Bakı şəhərinin baş planı hazırlanır

Bakı şəhərinin baş planı hazırlanır
15:14
17.07.2018
3638
Siyasət
A
Azərbaycan prezidenti İlham Əliyevin tapşırığına əsasən Dövlət Şəhərsalma və Arxitektura Komitəsi Bakı şəhərinin baş planının hazırlanması işinin təşkili prosesinə start verir.

Komitədən “Ölkə.Az”a verilən məlumata görə, bu prosesin beynəlxalq standartlara uyğun təşkil edilməsi və Bakı şəhərinin baş planının ən uğurlu qlobal təcrübəyə əsaslanaraq tərtib olunması məqsədilə Komitə “Böyük Üçlük” adlanan dünyanın ən nüfuzlu üç strateji məsləhətçi şirkətlərindən birini – “The Boston  Consulting Group” şirkətini cəlb edir.

1963-cü ildə yaradılmış “The Boston Consulting Group” şirkəti 50 ölkədə fəaliyyət göstərən 90-dan çox nümayəndəliyini özündə birləşdirən qlobal şəbəkəsi vasitəsilə dünyanın bütün regionlarında dövlət, özəl və qeyri-hökumət sektoruna xidmət göstərir. “The Boston Consulting Group” şirkəti ən iri konsaltinq şirkətlərindən biri olmaqla yanaşı, həm də şəhərlərin zonalaşdırılması və inkişafının planlaşdırılması, komfortlu şəhər mühitinin yaradılması, məşğulluğun transformasiyası, şəhər infrastrukturunun, turizm və nəqliyyatın, sosial sahələrin və sahəvi klasterlərin inkişaf strategiyalarının hazırlanması üzrə geniş beynəlxalq təcrübəyə malikdir və son 5 il ərzində dünyada 550-dən artıq belə layihəni uğurla həyata keçirib. Bu nüfuzlu məsləhətçi şirkəti tərəfindən son dövrdə Moskva, Kiyev, Pekin, Stokholm, Boston, Nyu-York və s. iri şəhərlər üçün belə layihələr reallaşdırılmışdır.

Dövlət Şəhərsalma və Arxitektura Komitəsi “The Boston Consulting Group” şirkəti ilə birgə Bakı şəhərinin baş planının hazırlanması işinin iki mərhələdə təşkil edilməsini planlaşdırır.

Birinci mərhələdə paytaxt ilə bağlı bugünədək hazırlanmış bütün səhərsalma və ərazi planlaşdırılması sənədlərinin, o cümlədən “Böyük Bakının Regional İnkişaf Planı” və “Bakı şəhərinin Ərazidən İstifadə və Zonalaşdırma Planı” layihələrinin təhlil edilməsi nəzərdə tutulur.

Bu mərhələdə mövcud layihələrin aktuallığı yoxlanılacaq, şəhər infrastrukturunun təkmilləşdirilməsi ilə bağlı ehtiyaclar qiymətləndiriləcək, habelə bu sahədə ən uğurlu dünya təcrübəsi və ölkənin inkişaf prioritetləri nəzərə alınaraq Bakının inkişaf konsepsiyası işlənəcək. Bu proses çərçivəsində dünyanın müxtəlif şəhərlərinin baş planları öyrənilərək, müvafiq sahədə qabaqcıl beynəlxalq təcrübə təhlil olunacaq, onun Azərbaycanda tətbiqi imkanları nəzərdən keçiriləcək. Eyni zamanda, birinci mərhələdə Azərbaycan Respublikasının aidiyyəti qanunvericiliyinin, o cümlədən müvafiq şəhərsalma norma və qaydalarının nəzərdən keçirilməsi, təkmilləşdirilməsi zərurətinin dəyərləndirilməsi planlaşdırılır.

