Amma DÇ-2018-də hakimlik edəcək Panama laysmanlarından birinin maraqlı tarixçəsi üzə çıxıb.
Rusiya mətbuatının yazdığına görə, baş hakim köməkçilərindən olacaq Qabriel Viktoriya ölkəsində hakimlik etməklə yanaşı, həm də küçələrdən zibil yığır.
Məsələ burasındadır ki, Panamada hakimlərin idarəçilikdən gəlirləri çox azdır. Buna görə də onlar dolanışıq üçün iki işdə işləmək məcburiyyətindədirlər. O, ac qalmamaq üçün düz 25 ildir - 1993-cü ildən zibilyığan işləyir. 

“Mən heç nədən utanmıram. Hər iki peşə xoşuma gəlir. Buna görə həmkarlarımla aramızda hər hansı gərginlik də yoxdur”, – deyə Qabriel bildirir.
FİFA-nın fantastic qazancı 

“DÇ-2018” FİFA-ya 6,1 milyard dollar qazandıracaq. Təşkilat bu məbləğin 3 milyardını yayım hüquqlarının satışından qazanacaq.
FİFA sponsor sazişlərindən 1,65 milyard dollar əldə edəcək.
Braziliyada keçirilmiş son çempionatda FİFA-nın qazancı 4,8 milyard, 2010-cu ildə CAR-da təşkil olunan mundialdan isə 3,9 milyard olub.
Rusiyada keçiriləcək dünya çempionatında yenə əsas diqqətlər hücumçulara yönələcək. 

Bu alman, ya o biri alman?

Rusiyada meydana çıxacaq forvardların bombardirlər siyahısına rəhbərlik etmək şansı demək olar ki, çox azdı. Çünki rekordun hazırkı sahib Miroslav Kloze (Almaniya) karyerasını davam etdirənlər üçün bir növ əlçatmaz görünür. Tomas Müller (Almaniya) bir qədər şanslıdı. O, həmyerlisini və sabiq komanda yoldaşını qabaqlamaq üçün 7 qola imza atmalıdı.

“Ölkə.Az”a inanılmaz təklif

Ən böyük futbol yarışının ötən ilin sentyabrından satışa çıxarılan biletlərindən 2 milyon 643 min 116-sı satılıb.
Bunlardan böyük hissəsini (871 797) yerli fanatlar əldə ediblər. Ən çox bilet alan ölkələrin içərisində ABŞ, Braziliya, Almaniya, Meksika, Argentina, Peru və Çin də var.

Biletlərlə bağlı bir məqam. Dünən “Ölkə.Az”ın əməkdaşı təxmini bir oyuna, iyunun 27-də Moskvada keçriləcək Braziliya-Serbiya matçına bilet sifariş verdi. Sizcə biletin qiymtəi neçəyə olsa yaxşıdır? Hə, inanmarsınız, qapının arxasındakı sektordan bizə bilet 581 dollara təklif edildi.

Allahım, nəydi günahım?

Bildiyiniz kimi, hər bir komandanın heyətində 23 futbolçunun adı qeyd olunur. Amma elə futbol ulduzları var ki, ölkəsinin “23”lüynə belə düşə bilməyib. Ən çoxu da İspaniyadan. FİFA mundialı buraxacaq “23”lükdən elə bir siyahı düzəldib ki, bəlkə də dünya çempionatına ayrıca komanda kimi qatılsaydılar, çempion olardılar. Siz bir siyahıya fikir verin, kimlər yoxdu burda:

Qapıçılar: Neto (Braziliya), Co Hart (İngiltərə), Bernd Leno (Almaniya)
Müdafiəçilər: Ektor Bellerin, Aymerik Laporte, Serxi Roberto, Mark Bartra, Markos Alonso (hamısı İspaniya), David Luiz, Aleks Sandro (hər ikisi Braziliya), Benedikt Hövedes (Almaniya)
Yarımmüdafiəçilər: Xavi Martines, Sesk Fabreqas, Xose Kalyexon (hamısı İspaniya), Kinqsli Koman, Adrien Rabio (hər ikisi Fransa), Raca Nainqqolan (Belçika), Mario Götze (Almaniya)
Hücumçular: Aleksandre Lakazett, Antoni Marsial (hər ikisi Fransa), Mauro İkardi (Argentina), Alvaro Morata (İspaniya), Leroy Sane (Almaniya).


