Bakıda avtoxuliqanlıq edən sürücü saxlanılıb

Ölkə.Az xezerxeber.az-a istinadən bildirir ki, xarici filimləri xatırladan görüntülər Bakıda Təhlükəsiz şəhər kameralarına düşüb.

Avqustun 18 -də Rəşid Behbudov küçəsində Əlişan Qasımovun idarə etdiyi "Daewo" markalı 90 PX-543 dövlət qeydiyyat nişanlı avtomobilin dayandırılması barədə qərar olduğu üçün yol polisi tərəfindən sürücüyə ''saxla'' əmri verilib.

Ancaq sürücü əmrə tabe olmayaraq hərəkətə davam etdiyindən yol polisi sürücünü təqib etməyə başlayıb. Təqib zamanı dəfələrlə edilən çağırışlara baxmayaraq sürücü ictimai qaydanı və əhalinin dincliyini nümayişkəranə şəkildə pozaraq, cəmiyyətə açıqca hörmətsizlik edən, yol hərəkəti qaydalarını müxtəlif üsullarla davamlı olaraq pozulması ilə müşayiət olunan qərəzli hərəkətlərə yol verərək avtoxuliqanlıq edib.

Sürücünü görülən tədbir nəticəsində Xətai rayonu, Nobel prospektində digər yol polislərinin köməyi ilə süni tıxac yaradılandan sonra dayandırmaq mümkün olub. Araşdırma zamanı Əlişan Qasımovun sürücülük vəsiqəsinin etibarlılıq müddətinin 2016-cı ilin 10 avqust tarixində başa çatdığı və o vaxtdan avtomobili sürücülük hüququ olmadan idarə etdiyi məlum olub. Xətai Rayon Məhkəməsinin qərarı ilə sürücü Əlişan Qasımov İnzibati Xətalar Məcəlləsinin bir neçə maddəsi ilə təqsirli bilinərək nəqliyyat vasitələrini idarə etmək hüququ 1 il müddətinə məhdudlaşdırılmaqla 1 ay müddətində inzibati həbs edilib.