“Boy çiçəyi” tamaşası nümayiş olundu — FOTO

“Boy çiçəyi” tamaşası nümayiş olundu
10:15
03.10.2016
2216
Mədəniyyət
A

Akademik Milli Dram Teatrında Xalq yazıçısı İlyas Əfəndiyevin xatirəsinə həsr olunan “Boy çiçəyi” tamaşası nümayiş olunub.

Teatrın mətbuat xidmətindən Ölkə.Az-a verilən məlumata görə, səhnə əsərinin nümayişindən əvvəl tamaşaçılar qarşısında çıxış edən teatrın bədii rəhbəri və direktoru, Xalq artisti Azər Paşa Nemət bildirib ki, İlyas Əfəndiyevin “Sən həmişə mənimləsən və yaxud Boy çiçəyi” pyesi ilk dəfə 52 il əvvəl tamaşaya qoyulsa da mövzusu və qaldırdığı problem bu gün də aktualdır: “Oktyabrın 3-də İlyas Əfəndiyevin anım günüdür. Biz özümüzə borc bildik ki, bu gün İlyas müəllimin müəllifi olduğu pyesin əsasında hazırladığımız tamaşanı nümayiş etdirək. İlyas Əfəndiyevin bu əsəri müasir dövrümüzdə də öz aktuallığını saxlayır. Bu günün gəncləri də bu məhəbbət əsərini görməlidirlər. Boy çiçəyi sözünün böyük mənası var. Ona görə qərar gəldik ki, bu tamaşanın adı sadəcə, boy çiçəyi ilə bağlı olsun. Vaxtilə bu tamaşanın baş rollarında xalq artistləri Amaliya Pənahova və Əli Zeynalov oynayıb. İndi isə xalq artisti Fuad Poladov və əməkdar artist Məsmə Aslanqızı çıxış edir. Ümumiyyətlə, tamaşanın çox maraqlı aktyor heyəti var. Ümid edirəm, sizə təqdim olunan səhnə əsərini alqışlarla qarşılayacaq və Akademik Milli Dram Teatrından xoş təəssüratla ayrılacaqsınız”.

Qeyd edək ki, Xalq yazıçısı İlyas Əfəndiyevin “Sən həmişə mənimləsən və ya Boy çiçəyi” pyesi əsasında hazırlanan tamaşanın rejissoru Akademik Milli Dram Teatrının bədii rəhbəri və direktoru, xalq artisti Azər Paşa Nemətdir.

Tamaşada əsas rolları xalq artisti Fuad Poladov, əməkdar artistlər Məsmə Aslanqızı, Hicran Nəsirova, Almaz Amanova, Əjdər Həmidov, Sabir Məmmədov, aktyorlar Nigar Güləhmədova, Elnar Qarayev və Fəridə Əliyeva ifa edirlər.

Ata qayğısından məhrum olan Nargilənin zavod direktoru Həsənzadəyə olan məhəbbətindən bəhs olunan tamaşada cərəyan edən hadisələr bu günümüzlə səsləşir.

Səhnə əsərinin ilk nümayişi 2011-ci il noyabrın 2-də olub.

Ölkə.Az

ŞƏRH YAZ
0

İlham Əliyev və Mehriban Əliyeva Vatikanda Sikstin Kapellası və Müqəddəs Pyotr Kilsəsi ilə tanış olublar — FOTO

İlham Əliyev və Mehriban Əliyeva Vatikanda Sikstin Kapellası və Müqəddəs Pyotr Kilsəsi ilə tanış olublar
00:13
Bu gün
983
Mədəniyyət
A
Fevralın 22-də Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva Vatikanda Sikstin Kapellası və Müqəddəs Pyotr Kilsəsi ilə tanış olublar.

"Ölkə.Az" azərtac-a istinadən xəbər verir ki, Heydər Əliyev Fondu tərəfindən hazırda Vatikanda bir neçə layihə həyata keçirilir.

2019-cu ilin fevral ayında Heydər Əliyev Fondu ilə Müqəddəs Pyotr Kilsəsi arasında imzalanmış müqaviləyə əsasən, Müqəddəs Pyotr Kilsəsinin Bazilikasındakı “Roma Papası I Leon ilə Hun imperatoru Atillanın görüşü” barelyefi və Vatikan Bazilikasındakı katakombalarda yerləşən “Tullius Zethus” məqbərəsi Heydər Əliyev Fondunun maliyyə dəstəyi ilə bərpa edilir və artıq işlər başa çatmaq üzrədir. Bu işlərin bu ilin may ayında başa çatması planlaşdırılır. 2019-cu ilin fevral ayında Heydər Əliyev Fondu ilə Müqəddəs Taxt-Tacın Arxeologiya Şurası arasında imzalanmış müqaviləyə əsasən hazırda “Müqəddəs Komodiliya” katakombalarındakı mavzoleyin bərpası işləri aparılır və layihənin 2020-ci ildə başa çatması nəzərdə tutulur.

