"Bizə 36 manat sutkalıq yazırdı, sonra o rəqəmi 536 edirdi...əlimdə sənədlər var" — Tanınmış əməkdar artistdən direktora SƏRT İTTİHAMLAR

13:23
14.08.2019
27599
Mədəniyyət
A

İrəvan Dövlət Azərbaycan Dram Teatrının keçmiş aktyoru, əməkdar artist Vaqif Kərimov "Ölkə.Az"-ın suallarını cavablandırıb.

- Vaqif müəllim, İrəvan Dövlət Azərbaycan Dram Teatrından son illərdə təxminən iyirmiyə yaxın aktyor-aktrisa uzaqlaşdırılıb ki, onlardan biri də sizsiniz. Sizin işdən çıxarılmaq səbəbiniz nə oldu?

- Altmış beş yaş məsələsiylə bağlı işdən çıxarılmışam. İşdən çıxarılanda isə altmış yeddi yaşım var idi. Lakin bütün bunlara baxmayaraq, repertuarın böyük hissəsi mənim çiynimdə idi, əksər tamaşalarda baş rollar oynamışam. Düzdür, dövlətin qanunu var və bununla razılaşmaq borcumuzdur. Ancaq direktor İftixar Piriyev kollektivdə məndən yaşca böyük, təcrübəcə çox kiçik olan aktyoru saxladı.

- Sizcə, İftixar Piriyevin bu qərarı şəxsi qərəzdir, yoxsa idarəçiliyi yaxşı bilmir?

- Təbii ki, şəxsi qərəzdir. Çünki mən onun dediyini etmirdim.

- Məsələn?

- O deyirdi ki, Əjdər Zeynalovu, Elçin Hacıyevi işdən çıxartmışam, niyə onları dəstəkləyirsən? Teatrın həmkarlar təşkilatının idarə heyətinin üzvü idim. İclaslarda yeganə insan idim ki, fikrimi azad şəkildə deyirdim, onların etdiyi haqsızlıqlara göz yummurdum. İkincisi, Əjdər Zeynalovla İftixar Piriyevin məhkəməsində çox kəskin çıxış etdim. Birinci instansiya məhkəmədə Əjdər Zeynalov məhkəməni uddu, apellyasiyada yəqin ki, hansısa yollarla İftixar Piriyev qalib gəldi. 

- Xalq artisti Vidadi Əliyev bir neçə gün öncə saytımıza müsahibəsində bildirmişdi ki, Mədəniyyət Nazirliyinin İftixar Piriyevə gücü çatmır. Sizcə, bir teatr direktoru mədəniyyət nazirindən daha böyük gücə sahib ola bilərmi?

- Bu məsələylə bağlı bir neçə dəfə Mədəniyyət Nazirliyində olmuşam. Baş Prokurorluğa yazdığım məktub nazirliyin hüquq şöbəsinə yönləndirilmişdi. Nazirliyin hüquq şöbəsi də birtərəfli iş apardı. Dedilər ki, faktları düz göstərməmisiniz.

- Fakt deyərkən?

- Məsələn, qastrollarda bizə sutkalıq verilməlidir. Bizə cəmi doqquz manat pul verilirdi, halbuki həmin məbləğ bildiyimə görə əlli manatdan çoxdur. Biz o sənədlərə qol çəkirik, vəssalam. Tutaq ki, mən 36 manata imza atıram, sonra həmin rəqəmin qarşısına beş artırır və olur beş yüz otuz altı manat. İş burasındadır ki, imza da atmısan. Nazirlikdən dedilər ki, sən o şeyi sübut edə bilməzsən.

- Gerçəkdən belə bir fakt olubmu? Yəni, sübutunuz varmı?

- Bəli, sənəd var, şəklini çəkmişəm. 

- İstərdim ki, bir az da gənc həmkarınız Şəbnəm Cəbrayılovanın başına gələnlərdən, yaxud gətirilənlərdən danışaq...

- Əvvəla Şəbnəm çox istedadlı aktrisadır, ikincisi, Şəbnəm yetim uşaqdır, ikinci qrup əlil olan bacısına baxır. İftixar Piriyev ona qarşı bu hərəkəti edəndə, gərək əvvəlcə gözünün qarşısına öz balalarını gətirəydi. İftixar Piriyev, sənin qızlarının atası var, amma bu uşağın atası, anası yoxdur. Amma Şəbnəmin himayəsində gözdən əlil bacısı var. Bu həyatda iki bacıdırlar. Əgər teatrda on iki aktrisan varsa, onların əksəriyyəti yaşlıdırsa, niyə 27 yaşlı Şəbnəm səksən yaşlı qadını oynamalıdır? Əslində, Şəbnəmin dublyoru olan Səmayə İsmayılova Göygöldə istirahət edir, əməkdar artist Esmeralda Şahbazova işə gəlmir. Sadəcə, bu adamları direktorun yaxın çevrəsi olduğu üçün onlara yaşıl işıqdır. Teatrda bir qrup var, kimisə işdən çıxartmaq istəyirlərsə, bir "akt" tərtib edirlər ki, biz filankəslə işləmək istəmirik. 

