Bakıya 89 miqrantı qanunsuz gətirənlər həbs olundu

Bakıya 89 miqrantı qanunsuz gətirənlər həbs olundu
18:10
12.02.2018
916
Ölkə
A
Qanunsuz miqrasiyaya qarşı Dövlət Miqrasiya Xidməti tərəfindən 29 yanvar - 1 fevral 2018-ci il tarixlərdə keçirilmiş tədbirlər nəticəsində mütəşəkkil dəstədə birləşmiş bir qrup şəxs tərəfindən 2017-ci ilin oktyabr ayından başlayaraq Hindistan Respublikasının 89 vətəndaşının külli miqdarda pul vəsaitlərinin ələ keçirilərək Azərbaycan Respublikasında işlə təmin edilməsi adı ilə Bakı şəhərinə turist kimi gətirilmələri, yerləşdirilmələri, viza müddətləri bitməsinə baxmayaraq Azərbaycan ərazisində qanunsuz qalmaları müəyyən edildiyindən toplanmış materiallar hüquqi qiymət verilməsi üçün Baş Prokurorluğa göndərilib.

"Ölkə.Az" xəbər evrir ki, Dövlət Miqrasiya Xidməti və Baş Prokurorluğun mətbuat xidmətlərinin qanunsuz miqrasiya ilə bağlı yaydığı birgə məlumatında deyilir ki, faktla bağlı Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 178.3.1, 178.3.2 (mütəşəkkil dəstə tərəfindən özgənin külli miqdarda əmlakını dələduzluqla ələ keçirmə), 318-1.2.1 və 318-1.2.3-cü (mütəşəkkil dəstə tərəfindən qanunsuz miqrasiyanın təkrarən təşkili) maddələri ilə cinayət işi başlanaraq prokurorluğun və Daxili İşlər Nazirliyinin əməkdaşlarından ibarət istintaq qrupu yaradılıb.

Cinayət işi üzrə miqrantların saxlanıldıqları ünvanlarda, qanunsuz miqrasiyanı təşkil edən şəxslərin yaşayış ünvanlarında baxış, axtarış aparılıb, dindirmə və digər təxirəsalınmaz istintaq hərəkətləri yerinə yetirilib, iş üçün əhəmiyyəti olan zəruri sənədlər götürülüb.

Aparılmış ilkin istintaq hərəkətləri ilə müəyyən edilib ki, Hindistan Respublikasının vətəndaşı Mohammad Sakir və digərləri Hindistan vətəndaşlarını işlə təmin etmək vədi ilə Azərbaycan Respublikasına gəlmələrini, onların hava limanında qarşılanmalarını, əvvəlcədən müəyyən edilmiş yaşayış sahələrində yerləşdirilmələrini təşkil edərək, ölkədə yaşamalarının qanuniləşdirilməsi üçün hər birindən 400-800 ABŞ dolları məbləğində pul alıblar.

Aparılmış istintaq zamanı həmçinin, qeyd olunan cinayət xarakterli əməllərdə Azərbaycan Respublikasının bir sıra vətəndaşlarının da iştirakının qeydə alınması, əcnəbilərin ali təhsil müəssisələrinə qəbul edilmələrini təşkil edəcəyini vəd etmələri, onların bir çoxunun Ramana və Balaxanı qəsəbələrində yerləşdirilməsi, eləcə də onlara Azərbaycan Respublikasında neft sahəsində fəaliyyət göstərən şirkətin adından guya işlə təmin olunmalarına dair saxta sənədlərin də təqdim olunduğu müəyyən edilib.

Cinayət işi üzrə Pakistan İslam Respublikasının vətəndaşı Sajid Fraz, Hindistan Respublikasının vətəndaşları Mohammad Shakir, Alimuddin Shaikh, SK Allarakhanın mütəşəkkil dəstə tərkibində qanunsuz miqrasiyanın təşkili və özgənin külli miqdarda əmlakını dələduzluqla ələ keçirmə əməllərini törətmələrinə əsaslı şübhələr olduğundan onlar Cinayət Məcəlləsinin müvafiq maddələri ilə təqsirləndirilən şəxs qismində cəlb olunaraq barələrində məhkəmənin qərarları ilə həbs qətimkan tədbiri seçilib.