Və sonda. 

Bəs 32 komanda çempionata hansı şüarlarla gedir?
Elə bunun özü də maraqlıdır. Odur ki, tanış olun:

İran: 80 milyon insan, bir millət, bir ürək döyüntüsü!
Peru: Geri döndük, 30 milyon perulu gəlir!
Danimarka: Tarixə bərabər keçək!
Səudiyyə Ərəbistanı: Çöl cəngavərləri!
Panama: Panama, 2 dənizin qüvvəti!
Kolumbiya: Bir röya, üç rəng və 50 milyon ürək, irəli!
İsveç: Hamı birlikdə İsveç üçün!
İngiltərə: Bizə zəfəri gətirin!
İsveçrə: 4 dil, bir millət!
Almaniya: Gəlin, bir yerdə tarix yazaq!
Avstraliya: Cəsur ol, gözütox ol, Avstraliya yığması yaşıl və qızıl rənglər içində!
Belçika: Qırmızı şeytanlar işbaşında!
Seneqal: Seneqal üçün imkansız yoxdu!
Uruqvay: Günəş Rusiyada parlayacaq və göy üzü mavi olacaq!
Serbiya: Bir komanda, bir röya – Serbiya!
Fransa: Sənin gücün, bizim arzumuz. İrəli, milli komanda!
Cənubi Koreya: Asiyanın aslanları, dünyanı fəth edin!
Xorvatiya: Kiçik ölkə, böyük xəyallar!
Yaponiya: Mavi Samuraylar, indi dava zamanı!
İspaniya: Birlikdə yenilməzik!
Meksika: Meksikada istehsal olundu, zəfər üçün hazırlandı!
Argentina: Röya üçün daim birlikdə!
Misir: Misir dedikdə, bütün dünya ayağa qalxıb dinləyəcək!
Mərakeş: Mərakeş milli komandası – Mərakeşin qüruru!
Braziliya: 5 ulduzdan artığı, 200 milyon ürək!
Nigeriya: Afrikalı qürurun qanadları!
Polşa: İrəli, Polşa!
Rusiya: Ürəkli oynayın!
Portuqaliya: Keçmiş şöhrətlə, günümüz tarixi uğurlarla dolu!
Tunis: Rusiya, Qartallar gəlir. Futbolçular və azarkeşləri əl-ələ!
Kosta-Rika: Bütün ölkə bir olarsa, heç bir şey imkansız deyil!
İslandiya: Xəyallarımızı birlikdə gerçəkləşdirək!

Bir sözlə, 1 ay davam edən futbol bayramı başladı. Bayramınız mübarək!

Səbuhi Məmmədli

Ölkə.Az

ŞƏRH YAZ
0

Məqsədə aparan yolda səd və maneələr az olmayacaq — Günün ulduz falı

Məqsədə aparan yolda səd və maneələr az olmayacaq
00:49
Bu gün
1012
Maraqlı
A

Qoç -  uzaqdakı tərəfdaşlarla əlaqələri inkişaf etdirmək imkanı yaranıb. Çoxdan bəri planlaşdırdığınız səfər və ya səyahətə hazırlaşa bilərsiniz. Vəzifənizin artmasını və ya gəlir mənbəyinizin daha səbatlı olmasını istəyirsinizsə, bilik və bacarıqlarınızı artırın.
Şəxsi işləriniz və maraqlarınızı işdən üstün tutmayın.
Günün ikinci yarısında qüvvənizi bərpa etmək üçün bir qədər tək qalmalısınız. Səhhətinizə fikir verin.
Dərman qəbul edənədək sağlam həyat tərzini seçin, fiziki işlə məşğul olun.

Buğa - bu gün çalışanda eksperiment edə bilərsiniz. Sizi məqsədə aparacaq yolu yaxın ətrafınızdakı insanlar təqdir etməyə bilərlər. Lakin qəbul etdiyiniz qərarların dürüstlüyünə inamınız önəmli məqamdır. 
Maliyyə durumu əlverişlidir. Çoxdan arzuladığınız əşyanı ala bilərsiniz.
Əvvəllər qarşılıqlı anlaşmaya nail ola bilmədiyiniz insanlarla da dil tapa bilərsiniz.
Birmənalı olmayan xarakterə malik insanla tanışlıq istisna deyil.