- O qrupa kimlər daxildir?

- O qrupa İftixar Piriyevin əlaltıları-Natiq Həziyev, Bəhruz Həmidoğlu, Müdvər Nemətova kimi adamlar daxildir. Məsələn, Əjdər Zeynalov işdən çıxarılan gün, saat onun yarısından teatrda idik. Truppa müdiri Müdvər Nemətova Əjdərin üzünə durdu ki, sən işə yarım saat gecikmisən. Halbuki işə bizdən sonra gəlmişdi. Orada kimisə işdən çıxartmaq problem deyil.

- Son 10-15 ildə teatr üçün itki sayılacaq hansı aktyor-aktrisalar işdən uzaqlaşdırılıblar?

- Sizə bir foto təqdim edəcəyəm, orada Şəbnəm Cəbrayılova da oynayır, mən də. Fotodakı 10-15 aktyordan cəmi iki nəfər işdə qalıb. İftixar Piriyev üçün kimisə işdən azad etmək problem deyil. Beş-üç əlaltısını yığır, beş gün əvvələ bir töhmət yazır, sonra da işdən çıxarır. 

- Sizcə, İftixar Piriyevi kim himayə edir? Bir daha qeyd edirəm ki, xalq artisti Vidadi Əliyev müsahibəsində Mədəniyyət Nazirliyinin ona gücünün çatmadığını demişdi...

- Nazirlikdən başqa kim himayə edə bilər ki? Nazirlik marağında olsa, bu adamı işdən çıxardarlar. Elə şeylər var ki, susmaq olmaz. Zori Balayanla İftixar Piriyevin fotosunu kollaj edib səhifələrdə, sosial şəbəkələrdə yaymışdılar. Həmin kollajdan sonra gedib saqqalını qırxıb (gülür). Saqqalı qırxmaq kişilik deyil, kişilik adamın içində olmalıdır. Şəbnəmin başına gələnlər məni çox yandırır. Təsəvvür edin, deyir ki, mən onun hamilə olduğunu bilirdim, amma uşağının olduğunu bilmirdim. Bu açıqlamada hansı məntiq var? Məhər hamilə qadının qarnında kərktənkələ olur?

- İftixar Piriyev xalq artisti Vidadi Əliyevi təhqir edib, onu meymuna bənzədib...

- O, öz səviyyəsini göstərir. Vidadi Əliyev təhqir olunası insan deyil. Vidadi Əliyevin bu teatrın yaşamasında xidmətləri danılmazdır və o, ən azı ağsaqqal kimi işdə saxlanılmalı idi. Bu teatr Vidadinin çiynində gəlib, onun zəhmət ilə formalaşıb. O ki qaldı Şəbnəm məsələsinə, Mədəniyyət Nazirliyinin belə bir rəsmi göstərişi var ki, hər bir tamaşada aktyorların mütləq dublyoru olmalıdır. Bəs Şəbnəmin dublyoru niyə yox idi? Çünki o dublyorlar İftixarın dediyini təsdiqlədikləri üçün istirahətdədirlər. 

- İşə bərpayla bağlı məhkəməyə müraciət etmək fikriniz var?

- Əlbəttə, var. Nazirlikdə mənə dedilər ki, istədiyin teatra səni bərpa edə bilərik. Etiraz etdim ki, məhz öz iş yerimi istəyirəm. Bildirdilər ki, sən onunla işləyə bilməyəcəksən. Əlbəttə, işləyə bilmərəm. Məgər İftixar Piriyev nazirlikdən də böyükdür? Aktyoru nazirlik göndərirsə, onunla işləmək direktorun borcudur. İncəsənət şöbəsinin müdiri İsmayıl İsmayılovun qəbulunda olmuşam, nazirə məktub yazmışam. Bu adam teatr adına, mədəniyyət və incəsənət adına ləkədir. Başqa söz tapmıram. 

İntiqam VALEHOĞLU
Ölkə.Az

ŞƏRH YAZ
0

“Qasımova bacıları hər ay müftə əmək haqqı almaq istəyirdilər”

“Qasımova bacıları hər ay müftə əmək haqqı almaq istəyirdilər”
11:17
Bu gün
1931
Mədəniyyət
A
Azərbaycan Dövlət Akademik Opera və Balet Teatrı Xalq artisti Xuraman Qasımovanın ittihamlarına münasibət bildirib.

