\"Beynəlxalq aləmdə İranın qarantı Rusiya və Böyük Britaniyadır\"
Tramp İranı hətta müharibə ilə də hədələyib. Bəzi ekspertlər bildirir ki, ABŞ İranı bir növ mühasirəyə alır. ABŞ-la Rusiya arasında İranla bağlı müzakirələrin getdiyi də deyilir. Hər iki dövlətin Baş Qərargah rəislərinin Bakı görüşündə İranın son dövrlərə aid hərbi fəallığının da müzakirə edildiyi bildirilir.
ABŞ İran münasibətləri və Rusiyanın bu münasibətlərə mövqeyi barədə politoloq Adıgözəl Məmmədov fikirlərini Ölkə.Az-la bölüşüb:
"Bəşəriyyət mövcud olduqca böyük dövlətlər arasında rəqabət mövcud olacaq. Bu insanın xarakterindən irəli gələn bir xüsusiyyətdir. Bu rəqabət inkişafın səbəkarıdır. Bu rəqabət həmişə olacaq, burada qəribə bir şey də yoxdur.
Son dövrlər ABŞ rəhbərliyi İrana qarşı çox ciddi bəyanatlar səsləndirir. SSRİ-nin İran siyasəti üzrə kitab müəllifiyəm. Kitabı yazarkən İranla SSRİ arasında gedən məxfi yazışmaları görmüşəm. 1942 ilin iyun ayında İran, SSRİ, Böyük Britaniya arasında müqavilə imzalanıb. Bu müqavilə ictimailəşməyib. Bu müqavilənin şərtlərinə görə istənilən halda İrana xarici təcavüz olsa, bu digər dövlətlərin maraqlarına toxunur. Həmin müqavilədə İranın qarantı kimi SSRİ və Böyük Britaniya çıxış edir. Rusiya özünü SSRİ dövründə bağlanmış müqavilələrin varisi elan etdi. Onun hüquqi hökmlülüyünü üzərinə götürdü. Böyük Britaniya dağılmayıb. İndiyənə qədər Böyük Britaniya ilə İranın münasibətləri yerində olub. Eləcə də iki dövlətin dipolmatik münasibətləri qaydasında olub.
İrana qarşı müdaxilə həm Rusiya, həm də Böyük Britaniya maraqlarına toxunmaq deməkdir. Ona görə də, ABŞ-ın İranı hədələməsi və "hərbi müdaxilə edəcəm" bəyanatını şərh edəndə bu müqaviləni unutmaq olmaz. Beynəlxalq aləmdə İranın qarantı Rusiya və Böyük Britaniyadır.
Rusiya ilə ABŞ arasında İranla bağlı müzakirələr ola bilər. Hətta hər iki dövlətin Baş Qərargah rəislərinin Bakıda görüşməsində də bu fakt rol oynaya bilər. Bakıdakı görüşdə regionun, Suriya, Yaxın Şərqlə bağlı müzakirələr aparılıb, ancaq İran qırmızı xəttlə gedib".
Səxavət Məmməd
Ölkə.Az