Təqsirləndirilən şəxslərin cinayət əməllərinə məruz qalmış Hindistan Respublikasının vətəndaşları zərərçəkmiş şəxs qismində tanınmaqla, onların, eləcə də təqsirləndirilən şəxslərin Azərbaycan Respublikasının cinayət-prosessual qanunvericiliyində nəzərdə tutulan, hüquqi yardım almaq, tərcüməçinin xidmətindən istifadə etmək və sair hüquqları tam təmin edilmiş, zəruri ərzaq, geyim və tibbi təminatlarla əhatə olunublar.

Mövcud qanunvericiliyin tələblərinə müvafiq olaraq zəruri istintaq hərəkətlərinin icrası yekunlaşdıqdan sonra, cinayət əməllərindən zərər çəkmiş şəxslərin Qanunsuz Miqrantların Saxlanılması Mərkəzlərindən vətəndaşı olduqları ölkəyə göndərilmələri qısa müddət ərzində təmin olunacaq. 

Hazırda cinayətin iştirakçısı olan digər şəxslərin dairəsinin tam müəyyənləşdirilməklə əməllərinə hüquqi qiymət verilməsi istiqamətində zəruri istintaq-əməliyyat tədbirlərinin icrası davam etdirilir. Miqrasiya qanunvericiliyini pozmuş şəxslər barəsində Xarici İşlər Nazirliyi vasitəsi ilə Hindistanın ölkəmizdəki səfirliyi məlumatlandırılıb.

ŞƏRH YAZ
1

Prezidentin əsasnaməsini təsdiqlədiyi komissiya nə iş görəcək?

Prezidentin əsasnaməsini təsdiqlədiyi komissiya nə iş görəcək?
00:29
Bu gün
2280
Ölkə
A
Xəbər verdiyimiz kimi, prezident İlham Əliyev İnformasiya Təhlükəsizliyi üzrə Koordinasiya Komissiyası haqqında Əsasnaməni təsdiqləyən fərman imzalayıb. Bəs bu komissiya nə iş görəcək?

“Ölkə.Az”ın “Oxu.Az”a istinadən məlumatına görə, Komissiyanın əsas işi ölkədə informasiya məkanının təhlükəsizliyinin təmin edilməsi, dövlət və cəmiyyət üçün xüsusi əhəmiyyət kəsb edən infrastruktur obyektlərinin informasiya sistemləri və ehtiyatlarının kiberhücumlardan qorunması, belə təhdidlərin qabaqlanması, qarşısının alınması və araşdırılması sahəsində fəaliyyət göstərən dövlət qurumlarının işinin əlaqələndirilməsidir.

Komissiyanın əsas fəaliyyəti aşağıdakılar olacaq:

- Əvvəlcə ölkənin informasiya təhlükəsizliyinə təhdidləri qiymətləndirəcək;

- Təhdidlərin əsas mənbələri, istiqamətləri, formaları, təsirləri və vura biləcəyi zərər ilə bağlı mütəmadi təhlillər aparacaq;

- Mümkün təhdidlərin qarşısının alınması və qabaqlanması sahəsində müvafiq dövlət qurumlarının fəaliyyətini əlaqələndirəcək, birgə tədbirlər planlaşdıracaq və onların həyata keçirilməsini təmin edəcək;

- Müvafiq sahədə normativ hüquqi bazanın təkmilləşdirilməsi və tətbiq olunması sahəsində əlaqələndirmə işlərini təşkil edəcək.

Komissiyanın vəzifələrindən biri internet informasiya ehtiyatlarında Azərbaycanın milli maraqları əleyhinə məqsədyönlü şəkildə yayılan saxta məlumatların mənbəyini müəyyən etmək və bu barədə müvafiq qurumları dərhal məlumatlandırmaqdır.

