Brüselldə Aİ ilə hansı məsələlər müzakirə olunacaq?

"Ölkə.Az"ın Report-a istinadən məlumatına görə, bunu Azərbaycan xarici işlər nazirinin müavini Mahmud Məmmədquliyev jurnalistlərə açıqlamasında deyib.

Onun sözlərinə görə, bu görüşdə investisiya, siyasət və təhlükəsizlik məsələlərindən əlavə, digər məsələlər də müzakirə olunacaq: "Şübhəsiz, biz bütün məsələləri əhatə etməyəcəyik, lakin bir neçə məsələləri müzakirə etməyə çalışacağıq. Həmçinin Brüsseldə yeni tərəfdaşlıq prioritetləri müzakirə olunacaq. Bu, yeni addımdır. Biz öz təkliflərimizi vermişik. Avropa İttifaqı da öz təkliflərini verib. Sentyabrın 29-da bu məsələlər müzakirə olunacaq".

Nazir müavini qeyd edib ki, oktyabrın ikinci yarısında isə təhlükəsizlik və insan hüquqları üzrə alt komitənin iclası olacaq: "Enerji məsələləri üzrə alt komitənin iclasının tarixi "Şərq Tərəfdaşlığı" sammitinə hazırlığa görə hələlik dəqiqləşməyib. Düşünmürəm ki, sammitə qədər iclas keçirilsin. Hələlik alt komitələrin iclasları Brüsseldə keçirilir, ona görə də onların təkliflərini gözləyirik. Biz də bunlarla bağlı öz fikirlərimizi bildiririk".