Bakıda restoranlar və iaşə obyektlərində monitorinq keçirildi

Bakıda restoranlar və iaşə obyektlərində monitorinq keçirildi
19:11
12.01.2019
3405
Ölkə
A
Mətbuat nümayəndələri təmizləyici qurğular quraşdırılan restoranlar və iaşə obyektlərindəki vəziyyətlə bağlı aparılan monitorinqlərdə iştirak ediblər.

"Ölkə.Az" Report-a istinadən bildirir ki, Ekologiya və Təbii Sərvətlər Nazirliyinin mütəxəssisləri media nümayəndələrinin iştirakı ilə paytaxtın Nizami rayonu ərazisindəki Çobanzadə küçəsində yerləşən bir neçə iaşə obyektinə baxış keçirib, atmosferə atılan tullantılarla bağlı son vəziyyət müşahidə edilib.

Müşahidələr zamanı sözügedən ünvanda yerləşən restoran və şadlıq saraylarında təmizləyici qurğuların quraşdırıldığı məlum olub.

Ərazidə taksi sürücüsü işləyən Elvin Bağırov deyib ki, əvvəlki vəziyyətlə indiki arasında fərq çoxdur:

"Əvvəllər iy-qoxu, qatı tüstü çox olurdu. Düzdür, indi də az da olsa, qoxu hiss olunur, amma fərq çoxdur. Yəni irəliləyiş var. Əvvəllər axşam yeddidən sonra tüstüdən yolu da görmək olmurdu. Paltarımızdan da kabab iyi gəlirdi. Gərək elə dövlət başçısı deyəydi, sonra görərdilər bu işləri?".

Sakin Həmayil Əliyevanın sözlərinə görə, əvvəllər ətrafı bürüyən tüstü və iy-qoxudan dayanmaq olmurmuş: "Şikayət də etmişdik dəfələrlə. İy-qoxudan evdə otura bilmirdik, pəncərəmizi açıq qoya, paltar sərə bilmirdik. Hazırda vəziyyət yaxşıdır, səsimizi eşidənlərə, hökumətimizə təşəkkür edirik. Hamının balası təmiz hava qəbul etsin, elə yaşasın".

Müşahidələr zamanı vəziyyətdən razı olmadığını bildirənlərə də rast gəlinib. Şəhər sakini Yaşar Məmmədov bildirib ki, kababın iyi yenə də hiss edilir: "Əvvəlkinə baxanda bir az dəyişiklik var, amma iy hələ də gəlir, yaxşı olardı ki, borular lap yuxarıdan qoyulsun".

Ekologiya və Təbii Sərvətlər Nazirliyi Milli monitorinq departamentinin direktoru Ramal Bağırov deyib ki, monitorinqlər yenə də davam edir: "Qurğuların quraşdırılması işinə 80-90 faiz nail olunub. Amma qurğunun quraşdırılması sıfır tullantı demək deyil, müəyyən olunan norma var, norma daxilində də müəyyən iyin və tüstüyə bənzər buxarın olması normal haldır".

Mütəxəssis bildirib ki, daim olaraq monitorinqlər aparılacaq, çünki qurğunun normal işləməsi və havaya normadan artıq tullantı buraxmaması üçün mütəmadi servis xidmətləri göstərilməlidir, filtirlər təmizlənməlidir".

Qeyd edək ki, monitorinqlər növbəti günlər şəhərin digər ərazilərində davam etdiriləcək.

Ölkə.Az

ŞƏRH YAZ
0

Bakıda narkotacir tutuldu

Bakıda narkotacir tutuldu
13:38
Bu gün
578
Ölkə
A
Nizami Rayon Polis İdarəsi 23-cü Polis Bölməsi əməkdaşlarının həyata keçirdikləri əməliyyat-axtarış tədbiri nəticəsində narkotik vasitələrin alqı-satqısı ilə məşğul olan şəxslər saxlanılıblar.

DİN-in Mətbuat xidmətindən "Ölkə.Az"a verilən məlumata görə, əməliyyat zamanı əvvəlcə Bakı şəhər sakini Firuz Mehdizadə İbrahim Cəfərovun 242 manat pulunu bankomat kartından oğurladığı üçün polislər tərəfindən tutulub. 

Onun üzərində şəxsi axtarış aparılan zaman 0,185 qram narkotik vasitə heroin aşkar olunaraq götürülüb. F.Mehdizadə ifadəsində heroini Nizami rayonu Keşlə qəsəbəsində yaşayan Gündüz adlı narkotacirdən aldığını bildirib.

Əməliyyat tədbirlərinin davamı olaraq narkotik vasitələrin satışı ilə məşğul olan əvvəllər dəfələrlə məhkum edilmiş Gündüz Tahirov da bölmə əməkdaşları tərəfindən tutularaq istintaqa təqdim edilib. Onun yaşadığı evə baxış zamanı 3,550 qram heroin, 5 kiloqram 10 qram qurudulmuş marixuana, müxtəlif növ psixotrop dərmanlar, 10 ədəd kultivasiya edilmiş çətənə kolu aşkar edilərək götürülüb.

Faktla bağlı saxlanılan şəxslər barəsində Cinayət Məcəlləsinin müvafiq maddələri ilə cinayət işi başlanılıb, istintaq tədbirləri davam etdirilir.

Ölkə.Az

ŞƏRH YAZ
0

Sabah Bakıda 32 dərəcə isti olacaq

Sabah Bakıda 32 dərəcə isti olacaq
13:11
Bu gün
571
Ölkə
A
Sabah Azərbaycanda gözlənilən hava şəraiti açıqlanıb.

Ekologiya və Təbii Sərvətlər Nazirliyinin Milli Hidrometeorologiya Departamentindən "Ölkə.Az"a verilən məlumata görə, Bakıda və Abşeron yarımadasında iyunun 19-da hava dəyişkən buludlu olacaq, əsasən yağmursuz keçəcək. Şimal-qərb küləyi arabir güclənəcək.

Havanın temperaturu Abşeron yarımadasında gecə 20-24, gündüz 28-32, Bakıda gecə 21-23, gündüz 30-32 dərəcə isti təşkil edəcək.

Atmosfer təzyiqi normadan aşağı 756 mm civə sütunu, nisbi rütubət gecə 60-70, gündüz 35-40 faiz olacaq.

Abşeronun Şimal çimərliklərində (Sumqayıt, Novxanı, Pirşağı, Nardaran, Bilgəh, Zaqulba) dəniz suyunun temperaturu 21-22 dərəcə isti təşkil edəcək. Cənub çimərliklərində (Türkan, Hövsan, Sahil, Şıx) şimal-qərb küləyi arabir güclənəcək. Dəniz suyunun temperaturu 23-24 dərəcə isti təşkil edəcək.

Azərbaycanın rayonlarında sabah hava əsasən yağmursuz keçəcək, lakin gecə və axşam bəzi şimal və qərb rayonlarında şimşək çaxacağı, yağış yağacağı gözlənilir. Ayrı-ayrı yerlərdə leysan xarakterli olacağı, dolu düşəcəyi ehtimalı var. Qərb küləyi bəzi yerlərdə arabir güclənəcək.

Havanın temperaturu gecə 19-24, gündüz 30-35, dağlarda gecə 11-16, gündüz 20-25 dərəcə isti təşkil edəcək.

Tibbi-meteoroloji proqnoza gəlincə, iyunun 19-20-də Abşeron yarımadasında mülayim xəzri küləyinin üstünlüyü gözlənilir ki, bu da meteohəssas insanlar üçün müsbət amildir.

Ölkə.Az

ŞƏRH YAZ
0
BAĞLA