Bakıda torpaq sürüşməsi, yaralı var
“Ölkə.Az”ın Fövqəladə Hallar Nazirliyinin (FHN) saytına istinadən verdiyi xəbərə görə, nazirliyin Böhran Vəziyyətlərində İdarəetmə Mərkəzinə daxil olmuş məlumata əsasən, Bakının Suraxanı rayonunda Zığ yolu yaxınlığında qazıntı işləri aparılan ərazidə yaranan torpaq uçqunu nəticəsində orada fəhlə işləyən 1995-ci il təvəllüdlü Bağırzadə Əmirəhməd Vidadi oğlu torpaq altında qalıb.
Xüsusi Riskli Xilasetmə Xidmətinin xilasediciləri dərhal hadisə yerinə cəlb olunub. İlkin olaraq əməliyyat şəraiti qiymətləndirilib. Mürəkkəb şəraiti (hər an yenidən torpaq uçqunu olma təhlükəsi var) nəzərə alaraq, əraziyə Dövlət Yanğından Mühafizə Xidmətininin yanğınsöndürən-xilasedicilərindən ibarət əlavə xilasetmə dəstəsinin cəlb olunması qərara alınıb. Hazırda xilasetmə işləri davam etdirilir. Əlavə məlumat veriləcək.
***
“Ölkə.Az” xəbər verir ki, bu barədə hadisə yerindən məlumat verilib. Bildirilir ki, “BakuBus” şirkətinin qarajı yaxınlığındadır.
Məsələ ilə əlaqədar “Ölkə.Az” olaraq Fövqəladə Hallar Nazirliyinin Xilasetmə xidmətilə əlaqə saxladıq. Xidmətin nümayəndəsi Ehtiram Xəlilov “Ölkə.Az”a bildirdi ki, həqiqətən də hadisə baş verib. Onun sözlərinə görə, bir nəfər yaralanıb.
“Hazırda mən də hadisə yerinə gedirəm. Ərazidə xilasedicilər çalışırlar. Əməkdaşlarımız bildirirlər ki, bir nəfər yaralanıb. Lakin həmin şəxs sağdır”, - deyə Ehtiram Xəlil bildirib.
Ziya Səccad
Ölkə.Az
