“Beynəlxalq ictimaiyyəti aldatmaq kursu Ermənistana uğur gətirməyəcək”
Bunu “Ölkə.Az”a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Aydın Mirzəzadə Paşinyanın Azərbaycan və Türkiyənin Ermənistanın sərhədlərini bağlayaraq təcrid vəziyyətində saxlaması barədə səsləndirdiyi fikrə mövqeyini açıqlayarkən deyib.
“Paşinayan növbəti dəfə beynəlxalq tribunadan çıxışı zamanı Ermənistanın əvvəlki rəhəbrləri kimi münaqişə barəsində yalan məlumat verib. O, deməsə də, dünya ölkələri Azərbaycan və Türkiyənin Ermənistanla sərhədinin niyə görə bağlandığının səbəblərini yaxşı bilirlər. Bunun kökündə Ermənistanın Azərbaycan topraqlarının işğalı durur. Ermənistan qonşu ölkələrinə qarşı ərazi iddiası durur. Özünə hörmət edən heç bir ölkə belə bir dövlətlə əlaqə yarada bilməz”.
Onun sözlərinə görə, Ermənistan nə zaman beynəlxalq hüquq normalarına hörmət edərək və bu prinsiplər əsasında Azərbaycan və Türkiyəyə əlaqələr qurmaq istəsə, o zaman sərhədlər açılacaq. Deputat onu da əlavə edib ki, sərhədlərin bağlanmasından və işğal siyasətindən ilk növbədə əziyyət çəkən elə Ermənistanın özüdür:
“Bunun nəticəsi olaraq Ermənistan iqtisadiyyatı çökməkdə davam edir, əhali köç edir, bir dövlət kimi böhran içərisində yaşayır. Nə zaman Ermənistan bu siaysətindən vaz keçərsə situasiya dəyişə bilər. Yoxsa Ermənistanın beynəlxalq ictimaiyyəti aldatmaq kursu Ermənistan uğur gətirməyəcək”-A.Mirzəzadə bildirib.
Mürtəza
Ölkə.Az