Komissiya dövlət qurumlarının, habelə ictimai əhəmiyyətli infrastruktur obyektlərinin fəaliyyətində istifadə olunan proqram təminatının və antivirus proqramlarının yaradılması layihələrini əlaqələndirməlidir, onların təhlükəsizlik tələblərinə uyğunluğunu təhlil etməlidir, habelə açıq kodlu proqram təminatından istifadə imkanlarına baxmalıdır.

İnternet informasiya məkanında Azərbaycanın milli maraqları əleyhinə təbliğat və dezinformasiya xarakterli məlumatlar yayıldıqda, Komissiya hərəkətə keçməli, müvafiq əks-tədbirlərin görülməsi ilə bağlı işlər görməlidir.

Sözügedən komissiya aşağıdakı şəxləri işə cəlb edəcək:

- elmi tədqiqat, təcrübi-mühəndis, texniki ekspertiza, məsləhət xidmətləri və təbliğat-təşviqat işləri ilə bağlı müvafiq sahədə ixtisaslaşmış hüquqi şəxsləri;

- elmi tədqiqat və təhsil müəssisələrini;

- qeyri-hökumət təşkilatlarını;

- kütləvi informasiya vasitələrini;

- müstəqil ekspertləri;

- mütəxəssisləri.

Komissiyanın nəzdində daimi fəaliyyət göstərən Katiblik yaradılacaq. Katibliyin funksiyalarını Azərbaycan Respublikası Xüsusi Dövlət Mühafizə Xidmətinin Xüsusi Rabitə və İnformasiya Təhlükəsizliyi Dövlət Agentliyi həyata keçirəcək.

Ölkə.Az

ŞƏRH YAZ
0

Azərbaycanda aliment problemi — Ödəməyənlər həbs edilir

Azərbaycanda aliment problemi
23:06
21.02.2019
2191
Ölkə
A
Azərbaycanda aliment ödəməkdən boyun qaçıran şəxslərə qarşı inzibati həbs cəzası verilir. Bu gün ölkədə belə hallar tez-tez yaşanır.
"Ölkə.Az" bildirir ki, bunu media.az-a verdiyi açıqlamada Azərbaycan Vəkillər Kollegiyasının üzvü, vəkil Ofeliya Rəhimova bildirib.
 
“İş cinayət təqibi həddinə nadir hallarda çatsa da, inzibati həbslər müntəzəm xarakter alıb”, -deyə Rəhimova qeyd edib.
 
Vəkilin dediyinə görə, hazırda aliment ödəməkdən yayınanlar arasında kişilər üstünlük təşkil edir. Ancaq bəzi hallarda qadınlar da bundan boyun qaçırır. Boşanma hallarında uşaqlar əksər hallarda ana ilə qalır. Əksinə, uşaqlar ata ilə qalırsa, deməli, bunun tutarlı səbəbləri var. Belə olan halda alimenti ana ödəmək məcburiyyətindədir.
 
Hüquqşünas açıqlamasını real həyatdan olan nümunələrlə əsaslandırıb (məlum səbəblərə görə, tərəflərin adları və soyadları göstərilmir):
 
“Bir kişi 2018-ci ilin iyul ayından etibarən iki övladına görə 308 manat aliment ödəməli olsa da, öhdəliyini yerinə yetirməyə tələsmirdi. Nəticədə, iyul ayından dekabr ayına kimi 1540 manat aliment borcu yığılır. İş inzibati həbs həddinə çatdı və o, 15 günlük həbs edildi. Həbs müddətinin başa çatmasından sonra aliment ödəyicisi tələb olunan məbləği ödədi. Başqa sözlə desək, inzibati həbs hər hansı şəxsi aliment ödənişindən azad etmir.
 
Başqa bir misalda, qadın körpəyə görə aliment ödəməli idi. O da ödənişdən boyun qaçırır və nəticədə, 2019-cu ilin yanvar ayına iki min manat məbləğində aliment borcu yığılır. Qadına 10 gün həbs cəzası verilir. Azadlığa çıxdıqdan sonra tələb olunan məbləğin bir hissəsini ödəyir, digər hissəsini sonradan ödəyəcəyinə söz verir”.
 