Bununla yanaşı, gələcəkdə baş planın reallaşdırılması prosesində iştirak edəcək aidiyyəti dövlət qurumlarının Bakı şəhərinin inkişafı ilə bağlı cavabdeh olduqları sahələr üzrə planları öyrəniləcək, dəqiqləşdirilmə və uyğunlaşdırılma işləri aparılacaq.

Birinci mərhələdə görüləcək bu işlər nəticəsində baş planın hazırlanması prosesinə şəhərsalma və memarlıq planlaşdırılması, abidələrin qorunması, mühəndis kommunikasiya, sosial infrastruktur, ekoloji məsələlər və digər sahələr üzrə yüksək ixtisaslı, peşəkar xarici və yerli təşkilatların və ekspertlərin cəlb olunması üçün müvafiq layihə tapşırıqlarının və tələblərin hazırlanması nəzərdə tutulur.

İkinci mərhələdə Komitə “The Boston Consulting Group” şirkəti ilə birgə birinci mərhələdə müəyyənləşdirilmiş tələblər əsasında nüfuzlu şəhərsalma, memarlıq, mühəndislik şirkətlərini və aidiyyəti ekspertləri əməkdaşlığa cəlb etməklə paytaxtın baş planının işlənməsi prosesini davam etdirərək yekunlaşdırılmasını planlaşdırır. Mövcud qanunvericiliyin tələblərinə uyğun olaraq aidiyyəti dövlət orqanları ilə razılaşdırıldıqdan və ictimai müzakirələr aparıldıqdan sonra Bakı şəhərinin baş planının təsdiq üçün Nazirlər Kabinetinə təqdim olunması nəzərdə tutulur. Azərbaycan Respublikasının Şəhərsalma və Tikinti Məcəlləsinə uyğun olaraq baş plan təsdiq olunduqdan sonra 20 il ərzində qüvvədə olacaq.

Azərbaycan Respublikasının Prezidenti cənab İlham Əliyev və ölkəmizin Birinci Vitse-Prezidenti xanım Mehriban Əliyeva Bakı şəhərinin baş planının hazırlanması işinə xüsusi diqqət ayırır. Ölkə rəhbərliyinin tapşırıq və göstərişlərini rəhbər tutaraq, Dövlət Şəhərsalma və Arxitektura Komitəsi gündən-günə gözəlləşən Bakı şəhərinin növbəti illər ərzində sistemli və davamlı inkişafının, səmərəli şəhərsalma planlaşdırmasının və tənzimləməsinin, sakinlərin rahat və komfortlu yaşayışının, tarixi landşaft və mədəni irs obyektlərinin daha da ciddi qorunmasının təmin edilməsində böyük əhəmiyyəti olan Baş Planın yüksək səviyyədə tərtib edilməsi üçün mövcud olan bütün resurslarını səfərbər edəcək.

ŞƏRH YAZ
0

Cənubi Qafqazın ən güclü xanımının iki ildə gördüyü işlər — FOTO

Cənubi Qafqazın ən güclü xanımının iki ildə gördüyü işlər
22:25
21.02.2019
5434
Siyasət
A
Bu gün Mehriban Əliyevanın Azərbaycanın birinci vitse-prezidenti təyin olunmasından iki il ötür. Mehriban Əliyevanın təyinatı ilə ölkəmizdə rəsmi şəkildə əsası qoyulan vitse-prezidentlik institutu Azərbaycana hansı töhfələri verib?

"Ölkə.Az" bildirir ki, oxu.az iki illik tarixə qısa nəzər salıb:

Qeyd edək ki, bu təyinata kimi M.Əliyeva 2004-cü ildən Heydər Əliyev Fondunun prezidenti, 2005-ci ildən isə Azərbaycan Respublikası Milli Məclisinin deputatı olub. Eyni zamanda, o, UNESCO-nun və ISESCO-nun xoşməramlı səfiridir.

Heydər Əliyev Fondunun prezidenti olaraq “Mehriban ana” adını qazanan birinci xanımın səlahiyyətlərinin artırılması ilə gördüyü işlərin miqyası genişlənib.

