BMT-nin dəhşətli hesabatı
"Ölkə.Az" xəbər verir ki, hesabata əsasən, aclıqdan əziyyət çəkənlərin sayında artım müşahidə olunub. 2016-cı ildə bu rəqəm 815 milyona çatıb. Buna səbəb isə silahlı münaqişələrdəki artımdır.
Bu barədə BMT-nin ərzaq və kənd təsərrüfatı təşkilatının baş direktoru Joze Qratsianu da Silva məlumat verib:
"Təəssüflər olsun ki, aclıqdan əziyyət çəkənlərin sayı yenə də artır. Təşkilatımızın qiymətləndirməsinə əsasən, 2016-cı ildə 815 milyon insan aclıqdan əziyyət çəkib. Bu rəqəm 2015-ci ilin rəqəmləri ilə müqayisədə 38 milyon nəfər çoxdur. Dünyada silahlı toqquşmaların və təbii fəlakətlərin artması, iqlim dəyişikliyi bu rəqəmlərə təsir edir. Son on illikdə münaqişələrdə qəfil artım müşahidə edilir".
Onun sözlərinə əsasən, münaqişələr iqtisadi tənəzzülə, yanacaq və qida məhsullarının qiymət artımına səbəb olur, istehsala zərbə vurur və kənd təsərrüfatını ciddi təhlükəyə soxur.
"Aclıqdan əziyyət çəkənlərin 60 faizi münaqişə gedən ölkələrdə yaşayır. Faktiki olaraq münaqişələr Nigeriyanın şimali-şərqinin, Somali, Cənubi Sudan və Yəmənin aclığa tabe olmasına səbəb olub. Eyni zamanda Burundi, İraq və digər ölkələrdə ərzaq məhsullarının qıtlığı yaranıb"-deyə da Silva əlavə edib.
Hikmət Həsənov
Ölkə.Az