Bakıda meyiti doğranan qadının əlləri tapılmır

"Ölkə.Az" xəbər verir ki, Suraxanı Rayon Prokurorluğundan BakuPost-a verilən məlumata görə, hadisənin Suraxanı rayonunda törədildiyi məlum olub. Qətlə yetirilən qadının rus milliyyətindən olduğu bildirilsə də, şəxsiyyəti hələlik açıqlanmır. Faktla əlaqədar bir nəfər saxlanılıb. Onun da rus milliyyətindən olduğu bildirilir. Qatillə mərhumun əlaqələri barədə məlumat yoxdur. Yalnız o məlumdur ki, qatil qadının meyitini doğrayıb və hissələrlə ərazidən uzaqlaşdırıb.

Bakı şəhər prokurorluğundan Sputnik Azərbaycana verilən məlumata görə isə, bu gün səhər saatlarında Binəqədi rayonu, 8-ci mikrorayon ərazisində zibil qutusunda aşkarlanan qadın cəsədi bıçaq və balta zərbələri ilə hissələrə ayrılıb.

Sellofan paketlərə qablaşdırılmış qadın bədəni hissələri bu gün səhər 08:00 radələrində aşkarlanıb. Hazırda hüquq-mühafizə orqanlarının əməkdaşları qatilin kimliyini araşdırır. Qətlin mənzildə baş verdiyi ehtimal olunur. Şübhə doğurmamaq üçün qatil cəsədi hissələrə bölüb və sellofan torbalara qablaşdırıb.

Vəhşicəsinə qətlə yetirilən qurbanın 50-60 yaş arasıda olduğu müəyyənləşdirilib.

Məhkəmə tibbi ekspertizasının ilkin rəyinə görə qətl hadisəsi fevralın 15-dən 16-a keçən gecə baş verib. Qətldən dərhal sonra qatil cəsəddən qurtulmaq qərarına gəlib.

Mütəxəssislərin versiyasına görə, qatil kişi cinsinə mənsubdur. Yetirilmiş xəsarətlərə görə qatilin peşəkar qəssab olması da istisna edilmir. Qatil qadının başını bədənindən ayırıb, amma onun üz nahiyyəsinə toxunmayıb. Bu səbəbdən də onun şəxsiyyətini müəyyənləşdirmək şansı var. Amma cəsədin əlləri tapılmayıb. Görünür cani qurbanın barmaq izlərinə görə şəxsiyyətinin müəyyənləşdirilməsinin daha asan olacağını nəzərə alıb.

Faktla bağlı Cinayət Məcəlləsinin 120-ci (qəsdən adam öldürmə) maddəsi ilə cinayət işi başlanılıb. İstintaq davam edir.

Ölkə.Az