“Bəzi azərbaycanlılar düşmənlərimizin sırasında dayanıblar” — Əli Həsənov

“Bəzi azərbaycanlılar düşmənlərimizin sırasında dayanıblar”
20:29
14.03.2018
2855
Siyasət
A
"Vətənpərvərlik hissini itirmək dəhşətli milli faciədir".

"Ölkə.Az"ın məlumatına görə, bunu Azərbaycan Prezidentinin İctimai-siyasi məsələlər üzrə köməkçisi - şöbə müdiri Əli Həsənov "Facebook" səhifəsində yazıb.

Ə.Həsənov qeyd edib: "Bu il Azərbaycan Xalq Cümhuriyyətinin yaranmasının 100 ili tamam olur. Cümhuriyyətimizin yubileyi dövlət səviyyəsində qeyd ediləcək, il ərzində həm Cümhuriyyət, həm Cümhuriyyət dövrü təsis edilmiş ayrı-ayrı qurumlar, həm də Cümhuriyyətimizin qurucuları ilə bağlı silsilə tədbirlər keçiriləcək.

Müsəlman Şərqində respublika üsuli-idarəsinə söykənən ilk demokratik dövlətin, dini, irqi, sosial fərqlərə baxmadan öz müqəddəratını vahid siyasi etnos kimi təyin edən, müasirliyə açıq, dünyəviliyə, liberalizmə sadiq bir icmanın tarix səhnəsinə daxil olması keçmişimizin qürurverici dövrüdür. Müsəlman Şərqi və Şərqi Avropada qadınlara ilk dəfə bərabər hüquqları tanıyan, Şərqdə ilk əlifba və dil islahatı aparan, seçki sistemini liberallaşdıran, ilk yeni teatr və müasir musiqi ənənəsi yaradan və digər ilklərə imza atmış ölkə və etnos olmağımızla necə fəxr etməyək?! Amma Cümhuriyyət sadəcə hüquqi varislik deyil, biz Cümhuriyyətimizin, onun qurucularının mənəvi irsinə varisliyi də bacarmalıyıq. Yalnız dövlətimiz o zaman təsis edilmiş rəsmi qurumların davamçıları deyil, insanlarımız da o böyük irsin, Cümhuriyyət qurucularının mənəvi keyfiyyətlərinin daşıyıcıları olmalıdır".

Prezidentin köməkçisi əlavə edib ki, qurucu ata-babalarımızın həm Cümhuriyyətin mövcud olduğu 23 ay müddətində sərgilədiyi fəaliyyət, həm də Cümhuriyyətin süqutundan sonra mühacirət dövründəki Vətənə, milli dövlətçilik ideallarına sədaqətli xidmət nümunələri mənimsənilməsi vacib olan nümunəvi irsdir:

"Məsələn, Əlimərdan bəy Topçubaşov Azərbaycan Cümhuriyyətinin süqutundan keçən illər ərzində çəkdiyi məşəqqətlərə, düçar olduğu çətinliklərə, düşdüyü maddi sıxıntılara baxmayaraq, cəmi 23 ay yaşamış AXC-yə sədaqətini ömrünün sonunadək qoruyub saxlamışdır. Hərçənd şirnikləndirici təkliflər yetərincə idi. Hələ XX əsrin əvvəllərində qonşu ölkələrdən biri ona hüquqi təhsilinə uyğun olaraq ən yüksək post-nazir postu da təklifi etmişdi.

Bu və ya digər səbəblərdən Vətəndən uzaq düşmüş çoxsaylı həmvətənlərimizin əksəriyyəti keçmiş illərdə və günümüzdə bəhs olunan müsbət ənənəni yaşatsa da, təəssüf ki, heç də hamı haqqında eyni fikirləri söyləmək mümkün deyil. Bəzən bu və ya digər yüksək postu tutmaq müqabilində deyil, sadəcə “komfortlu iaşə obyektindən istifadə imkanı” qazandığına görə milli ideallarımıza xəyanət yolu tutan və milli maraqlarımıza qarşı çıxanlar da tapılır".

