Baş nazirin Merkellə görüşü Türkiyədə terrorçuların mövqeyini xeyli zəiflədəcək

Görüş bağlı qapılar arxasında keçirilib və 50 dəqiqə davam edib. Baş nazir Binəli Yıldırım Avropanı da maraqlandıran İŞİD, FETÖ və PKK terror qruplaşmaları ilə mübarizə məsələsində dost və müttəfiq Almaniya ilə əməkdaşlıq məsələsində ümidlərinin olduğunu bildirib.

Siyasi ekspertlər hesab edirlər ki, bu görüşlər Türkiyədə tüğyan edən terrorçu təşkilatlarının qüvvətini bir qədər zəiflədəcək. Politoloq Zərdüşt Əlizadə Ölkə.Az-a açıqlamasında bildirib ki, Türkiyənin siyasi xətti dəyişməz olaraq qalır. Onun sözlərinə görə, Türkiyə hökumətinin siyasi kursu bütün güc qüvvələri ilə münasibətləri qorumağa üstünlük verir.

“Ərdoğan hökuməti çalışır ki, Rusiya ilə də münasibətləri yaxşılaşdırsın. Eyni zamanda, ABŞ və Avropa ilə də xoş münasibətlər qurmağa çalışır. Türkiyə üçün Avropa bir nömrəli siyasi-iqtisadi və hərbi müttəfiqdir. Bu səbəbdən də Türkiyə Avropa ilə münasibətləri soyutmaz”,- deyə Z.Əlizadə bildirib.

Siyasətçi deyir ki, Türkiyənin baş naziri Binəli Yıldırım Almaniyanın Münhen şəhərində keçirilən 53-cü "Beynəlxalq Münhen Təhlükəsizlik Konfransı"nda iştirakı və Almaniyanın kansleri Angela Merkel ilə görüşü bu baxımdan atılan addımdır:

“Bu görüş Türkiyədə terroçularla mübarizədə uğur qazanılmaq üçün atılan addımlardandır. Sözdə Amerika və Avropa terrorla mübarizədə Türkiyə ilə birlikdə olsa da, qeyri-rəsmi olaraq PKK və FETÖ terrorçularına yardım edirlər. Türkiyədə terrorçulara dəstəyi kəsmək üçün edilən görüşdür. Düzdür bu görüşdən sonra da terrorçulara edilən dəstək tam kəsilməyəcək. Lakin bu danışıqlar bir qədər terrorçuların qüvvətini azaldacaq və zərərin qarşısı alınacaq”.

Ziya Səccad
Ölkə.Az