Britaniya kraliçasının casusu, mələklərlə danışan astroloq

“Ölkə.Az” bu gün oxucularına bu şəxs barədə qısa məlumat verəcək. Dörd əsrdir ki, Con Dinin adı bir çox yazıçı, dramaturq və şairləri cəlb edib. Onlar arasında Vilyam Şekspir, Ben Conson kimi məşhurlar var.

Kraliça I Yelizaveta ona etibar edirdi. Con saray astroloqu idi. Britaniya imperiyasında XVI əsrin ən böyük kitabxanası ona məxsus idi. Con riyaziyyatçı, Evklidin əsərlərinin tərcüməçisi, kartoqraf, astronom, kabbalist, arxitektor, naviqator və eyni zamanda Britaniya taxtının gizli agenti idi. Di Britaniya kraliçasına məlumatları “007” imzası ilə yazırdı.

İntibah dövrünün titanlarından biri Con Di 1527-ci ilin 15 iyun tarixində anadan olub. Onun atası kral VIII Henrixin saray zabiti olub. Kiçik Con gözəl təhsil alır və 15 yaşından elmlə məşğul olmağa başlayır. Onun ilk addımı Kembric universitetinə qəbul olmaq olur. Ali təhsili başa vuran Con təhsilə davam etmək üçün Hollandiyaya yollanır. Sonra isə həyatı boyu özü elmlə məşğul olur.

Con Şimali Amerika haqqında məlumat toplayır, cəbr, həndəsə, kimya və astronomiya elmini öyrənir. O, kimyəvi təcrübələr aparır, metalları qızıla çevirmək istəyir, qoroskop tərtib edərək insan taleyindən xəbər verir.

Dinin istedadı bir sıra Avropa paytaxtlarında qəbul edilir. Hətta Rusiya çarı Fedoro İoannoviç Cona saray həkimi vəzifəsini təklif edir. Di 1581-1583-cü illər arasında Praqada II Rudolfun sarayında işləyir. Kral onu kimyagərlərin kralı adlandırırdı.

Dinin medium Edvard Kelli ilə nə vaxt tanış olduğu bilinmir. Amma bu tanışlıq və ittifaq unikal təcrübələrin təməlini qoyur. Onlar təcrübələrə peyğəmbər İdrisin şərəfinə “İenoxoy” adını verirlər. Müqəddəs kitablara əsasən, İdris sağ ikən səmaya qeybə çəkilən yeganə peyğəmbərdir.

Kellinin nəzarəti altında Di dəfələrlə ruhlarla əlaqəyə girir, tamaşaçıların gözü qarşısında trans vəziyyətinə düşür, Yerdə heç kəsin anlamadığı dildə danışırdı.

Bəlkə Di bu yolla fırıldaq gələrək pul qazanırdı? Mümkündür.

Məlumdur ki, məşhur astronom İohann Kepler qoroskop tərtib etməyə meylli deyildi. O, deyirdi ki, astrologiya astronomiya elminin “qeyri-qanuni qızıdır”. Amma onun köməyi olmasa, bir çox astronomlar acından ölərdi. Uğura imza atan ilk seans 1581-ci ildə keçirilib.

Medium sirli kristalda Mələk Urieli görür. Mələk ona Emmetin möhürünü necə düzəltmək lazım olduğunu başa salır. Bu talismanla medium digər dünya ilə əlaqəyə girə bilərdi. Növbəti seanslarda səma həmsöhbətləri Di və Kelliyə rabitə yollarını başa saldılar və mələk dilinin əlifbasını verdilər. Sonra isə bu hərflərlə 19 mətn yazıldı.

Di və Kelli striptik seanslarla müştərilərin gələcəyi haqında məlumat verirdilər. Köhnə əlyazmalara inansaq, mələklər agentlərinə monarxın səfərləri barədə tapşırıqlar verir, Böyük armadanın hərəkətini əmr edir, ingilis donanmasına ispan donanması ilə savaşda qalib gəlməyin yollarını deyirdilər.

Kanadalı tədqiqatçı Donald Tayson bildirir ki, Con Di mələklərlə söhbətinə xidmət kimi yanaşırdı. O, konfidensial mənbədən məlumatlar alır və onu zəncirvari qaydada ötürürdü. Bir çoxları isə düşünürdü ki, mələklərin sözü əslində təxəyyül məhsuludur.

Di 1608-ci ildə dumanlı bir gecədə Londonda, köhnə, tərk edilmiş evdə dünyasını dəyişdi. Keçmiş gizli xəfiyyə əlyazmalarını sandıqda gizlətmişdi. Bu sandıq uzun müddət əldən-ələ keçdi. 50 il sonra isə Conson adlı bir şəxs sandığı açdı. Əlyazmaların bir hissəsi xidmətçinin səhvi nəticəsində yanıb. Digər əlyazmalar isə Ellios Eşlonun əlinə keçdi.

O, Con Dinin gündəliyini yığmağa başladı. Bu gündəlik bütün Avropanın arxivlərinə səpələnmişdi. XVII əsrdə Dinin yazılı irsi çap edildi...

Hikmət Həsənov
Ölkə.Az