Bakıda içi qızılla dolu “mişka” axtarılır
Filmdə Rusiyadan olan miqrant qadının gizlətdiyi qızıllar, Bakıda isə avtobusda unudulan qızılla dolu oyuncaq axtarılır.
Həm polis, həm də bu xəbərdən məlumatı olan şəxslər paytaxtda içərisində təxminən 4 min manatlıq qızıl olan “mişka”nın axtarışına çıxıblar.
"Ölkə.Az"-ın xəbərinə görə, bu barədə “Sputnik Azərbaycan”a hüquq-mühafizə orqanlarından məlumat verilib.
Nəsimi Rayon Polis İdarəsinin 20-ci Polis Bölməsinə Bakı sakini 1986-cı il təvəllüdlü Emil Xudayev müraciət edib. Onun sözlərinə görə, iyulun 19-da anası 1962-ci il təvəllüdlü Diana Vəliyeva 3 nömrəli avtobusa minib və Mərdanov qardaşları küçəsində düşüb.
Qadın özü ilə içərisində dörd min manat dəyərində qızıl əşyalar olan oyuncaq götürmüşdü. O, “mişka”nı avtobusda unudub. Ailə əvvəlcə oyuncağı özü tapmaq istəyib. Sürücü və bir neçə sərnişinlə söhbətdən sonra məlum olub ki, sonuncu dəfə “mişka”nı azyaşlı oğlan uşağının əlində görüblər.
Polisdən qeyd ediblər ki, hazırda əməliyyatçılar qiymətli oyuncağın axtarışını davam etdirirlər. Ehtimal olunur ki, “mişka”nın yeni sahibləri onun içərisində qızıl olmasını hələ də bilmirlər.