Ə.Həsənov sual edir: "Daha komfortlu iaşə obyektlərindən istifadəni reklam etmək, bu və ya digər kuluarlarda, kulislərdə görünmək, doğrudanmı, insanları Qərb dəyərlərinin, liberalizmin, müasirliyin simvoluna çevirir? Özünü Qərb dəyərlərinin daşıyıcı olduğuna inandırmaq milli idealları, dəyərləri, dövlətçiliyi, milli savaşı inkar etməyə əsas verirmi? Komfortlu iaşə obyektlərinin üzərinə şüarlar yazıb, şəkil yapışdırmaq, sosial şəbəkələrin verdiyi imkanlardan sui-istifadə insanı azadlıq mücahidinə çevirirmi?

Yaxın Şərq coğrafiyasında son 10 ildə yaşananlara nəzər salın. Guya hakimiyyətə qarşı mübarizə adı ilə səfərbər olunub antimilli, ekstremist düşərgədə yer alan, əllərində silah doğma vətənlərinin yerlə-yeksan edilməsində həlledici qüvvə kimi istifadə olunan vətəndaşlardan xəbəriniz yoxmu məgər?"

O qeyd edib ki, hazırlandıqları xüsusi düşərgələrdəki komfortlu iaşə obyektlərinə aldanan belə şəxslər öz doğma yurdlarını xarabazarlığa çevirir, doğmalarına komfortsuz həyatı belə dar edirlər. Bütün bu dəhşətləri görmək və müvafiq nəticə çıxarmaq üçün heç də alim, siyasətçi olmağa ehtiyac yoxdur:

"Qərbdə formalaşdırılaraq inkişaf perspektivi olan və Avropanın durğun cəmiyyətinə dinamika nümunəsi göstərən müsəlman ölkələrinə qarşı son illərdə istifadə edilən neçə-necə məkrli ssenariləri, çirkin planları, dəhşətli vətəndaş müharibələrini görmürsünüzmü?!"

Ə.Həsənov bildirib ki, Azərbaycan dövləti öz təhlükəsizliyini bərqərar edərək, coğrafiyamızın sabitlik adasına çevrilib: "İndi bu sabitliyin qəsdinə duranlara, ölkəmizə qarşı istənilən formada mübarizə aparmağa hazırlaşanlara, hətta əllərinə silah alaraq ölkəmizi dağıtmağa belə hazır olanlara üzümü tutaraq sual edirəm: onlarla, yüzlərlə qohum-əqrəbanız sabah Yaxın Şərq və Şimali Afrika ölkələrinin qaçqınlarının nümunəsində sizin məskunlaşdığınız o dövlətlərə üz tutsalar, özünüzü necə hiss edəcəksiniz? Yaxud da “PYD”, “İŞİD” və sairə adlarla silahlandırılaraq qruplaşdırılan dəstələrin sırasında öz ölkənizin sərhədlərini adlayaraq doğulduğunuz, yaşadığınız yurdu yerlə-yeksan etmək missiyası sizə həvalə ediləndə özünüzü necə hiss edəcəksiniz?

Neçə illərdir Avropada yaşayırsınız və yaşadığınız ölkələrdə əxz etməyə çoxsaylı müsbət nümunələr var: vətənpərvərlik nümunəsi, vətəni və xalqı sevmək və təmsil etmək nümunəsi, dinc siyasi mübarizə nümunəsi, həqiqi ictimai fəallıq və s. Amma siz daim tərif və təlqin etdiyiniz bu mədəni Avropada gör nə nümayiş etdirirsiniz? - Opponentlərin ünvanına söyüş və təhqirlər yağdırmaq, dövlət simvollarını aşağılamaq, siyasi rəqibləri mənəvi və fiziki təhqirlərə məruz qoymaq, mənəviyyatsız söyüş və çağırışlar etmək. Nə olardı, heç olmasa aralarında yaşadığınız bu avropalılardan siyasi mübarizə mədəniyyəti öyrənəydiniz. Onların necə siyasi debat apardıqlarını, bir-biri ilə siyasət və opponentlik dilində necə hörmət və izzətlə davrandıqlarını nümunə kimi əxz edəydiniz. Belə bir deyim var: “İnsanlar təkcə bildikləri danışıq dilində deyil, eyni zamanda malik olduqları mədəni-mənəvi keyfiyyətlərinin dili ilə danışırlar”.