O, təyinatı haqqında danışarkən “Ölkəmizin və xalqımızın maraqlarını hər şeydən üstün tutacağam, Azərbaycana layiqincə xidmət etməyə çalışacağam”, - deyə xüsusi vurğulamışdı. 

Birinci vitse-prezident təyinatından bir neçə gün sonra Xocalı soyqırımının 25-ci ildönümü ilə əlaqədar Bakıdakı ümumxalq yürüşündə iştirak etdi. M.Əliyevanın prezident İlham Əliyevlə birlikdə qatıldığı xalq yürüşünə 40 mindən çox insan çıxmışdı. Məqsəd Xocalı soyqırımı qurbanlarının xatirəsini ehtiramla yad etmək, erməni faşistləri tərəfindən insanlığa qarşı törədilmiş bu vəhşi cinayəti yenidən dünya ictimaiyyətinin diqqətinə çatdırmaq idi. 

Daha sonra birinci vitse-prezident “Rossiya 1” telekanalına müsahibəsində görəcəyi işlər barədə danışdı:

“Mən əsas diqqəti sosial problemlərin, əhalinin aztəminatlı təbəqələrinin problemlərinin həlli üzərində cəmləşdirmək istəyirəm. Həqiqi mərhəmət real işlər görülməsini, real məsələlərin həllini, konkret addımlar atılmasını tələb edir. Biganəlik və laqeydlik ən dəhşətli xüsusiyyətdir. Bunlar olmamalıdır – istər ictimai xadim ol, istərsə də dövlət qulluğunda işləyən adam. İnsanlıq hissini qoruyub-saxlamaq lazımdır”.

Mərhəmət prinsipini əsas götürən birinci xanımın ilk müşavirəsi də Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin köçürülməsinə həsr olundu.

Birinci vitse-prezident müşavirədə bildirdi ki, əsas məqsəd qəzalı binalarda yaşayan bütün köçkünləri qarşıdakı iki il ərzində yeni mənzillərlə təmin etməkdir.

Beləliklə, Azərbaycanda qaçqın və məcburi köçkünlərin mənzillərlə təmin olunması istiqamətində yeni gücləndirilmiş işlərə start verildi.

Mehriban Əliyeva daha sonra 2016-cı ilin aprel döyüşlərində yaralanmış əsgər və zabitlərlə görüşdü. O, sözügedən hərbçilərin yüksək texnologiyalı protezlərlə təmin edilməsinə dair tapşırıq verdi.

Aprel ayının 24-də həmin əsgər və zabitlər protezlərlə təmin olundu. 

May ayında Azərbaycanda IV İslam Həmrəyliyi Oyunları keçirildi. Mehriban Əliyevanın sədri olduğu Təşkilat Komitəsi bütün dünyanın diqqətini ölkəmizə yönəltməyi bacardı. Oyunlarda 54 ölkəni təmsil edən üç mindən çox idmançı, mindən çox komanda rəsmiləri iştirak edirdi. Yarış barədə dünyanın bir çox nüfuzlu media orqanı yazılar tirajladı, TV-lər reportajlar verdi.

Mehriban Əliyevanın ilk müşavirəsində məcburi qaçqın və köçkünlərlə bağlı vədinin ilk hissəsi 2017-ci ilin iyunun 27-də gerçəkləşdi. Köçkün ailələrinə Masazır qəsəbəsində yeni mənzillər verildi. Mehriban Əliyeva təqdimat mərasimində şəxsən iştirak etdi. Beləliklə, 1026 məcburi köçkün ailəsi yeni mənzillərlə təmin olundu.

Son iki ildə müxtəlif rayonlarda məcburi köçkün və qaçqın ailəsi mənzillərlə təmin olundu.

Birinci vitse-prezident onlarla şəxsin müalicəsini öz üzərinə götürüb, onlar arasında tanınmışlar da var.

