Bankların birdən-birə dollar satmasının səbəbi məlum oldu
Bir neçə gün idi Bakıda dollar qıtlığı yaranmışdı. Banklar dollar satışını dayandırmışdılar. Bu gündən isə bir neçə bank dollar satışını bərpa edib.
Ölkə.Az xəbər verir ki, "Bank Respublika"nın ardınca "Turanbank", "Dəmirbank", "Kapital Bank" və "AFB Bank" müəyyən limitlə dollar satışını bərpa edib. Maraqlıdır ki, niyə dolların olmadığını deyən banklar, birdən-birə yenidən xarici valyutanın satışına başlayıblar?
Suala cavab tapmaq üçün iqtisadçı ekspert Samir Əliyevlə əlaqə saxladıq. Ekspert Ölkə.Az-a bildirdi ki, dollar qıtlığının səbəbi ölkəyə dollar axınının olmamasıdır. Onun sözlərinə görə, hazırda ölkədən daha çox dollar gedir və valyuta qıtlığı yaranır.
“Yadınızdadırsa, ötən ilin noyabr, dekabr aylarında hərraca 50 milyona yaxın dollar çıxarılırdı. Dünən hərracda 300 milyon pul çıxarıldı. Həmin məbləğ də, bu gün valyuta bazarında öz təsirini göstərdi. Sabah da, hərraca böyük miqdarda pul çıxarılarsa, yenə dollar satışı olacaq”, - deyə S. Əliyev bildirib.
Ziya Səccad