"Ölkə.Az" xəbər verir ki, teatrın mətbuat xidmətinin “Qafqazinfo”ya açıqlamasında qeyd olunur:

“Xuraman Qasımovanın səsləndirdiyi fikirlərin heç biri həqiqətə uyğun deyildir. Qasımova bildirir ki, onu və bacısını "cavan qız ikən" Teatrdan uzaqlaşdırıblar. Nəzərə alsaq ki, Xuraman və Fidan Qasımovalarla əmək müqaviləsinə 2005-ci ildə xitam verilib, o zaman F.Qasımovanın 58 (1947-ci il təvəllüdlüdür), X.Qasımovanın isə 54 yaşı (1951-ci ildə doğulmuşdur) var idi. Həm də onlara heç kəs Operada çıxış etməyi qadağan etməyib, sadəcə onlar repertuarda məşğul olmadıqlarına görə, ştatdan azad edilib, tamaşa haqqı ödənilməklə işə keçiriliblər. Onlar bununla razılaşmaq istəmirdilər, ona görə ki, illərlə səhnəyə çıxmadıqları halda hər ay müftə əmək haqqı almaq istəyirdilər.

Nigar Şabanovanın bəyanatına gəldikdə, o artıq öz cavabını alıb, ona cavab verən Xalq artistlərini heç kəs məcbur edib efirə göndərməyib, onlar öz təşəbbüsləri ilə verilişə çıxıb həqiqəti söyləmək istəyiblər. Gənclərə qayğı məsələsi Opera və Balet Teatrında ən yüksək səviyyədədir. Layiq olanlar bu Teatrın səhnəsində öz yerini tutur və onların inkişaf etməsi üçün Teatr rəhbərliyi hər cür şərait yaradır. Son 20-25 il ərzində Opera və Balet Teatrının səhnəsində ilk addımlarını atan gənclərin bir çoxu bu gün artıq yüksək fəxri adlar daşıyırlar, müxtəlif beynəlxalq mükafatlara layiq görülüblər, səsləri dünyanın mötəbər Teatr və konsert salonlarından eşidilir. Xuraman Qasımova bu həqiqətləri görmək istəmir və ya görməməzliyə vurur. Bir daha təkrar etmək istəyirik ki, Opera və Balet Teatrının səhnəsinə heç kəs pul ödəyib gəlmir, burada çıxış etdiklərinə görə onlara pul verilir.

Xuraman Qasımovanın daha bir ittihamı haqqında: "Opera Teatrında səviyyəsiz tamaşalar çoxdur". Əgər Qasımova 2005-ci ildən bu yana Teatra gəlmirsə, tamaşaların səviyyəsi barədə necə mühakimə yürüdə bilər? Opera və Balet Teatrının tamaşalarında xarici qonaqlar, diplomatik korpus nümayəndələri, səfirlər, Azərbaycan elitasının nümayəndələri vaxtaşırı iştirak edirlər. Əgər tamaşaların səviyyəsi onları qane etməsə onlar təkrarən Teatra gələrlərmi? Fikir söyləmək üçün Teatra gəlmək və tamaşalarda iştirak etmək lazımdır.

X.Qasımova "Koroğlu" tamaşası haqqında danışır, atın səhnədə süründüyünü iddia edir. "Koroğlu" operasının hər bir tamaşası "Mədəniyyət" kanalı ilə lentə alınır və sonradan televiziyada nümayiş olunur. Nədənsə atın süründüyünü heç kəs müşahidə etməyib, gülünc və cəfəngiyyat dolu fikirdir. Bu at Teatrın şəxsi atı deyil, o hər dəfə İdman və Gənclər Nazirliyinin tabeliyində olan Atçılıq idmanı və Müasir Beşnövçülük üzrə İOEUPM-dən icarəyə götürülür və qeyd etmək lazımdır ki, hər dəfə Teatra ən yaxşı cins atlar göndərilir.

Daha bir ağ yalan - "teatr bu dəqiqə Sumqayıtdan kənara çıxmır". Qasımovaya demək istəyərdik ki, Teatr nəinki Sumqayıtdan kənara çıxmır, hətta Azərbaycanın hüdudlarından çox-çox kənarda belə qastrol səfərlərində olur. Teatrın muğam və balet truppaları, simfonik orkestri bir çox yaxın-uzaq ölkələrdə - Rusiya Böyük Teatrı, Sankt-Peterburqun Mariinski Teatrı, Belarusun Böyük Akademik Opera və Balet Teatrı, Türkiyənin İstanbul və Ankara Opera və Balet Teatrları, Fransa, Almaniya, Qətər və s. ölkələrdə çıxış etmiş və etməkdədir. 