Bu müddətdə M.Əliyeva ölkənin ictimai həyatı ilə yanaşı, siyasi və mədəni həyatında da mühüm rol oynayıb. O, mədəniyyət evlərinin açılışlarında iştirak edib, siyasi xadimlərlə mühüm məsələlərin müzakirəsinə qoşulub.

Cənubi Qafqazın ən nüfuzlu xanımı kimi səciyyələndirilən Mehriban Əliyeva zaman-zaman ana, nənə kimi də gündəmə gəlib. Bəzən nəvələri ilə fotoları yayılan birinci xanımı hərdən mətbəxdə yemək bişirərkən də görmək mümkündür. 

Üç uşaq anası olan Mehriban xanım uşaqlara diqqət və qayğısı ilə seçilir. O, kimsəsiz uşaqlar üçün tikilmiş məktəb və bağçalarda tez-tez olur. Onların yaşayış şəraiti ilə maraqlanır. 

Körpələr üçün ənənəvi olaraq bayram şənlikləri keçirilir, M.Əliyeva həmin şənliklərdə şəxsən iştirak edir. 

Son zamanlarda isə rayonlarda yerli əhali ilə birbaşa görüşlərə qatılan birinci vitse-prezident Mehriban Əliyeva onların problemini birbaşa dinləyir, həlli üçün yerindəcə müvafiq tapşırıqlar veriləcəyini qeyd edir. 

Qeyd edək ki, Mehriban Arif qızı Əliyeva 1964-cü ildə Bakı şəhərində anadan olub. 1982-ci ildə Bakı şəhər 23 №-li orta məktəbi bitirib. Azərbaycan Dövlət Tibb İnstitutunun Müalicə-profilaktika fakültəsinə daxil olub. 1988-ci ildə İ.M.Seçenov adına Birinci Moskva Dövlət Tibb İnstitutunu fərqlənmə diplomu ilə bitirib. Mehriban Əliyeva 1983-cü ildə İlham Əliyevlə ailə həyatı qurub. Leyla, Arzu və Heydər adlı üç övladı və beş nəvəsi var.

Birinci vitse-prezidentin iki illik fəaliyyəti dövründə gördüyü işlərdən bəzilərini fotolarla təqdim edirik:

Ölkə.Az

ŞƏRH YAZ
1

"Gürcüstan parlamenti Xocalı qətliamını soyqırım kimi tanımalıdır" — Gürcü siyasətçi

21:12
21.02.2019
1958
Siyasət
A
"Gürcüstan parlamenti Xocalıda törədilmiş qətliamı soyqırımı kimi tanımalıdır".

"Ölkə.Az" report-a xəbər verir ki, bunu Gürcüstanın Yeni Xristian Demokratlar Partiyasının sədri Levan Çxeidze jurnalistlərə bildirib.

Onun sözlərinə görə, Xocalı faciəsi insanlığa qarşı törədilmiş cinayətdir: "Bu cinayətin müddəti köhnəlmir. Xocalıda günahsız qadın, qoca və uşaqları qətlə yetirənlər layiqli cəzalarına çatmalıdırlar. Növbəti parlament seçkilərində partiyamız qanunverici orqanda yer qazansa, biz Xocalıda törədilənlərin soyqırımı kimi tanınması məsələsini mütləq dəstəkləyəcəyik".

L.Çxeidze deyib ki, Gürcüstan beynəlxalq arenada Azərbaycanın dəstəyinə böyük dəyər verir: "Hər iki dövlət strateji tərəfdaşdır və beynəlxalq təşkilatlarda qarşılıqlı dəstək nümayiş etdirirlər. Regionda sülh tezliklə bərqərar olmalı və bölgə gələcək nəsillərə münaqişələrsiz ötürülməlidir".

Ölkə.Az

ŞƏRH YAZ
0
BAĞLA