Tələbəlik illərindən xatirimdə qalan bir hadisəni danışmaq istəyirəm. Cimmi Karter 1980-ci illərin prezident seçkilərində aktyor Ronald Reyqana məğlub olmuşdu və bir müddət sonra Moskvaya gəlmişdi. O zaman rus jurnalistindən birinin ona ünvanladığı opponenti və ABŞ-ın seçki sistemi haqqındakı yönəldici sualına bilirsinizmi o hansı cavabı vermişdi. O söyləmişdi ki, “mən rəqibimlə öz siyasi mübarizəmi ABŞ-da aparıram, xaricdəsə amerikalıyam və ABŞ-ın maraqlarını təmsil edirəm”.

Ə.Həsənov vurğulayıb ki, bu gün İlham Əliyevin təmsil etdiyi hakimiyyətə qarşı opponentlik edənlər öz mübarizələrini sərbəst formada Azərbaycanda - yerli informasiya resurslarında, sanksiyalaşdırılmış aksiyalarda, parlament tribunalarında aparırlar: "O mübarizənin sərtliyi heç də iaşə müxalifətçiliyindən daha aşağı tonda deyil. Amma buna görə kimsə təqib olunmur, 25 illik müxalifət yenə də öz ampluasındadır və yoluna davam edir. Təəssüf ki, xaricdə yaşayan bəzi azərbaycanlılar bu gün bizim mili davanın sıra əsgərləri deyil, düşmənlərimizin sırasında və ön cərgəsində dayanıblar. Onların Azərbaycan dövlətinə qarşı aksiyaları belə sinxrondur - eynilə bu gün ABŞ-da iaşə müxalifəti və separatçı qurumun planlaşdırdığı aksiyalar kimi. Vətənpərvərlik duyğusunu, Vətən əxlaqını itirmək böyük faciədir. Bu, sadəcə bir fərdin və onun mənsub olduğu ailənin problemi deyil, belələri anti-Azərbaycan dairələrin əlində alətə çevrildikləri üçün bütün xalqımızın problemidir. Bu problemin çözümü ilə ilk növbədə ailələr və xaricdə yaşayan, Vətən əxlaqını qoruyan, Cümhuriyyətin qurucularının mühacir irsinin mənəvi varisi deyə biləcəyimiz diaspor nümayəndələrimiz məşğul olmalıdır".

Ölkə.Az

ŞƏRH YAZ
0

Ərdoğan Trampla Suriya məsələsində razılığa gəldi

Ərdoğan Trampla Suriya məsələsində razılığa gəldi
20:46
14.12.2018
5046
Siyasət
A
Türkiyə prezidenti Rəcəb Tayyib Ərdoğan və ABŞ dövlət başçısı Donald Tramp arasında telefon danışığı olub.

“Ölkə.Az” xarici KİV-ə istinadən xəbər verir ki, bu barədə Türkiyə prezidenti dəftərxanasının yaydığı məlumatda deyilir.

Prezidentlər söhbət zamanı təhlükəsizlik və terrorla mübarizə, həmçinin Suriya məsələsini müzakirə ediblər. Liderlər Suriyada əməkdaşlığı artırmaqla bağlı razılığa gəliblər.

Qeyd edək ki, tərəflər daha əvvəl Argentinada keçirilən G20 sammiti çərçivəsində ikitərəfli görüş keçiriblər.

Ölkə.Az

ŞƏRH YAZ
0

"Yaxın illərdə Azərbaycanda heç bir devalvasiya gözlənilmir" — Millət vəkili

18:21
14.12.2018
8537
Siyasət
A
"Yaxın illərdə Azərbaycanda heç bir devalvasiya gözlənilmir. Ümumiyyətlə, belə bir ssenari yoxdur".

Bu fikirləri "Ölkə.Az"a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü, iqtisadçı alim Rüfət Quliyev bildirib. 