Teatrın ayrı-ayrı solistlərinin fərdi və qrup halında çıxışlarının coğrafiyası isə daha genişdir. Afaq Abbasova. Fidan Hacıyeva, Samir Cəfərov, Mənsum İbrahimov, Təyyar Bayramov və b. İtaliya, Fransa, Almaniya, Belçika, Avstriya, Çin, ABŞ, Koreya, Böyük Britaniya, Slovakiya, və onlarla başqa ölkələrdə çıxış edirlər. Bu gün Teatrın dirijorları Əyyub Quliyev, Yalçın Adıgözəlov, Orxan Həşimov dünyanın bir çox ölkələrində qastrol səfərlərində olurlar. Teatrın baş rejissoru Hafiz Quliyev Türkiyə, Rusiya, Çin, Belarus, Bolqarıstanda Azərbaycan klassiklərinin əsərlərini səhnəyə qoyur. Baş baletmeyster Kamila Hüseynova və dirijor Yalçın Adıgözəlov hazırda Türkiyədə F.Əmirovun "Nəsimi" baletinin quruluşu üzərində çalışırlar.

Uzun illər bundan əvvəl Azər Rzayevin Teatrda direktor olduğu zamankı qastrolların siyahısını da açıqlaya bilərik: Saratov, Voronej, Omsk, Həştərxan və s. Həm də bunlar A.Rzayevin xidmətləri olmayıb, o zamanki vahid SSRİ məkanında SSRİ Mədəniyyət Nazirliyi tərəfindən respublikalar arasında mədəni mübadilə çərçivəsində baş tutan tədbirlər idi.

X.Qasımovanın daha bir fikri: "mənim tələbəmi Teatra işə götürürlər, kağıza imza atdırırlar ki, "sən demə ki, Xuramanın tələbəsisən". Faktlarla danışmaq lazımdır, xanım. Hansı tələbə belə bir kağıza imza atıb? O nəyisə səhv salıb: Teatra işə qəbul edilərkən, işçilər əmək müqaviləsinə imza atırlar, başqa heç bir sənədə.

Ümumiyyətlə başdan başa yalan və iftiralarla dolu olan bu müsahibəni verməklə X.Qasımovanın özünü ictimaiyyətin yadına salmaq və xatırlatmaq məqsədi güddüyünü düşünürük, başqa cür ola bilməz.

Opera və Balet Teatrının fəaliyyəti haqqında həqiqətləri bu Teatrın daimi tamaşaçıları çox yaxşı bilir, kim bu həqiqəti bilmirsə, onları da tamaşalarımıza dəvət edirik”.

ŞƏRH YAZ
0

Bu gün Rəşid Behbudovun doğum günüdür

Bu gün Rəşid Behbudovun doğum günüdür
09:55
Bu gün
1599
Mədəniyyət
A
Bu gün Azərbaycanın kariyef sənətkarı, SSRİ-nin xalq artisti, Sosialist Əməyi Qəhrəmanı Rəşid Behbudovun doğum günüdür.

"Ölkə.Az" xəbər verir ki, əslən Şuşadan olan R.Behbudov 1915-ci ildə Tiflisdə, vaxtilə bütün şərqdə tanınan xanəndə Məcid Behbudovun ailəsində dünyaya göz açıb. İfaçılığa 1930-cu ildən Tiflisdə başlayan korifey Azərbaycan Dövlət Filarmoniyasının, Opera və Balet teatrının solisti, dövlət konsert ansamblının təşkilatçısı və rəhbəri olub. 1966-cı ildə musiqi və estrada sənətinin balet, pantomima kimi müxtəlif janrlarını özündə birləşdirən mahnı teatrını təşkil edərək, oranın solisti və bədii rəhbəri olub.

Səhnədə olduğu 55 il ərzində Rəşid Behbudov dünyanın 100-dən çox ölkəsinə səfər edib. Dövrünün Stalin, Mao Dze Dun, Cavaharlal Neru, İndira Qandi, Süleyman Dəmirəl, Brejnev kimi məşhur siyasi-ictimai xadimləri Behbudovun səsini dinləmək üçün onun konsertlərinə gəliblər. Rəşid Behbudov həm də milli kinomuzda yaratdığı bənzərsiz rollarla yadda qalıb.

 

Qeyd edək ki, Rəşid Behbudov 1989-cu il iyunun 9-da Moskva şəhərində vəfat edib. Sənətkarın yeganə övladı olan Rəşidə Rəşid atasının yolunu davam etdirir.

 

ŞƏRH YAZ
0
BAĞLA