Əkizlər - düşünülməmiş addımlar atmayın. Diqqət və sərvaxtlıq tələb edən işdə səhv buraxmayın. Peşəkar fəaliyyət sahəsi ilə yanaşı, evdə də problemlər yarana bilər.
Münaqişə və ya davadan sonra barışmaq asan olmadığından güzəştə gedin, vəziyyəti ağırlaşdırmayın. 
Günün ikinci yarısında aqressiv, qıcıqlı olmayın.
Əhəmiyyətli xərclər istisna deyil. Onların əksəriyyəti məntiqsizdir.

Xərçəng - istənilən çətin situasiyadan və mübahisədən qalib çıxmağı bacarın. Haqlısınız, mövqeləriniz səbatlıdır. Opponentlər tezliklə anlayacaqlar ki, dürüst mövqe tutubsunuz. Qüvvə və potensialınızı olduğundan artıq dəyərləndirməyin. Mənasız, heç bir səbəbi olmayan riskə əl atmayın.
İşdə tərəfdaş və ya həmkarlarla münasibətlər pisləşə bilər. Fəaliyyət prinsipləri ilə bağlı mövqelərinizi bölüşməyən insanlarla sərt mübahisə etməyin.
Ailənizin yaşamınızda əksini tapacaq qərar qəbul etməlisiniz. Narahat və nigaran olmayın. Diqqətli olun, düzgün qərar verin.

Şir - yeknəsək, adi işləri tam başa çatdırın. Yarımçıq heç nə saxlamayın. İşin effektivliyi, məhsuldarlıq azala bilər. 
Çağırış, yarış şəraiti yaranarsa, şikayətlənməyin. Problemlər müvəqqətidir. Aktiv olun, daim irəlidə olmağa çalışın.
Kollektiv fəaliyyət üçün məhsuldar gündür.
Şəxsi münasibətlərdə aqressiv təşəbbüsə can atmayın. Planlarınızda dəyişiklik ola bilər.
Konkret məsələ ilə bağlı mövqelərdə ciddi fərqlər yaranacaq.

Qız - çətin və laübəli gün olsa da, problemlərin öhdəsindən gələcəksiniz. Uğursuzluğa düçar olmayacaqsınız. 
Yaşananları real dəyərləndirin. Hansısa iş alınmayanda təşvişə düşməyin. Kiçik problemlərə görə əhvalınızı pozmayın. Məntiqli, soyuqqanlı olun.
Yaxın ətrafınızdakı insanlar sizi təkrarlamağa çalışacaqlar.
Ailə üzvləriniz və qohumlarınız məsləhətlərinizi dinləsinlər. Onların maraqlarını müdafiə edin.

Tərəzi - gün əhvalınızı yaxşılaşdıracaq. Xoş ünsiyyət, effektiv müzakirələr üçün şərait yaranıb. İşdə situasiya normal olacaq. Tələskənlik, tələblər olmayacaq. 
Sürprizlər və gözlənilməz xəbərlər istisna deyil.
Günün ikinci yarısında yaşam enerjisi səviyyəsinin yüksək olması ev işlərinin öhdəsindən gəlməyə kömək edəcək.
Mühüm məsələnin həllini tapmağa, yaxın ətrafınızdakı insanlarla daha sıx ünsiyyət qurmağa imkan verəcək məlumat alacaqsınız.
Axşam saatlarında ciddi məsələ ilə bağlı situasiyada dəyişikliklər olacaq.

Əqrəb - perspektivdə "stavka" edəcəyiniz ciddi işlərlə məşğul olun. Saatlar keçdikcə şərtlər dəyişə, situasiya kəskinləşə bilər. Bu səbəbdən də diqqəti əsas işə yönəldin, soyuqqanlı olun, təmkinli davranın.
Günün ikinci yarısında münasibətlərdə ciddi problem yarana bilər. Yeni məqsəd formalaşır. Hədəfə doğru qətiyyətlə irəliləyin, vaxtı boş işlərə və puç arzulara sərf etməyin. Fiziki işlərdə xeyir var.
Axşam saatlarını ailəyə həsr edin. Yaxşı tanıdığınız insanlarla birlikdə istirahət edin.

