Bakıda 25 manata görə dost dostunu öldürdü

"Ölkə.Az" xəbər verir ki, cinayət işinin materialları Bakı Ağır Cinayətlər Məhkəməsinə göndərilib.

Cinayət işi hakim Ramella Allahverdiyevanın icraatına verilib. Məhkəmənin hazırlıq iclası noyabrın 27-nə təyin olunub.

Qeyd edək ki, hadisə bu ilin iyunun 17-də Xətai rayonu, Məhəmməd Hadi küçəsində baş verib.

22 yaşlı Cavid Hüseynov aralarında yaranan mübahisə zamanı dostu Mehdi Əlizadəni 8 bıçaq zərbəsi vuraraq öldürüb.

Gənclər arasında münaqişəyə səbəb pul borcu üstündə mübahisə olub. Mehdi Əlizadə Cavid Hüseynovdan hadisədən bir neçə gün əvvəl 25 manat borc alıb. Amma borcu ödəməkdən imtina edib.

Mehdinin bu hərəkəti Cavid Hüseynovu özündən çıxarıb və nəticədə qanlı cinayət baş verib.

İstintaq orqanı tərəfindən Cavid Hüseynovun barəsində Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham elan edilib.

Natiq Allahverdiyev
Ölkə.Az