Bu Dövlət Komitələri əməkdaşlıq edəcək
Sabah Əmlak Məsələləri Dövlət Komitəsi (ƏMDK) ilə Dövlət Şəhərsalma və Arxitektura Komitəsi (DŞAK) arasında əməkdaşlıq istiqamətləri, ikitərəfli əlaqələrin perspektivlərinin müəyyən edilməsi ilə bağlı tədbir keçiriləcək.
"Ölkə.Az"ın "Report"a istinadən məlumatına görə, tədbirdə ƏMDK-nın sədri Kərəm Həsənov və DŞAK-ın sədri Samir Nuriyev iki qurum arasında birgə əməkdaşlığa dair memorandum imzalayacaq.
Memorandumun əsas hədəfi daşınmaz əmlakın kadastrı, xüsusi (sahəvi) təyinatlı geodeziya işlərinin aparılması, şəhərsalmanın planlaşdırılması, o cümlədən birgə layihələrin həyata keçirilməsi, bu sahədə innovasiyaların tətbiqidir.
Tədbir çərçivəsində daşınmaz əmlak və torpaq idarəçiliyi sahəsindəki mühüm layihələrdən olan Torpaqların Elektron Kadastr Uçotu Sistemi, yeni yanaşmalara əsasən yaradılmış ünvan reyestri sistemi, o cümlədən müvafiq proqram təminatları və bu sahədə tətbiq olunan innovasiyalar canlı şəkildə nümayiş ediləcək.