Bundan əvvəl Milli Məclisin ailə, qadın və uşaq məsələləri üzrə komitəsinin sədri, deputat Aqiyə Naxçıvanlı bu problemə toxunmuşdu.
 
“Bəli, alimentlərlə bağlı həddindən çox problem müşahidə olunur. Alimentləri ödəmirlər, maaşı gizlədirlər, aliment ödəməli olan şəxsi axtarıb tapmaq olmur. Qadınlar yanımıza gəlib göz yaşı tökürlər, ərlərinin aylarla alimenti ödəmədiyini bildirirlər. Məhkəmələrə müraciət edirik, onlar ya tapılır, ya da harasa çıxıb gedirlər. Kimsə qeyri-rəsmi olaraq yeni ailə qurur. Statistika çox qorxuludur, o, həm bizi, həm sizi, həm də ümumilikdə bütün cəmiyyəti narahat edir”, - deyə xanım millət vəkili bildirib.
 

Bu arada, Azərbaycan Vəkillər Kollegiyasının üzvü O.Rəhimova belə işlərin azlıq təşkil etmədiyini qeyd edib. O belə tendensiyaları çoxsaylı boşanmalar və aliment ödənişi tələblərinin artımı ilə əlaqələndirib. Eyni zamanda, nəzərdə tutulmuş ödənişlərin icra olunmasına nəzarət edən icraçıların gördüyü işə diqqət çəkib.

O.Rəhimovanın sözlərinə görə, alimentlərin gecikməsinə səbəb müxtəlif ola bilər. Əsasən, maddi çətinliklər ucbatından baş verir, ancaq elə də olur ki, insanlar ödəniş etməkdən başqa səbəblərə görə imtina edir. Məsələn, keçmiş ər-arvad arasında münaqişə düşəndə, ana atanın uşağı ilə görüşməsinə icazə verməyəndə.

Bundan başqa, mövcud qanunvericiliyə görə, səhhəti ilə əlaqədar, məsələn, cərrahiyə əməliyyatı keçirdiyinə görə alimenti ödəyə bilməyən şəxslərə möhlət verilə bilər. Lakin aliment ödəyicisi bilərəkdən aliment ödənişindən yayınsa, iş inzibati həbs həddinə çatır.

Vəkilin dediyinə görə, hazırda bir nəfərə görə ödənişin minimal məbləği (aliment ödəyicisi işsiz olarsa) 160 manat təşkil edir. Bölgələrdə, yaşayış səviyyəsindən asılı olaraq, bu məbləğ bir qədər aşağı müəyyən edilə bilər.

O əlavə edib ki, qanunvericiliyə görə, alimentlərin ödənilməməsi ilə bağlı qərarlar Azərbaycan Respublikasının İnzibati Xətalar Məcəlləsi və Cinayət Məcəlləsi əsasında çıxarılır.

Məhkəmə və digər orqanların qərarlarının icrası ilə əlaqədar icra məmurunun tələblərinin yerinə yetirilməməsinə görə fiziki şəxslər beş yüz manatdan min manatadək məbləğdə cərimə edilir və ya işin hallarına görə pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur.

Həmin şəxs inzibati həbsdən sonra aliment ödənişindən boyun qaçırdığı təqdirdə Azərbaycan Respublikasının Cinayət Məcəlləsinin 306-cı maddəsinə əsasən, qanuni qüvvəyə minmiş məhkəmə qətnaməsini, hökmünü, qərardadını, qərarını və ya əmrini qərəzli olaraq icra etməmə və ya həmin məhkəmə aktlarının icrasına maneçilik törətməyə görə iki min manatdan dörd min manatadək miqdarda cərimə və ya üç yüz iyirmi saatdan dörd yüz səksən saatadək ictimai işlər və ya iki ilədək müddətə islah işləri və ya üç ilədək müddətə azadlığın məhdudlaşdırılması və ya eyni müddətə azadlığın məhdudlaşdırılması və ya üç ilədək müddətə azadlıqdan məhrumetmə ilə cəzalandırılır.

Ölkə.Az

ŞƏRH YAZ
0
BAĞLA