Deputat deyib ki, Azərbaycanın qızıl və valyuta ehtiyyatlarında artım var: 

"Cənab Prezidentin də qeyd etdiyi kimi, artıq Neft Fondunda 4 milyarddan yuxarı artım mövcuddur. Valyuta ehtiyatlarımızda da artım müşahidə olunur. Bu da son ayda 55 milyon dollar təşkil edir. 

Makroiqtisadi göstəricilərə baxanda da Azərbaycanın inkişaf tempinin kifayət qədər yüksək olduğunu görürük. Azərbaycanın tədiyyə balansı müsbət saldo təşkil edir. Ötən ildən büdcədə qoyulan bütün proqnozlar öz əksini tapıb. 

Neftin qiyməti isə 50 dollar səviyyəsinə ensə belə, bu Azərbaycanda ciddi problemlər yaratmaz". 

R.Quliyev maliyyə naziri Samir Şərifovun devalvasiya ilə bağlı son çıxışına da münasibət bildirib:

"Samir Şərifov mənim kimi rusdillidir. Biz onunla bir yerdə təhsil almışıq. Rus dilində təhsil almış insanların əksəriyyəti əvvəlcə beynlərində düşünürərək Azərbaycan dilinə tərcümə edirlər, sonra isə bunu danışırlar. Buna oxşar hallar mənim özümdə də bir neçə dəfə olub. Samir müəllimin fikirlərində həqiqət var. O söyləmişdi ki, daimi möhkəmlənən valyutanın sonunda istehlak bazarında problemlər yaşanır, daxili istehsalçı malını sata bilmir, xaricdən gətirilən mallar daha rahat satılır və sairə. Yəni, yerli malların xaricdə istehsal olunan mallarla qarşı rəqabəti pozulur. Amma Samir müəllim çıxışında gərək onu deməli idi ki, gələcəkdə belə problem yaranmayacaq. Əgər bu proses 20 il indiki sürətlə davam etsə, o zaman Samir Şərifov cənablarının dediyi fikirlərdə müəyyən qədər həqiqət var. Burada digər makroiqtisadi amillər də var. Yəni, bir amili görə devalvasiya ola bilməz. Sadəcə olaraq, Samir Şərifov dövlət adamı, maliyyə naziri olduğu üçün insanların onun söylədiyi hər kəliməni çox ciddi qəbul edirlər".  

Deputat bu məsələ ilə bağlı həmkarı Vahid Əhmədovu da müdafiə edib:

"Vahid Əhmədov ağsaqqal deputatdır, biz tələbə kimi instituta gedəndə Vahid müəllim rəhbər vəzifələrdə çalışırdı. Hazırda da Vahid Əhmədov elmlər namizədidir, peşəkar iqtisadçı və deputat kimi öz işini yaxşı bilir. Mən də bu barədə fikrimi bir alim, professor kimi deyirəm. Vahid müəllim Samir Şərifovun unutduğu bəzi məqamları söyləyib ki, əhali səhv anlamasın. Bu baxımdan da mən də hesab edirəm ki, yaxın vaxtlarda devalvasiya gözlənilmir. Ümumiyyətlə, belə bir ssenari yoxdur və ola da bilməz".  

Bir sıra banklarda dolların bahalaşması məsələsinə də toxunan R.Quliyev bu cür halların yaranmasının əsas səbəbinin son baş verən proseslər olduğunu söyləyib:

"Görünür ki, devalvasiya ilə bağlı son çıxışdan sonra insanlar əsassız şəkildə narahat olmağa başlayıb. Ona görə də əhali arasında ajiotaj yaranıb. Baş verənlərdən sonra kimi dindirirsən, deyir ki, evimdə 1000 manat pul var idi, tez dollara çevirdim və sairə.  Yəni, dollara təlabat artdığı üçün də banklar dolların satışını qaldıra bilərlər. Təbii ki, bu cür hallar valyuta bazarına təzyiq göstərir".   

Vasif Həsənli
Ölkə.Az

ŞƏRH YAZ
0
BAĞLA