Oxatan - maraqlı görüşlər, məhsuldar danışıqlar günüdür. Mövqeyinizi həssas şəkildə bildirin. Önəm verdiyiniz insanları özünüzdən narazı salmayın. 
İşdəki uğurlarınızı rəhbərlik görməsə də, az sonra mükafat və ya gəlir əldə edəcəksiniz.
İrəliləyiş gözlənilməz olacaq.
Yaşam arealında qayda yaratmaq üçün çalışmaq gərəkdir. Təmir və ya köçə başlamaq olar. Yaxın ətrafınızdakı insanlarla müqayisədə daha enerjili, daha diqqətli olun. Yaxınlarınızı astagəllikdə, ətalətdə suçlamayın.

Oğlaq - özünüzü qoruyun, səhhətinizə fikir verin. Nasazlıq, soyuqdəymə, zökəm, xroniki ağrıların kəskinləşməsi ehtimalı var. Səfərdəsinizsə, yaxşı bələd olmadığınız marşrutla hərəkət edirsinizsə, xüsusilə ehtiyatlı olun. Mənfi təmayüllərin təsiri altında olan daha bir yaşam sahəniz maliyyədir. Düşünülməmiş, gərəksiz xərclərə yol verməyin. Başqalarına imkan verməyin ki, pullarınıza ağalıq etsinlər.
Günün ikinci yarısı uğurlu, əlverişli vaxtdır. Peşəkar irəliləyişə nail olacaqsınız. Yeni layihə ilə bağlı işlərə başlayın. Şəxsi münasibətlərdə ciddi problemlər olmayacaq. İstənilən çətin vəziyyətdən çıxış yolu var.

Dolça - məqsədə aparan yolda səd və maneələr az olmayacaq. Amma səbrli, təmkinli davranaraq yaşam prinsiplərinizə sədaqətli qalsanız, çətinlikləri dəf edə bilərsiniz. Yeni işlər və ya riskli əməliyyatlarda iştirak maliyyə imkanlarınıza zərbə vura bilər. Praktiki, istehsala yönəlmiş fəaliyyət əhəmiyyətli nəticələr verəcək. Mübahisələrə qatılmayın. Dartışmalarda və fikir toqquşmalarında üstün gəlmək praktiki olaraq mümkün deyil. Belə qələbənin xeyri də yoxdur.

Balıqlar - maraqlı və xoş söhbətlər, uzun zaman unuda bilməyəcəyiniz görüş günüdür. Adətlərinizin bir qismini dəyişin, yaşamınızı daha zəngin edin. Əvvəllər maraqlanmadığınız işlə məşğul olun. Dostlar və yaxınlarınızın təşəbbüslərini dəstəkləyin. Yaradıcılıq potensialınız yüksək deyil. Orijinal ideyaların yaranma ehtimalı azdır. Lakin ətrafınızdakı insanlardan birinin konkret ideyalarını diqqətsiz qoymayın.

Sənədləşdirmə, müqavilə və anlaşma imzalamaq, mühüm sənədlərlə iş üzrə əlverişli gündür. Gəlir ehtimalı azdır.

Alış-veriş uğurlu ola bilər.

Ölkə.Az

ŞƏRH YAZ
0

Acun bu azərbaycanlı uşaqları axtarır — VİDEO

Acun bu azərbaycanlı uşaqları axtarır
21:59
22.10.2018
7167
Maraqlı
A
Türkiyənin məşhur TV aparıcısı, TV8 kanalının rəhbəri Acun İlıcalı videosu internetdə izlənmə rekordu qıran azərbaycanlı uşaqları axtarır.

"Ölkə.Az" xəbər verir ki,  uşaqlar videoda “O səs Türkiyə”ni təqlid edirlər. Onlar özləri üçün studiya da qurublar. Kənd uşaqları yarışmanın “tamaşçılar”ını daşlarda, münsiflər heyətini isə stullarda əyləşdiriblər.

Acun bu videonu instaqram hesabında paylaşaraq “İlk işim sizi tapmaq olacaq” deyə qeyd yazıb.

Ölkə.Az

ŞƏRH YAZ
0
BAĞLA