2016-cı ildə icrasına başlanan və 2018-ci ildə Azərbaycan Respublikasının Birinci vitse-prezidenti Mehriban Əliyeva və Müqəddəs Taxt-Tacın Mədəniyyət üzrə Pontifik Şurasının sədri Kardinal Canfranko Ravazinin iştirakı ilə açılışı olan “Müqəddəs San Sebastian kilsə-muzey kompleksində katakombaların bərpası” layihəsi çərçivəsində son tamamlama işləri yekunlaşıb.

Heydər Əliyev Fondu tərəfindən həyata keçirilən layihələr müqəddəs Taxt-Tacda çox yüksək qiymətləndirilir. Bu işlər Fondun ümumbəşəri dəyərlərə verdiyi töhfələri bütün dünyaya nümayiş etdirir. Bununla yanaşı, bu layihələr həm də ölkəmizin müxtəlif dinlərin abidələrinə və müqəddəs yerlərinə verdiyi önəmi göstərir. Bütün bunlar isə multikultural dəyərlərə sadiq və bu dəyərləri təşviq edən ölkə kimi Azərbaycanın dünyadakı mövqeyini və yerini, həmçinin dinlərarası dialoqun qurulmasındakı rolunu möhkəmləndirir.

Qeyd edək ki, Sikstin Kapellasının yerləşdiyi bina Vatikanda Renessans dövrü italyan incəsənətinin ən görkəmli abidələrindən biridir. Qeyd olundu ki, 1481-1483-cü illərdə kapellanın divarlarına Musanın və İsanın həyatlarından səhnələr təsvir olunan freskalar çəkilib. XV əsrdə dünya şöhrətli italiyalı heykəltəraş Mikelancelo kapellanın tavanının və mehrab divarının rəsmlərini yaradıb. Bura həm də muzey kimi fəaliyyət göstərir.

Vatikandakı Müqəddəs Pyotr Kilsəsi italyan intibah memarlığının ən məşhur nümunələrindən və dünyanın ən böyük kilsələrindən biridir. Kilsədə ilk Roma Papası hesab edilən Müqəddəs Pyotr dəfn edilib. Bura həm də məşhur ziyarətgah və dini mərasimlər yeridir. Buna görə də erkən xristianlıq dövründən etibarən əksər Roma papaları burada dəfn olunub.

Diqqətə çatdırıldı ki, Müqəddəs Pyotr Bazilikası həm də məşhur ziyarətgah və mərasim yeridir. Roma Papası il ərzində bazilika və ya onun qarşısındakı Müqəddəs Pyotr meydanında bir neçə dini mərasim keçirir.

Ölkə.Az

ŞƏRH YAZ
0

Vəziyyəti ağır olan Rəhman Rəhmanovun SON DURUMU NECƏDİR? — OĞLUNDAN AÇIQLAMA

Vəziyyəti ağır olan Rəhman Rəhmanovun SON DURUMU NECƏDİR?
15:42
22.02.2020
3069
Mədəniyyət
A

Əməkdar artist Rəhman Rəhmanovun səhhətindəki son durumla bağlı aktyorun oğlu, müğənni Emil Rəhmanov “Ölkə.Az”a açıqlama verib. O, bildirib ki, atasının vəziyyəti kritik olaraq qalır:

“Ödündə daş çirk etdiyi üçün, qan təzyiqi və şəkəri yüksəlib, qanına zəhərlənmə verib. Hazırda vəziyyəti ağırdır. Həkimlər atamı əməliyyata hazırlayırlar, saat 17.00-da əməliyyat olunacaq ”.

O, əməkdar artistin əməliyyatı üçün lazım olan məbləğin yığıldığını bildirib:

“Pul məsələsini həll etmişik. Biz heç kəsə pul üçün müraciət etməmişik. Sadəcə, atam 45 ildir səhnədədir, incəsənətdə can qoyub. Düşünürəm ki, dövlət öz incəsənət xadiminə qayğı göstərməlidir”.

Emil Rəhmənov Mədəniyyət Nazirliyindən və Dövlət Kukla teatrından heç bir köməkliyin olmadığını da bildirib.

“Hələ ki, Nazirlikdən və teatrdan, onun müalicəsi üçün heç bir köməklik olunmayıb”,- deyə o, qeyd edib.

Qeyd edək ki, dünən gecə halı pisləşən aktyor Bakı Sağlamlıq Mərkəzinə aparılıb. Hazırda reanimasiyadadır. Həkimlər əməkdar aktyora 12 barmaq bağırsaq yolunun daş bağlaması diaqnozu qoyublar.

Vüsalə Balayeva

Ölkə.Az

ŞƏRH YAZ
0
BAĞLA