Mətn ölçüsü:
  • 100%

“Bu hadisə dövlətçiliyimiz üçün həyəcan siqnalıdır”

Danılmaz həqiqətdir ki, AXCP-yə Razi Nurullayev sədr seçildikdən sonra partiyamızda əvvəlki bir sıra neqativ hallar aradan qaldırılaraq AXC-nin yaranış missisiyasından irəli gələn dövlətçilik ənənələri bərpa olundu.

AXCP öz tarixi missiyasını bərpa etdi və partiyamız proqramına sadiq qalaraq, dövlətçiyi, ölkəmizin ərazi bütövlüyünü, suverenliyini, eləcə vətəndaşların konstitutsion hüquqlarını müdafiə edir. Bütün mübarizəmiz konstitusiya çərçivəsində aparılır və radikalizmi cəmiyyətin təməl prinsiplərinə qarşı təhlükə hesab edirik. Partiya olaraq, multikultural dəyərlərin qorunması və müdafiəsini təqdir edirik. Ona görə də ölkəmizə qarşı yönələn hər bir dini, milli ayrıseçkiliyə qarşı düşüncəni rədd edirik və bu yöndə də hər zaman mübarizənin önündəyik.

Lakin xaricdə dini təhsil alan bəzi şəxslər, müxtəlif qrupların təsirinə düşənlər ölkəmizə qayıtdıqdan sonra, eləcə də təhsil aldıqları ölkələrdə Azərbaycana qarşı müəyyən radikal-separatçı fikirləri ilə sosial şəbəkələrdə çıxışlar edirlər. Azərbaycanda tarix boyu mövcud olmuş tolerant ənənələrə müdaxilə cəhdi göstərirlər. 

Bu müdaxilələrin mənfi təsirini partiya olaraq biz də hiss edirik.

Belə ki, 03 avqust 2017 ci il tarixdə AXCP sədrinin dini məsələlər üzrə müşavirinin Cebhe.info saytında “İranda məhbusları zorlamaq olar: Ayətullahdan siyasi fitva” adlı yazıda Ayətullah Misbah Yezdinin “Məhbusu zorlamaq Həcc ziyarətinə getmək qədər savabdır. Yaxşı olar ki, müstəntiq öncə dəstəmaz alsın və zikr söyləsin. Qadın məhbusu təklikdə, kişi məhbusu isə başqalarının gözü önündə zorlamaq məsləhətdir” kimi mətbuatda yayılan fətvasını şərh edərkən, məsələyə elmi və dini cəhətdən cavab vermiş, məsələnin dəqiqləşdirilməsinin vacibliyini bildirmişdir. Bu cavab bəzi özünü dindar adlandıran, din pərdəsi altında öz dövlətinə xəyanətkar mövqedən çıxış edən bəzi şəxslərin narazılıqlarına, təhdidlərinə və təhqirlərinə səbəb olmuşdur.

Həmin şəxslər bizə qarşı daima təhqir və dözümsüzlük nümunəsi göstərmiş, indi isə günlərdir sosial şəbəkədə, müxtəlif saxta profillərlə partiyamızı, partiyanın üzvlərini və şəxsən partiya sədri Razi Nurullayevi ən aşağılayıcı sözlərlə təhqir etməkdən, hədələməkdən çəkinmirlər.
Məsələnin üstündən xeyli müddət keçsə də, xüsusən də İran İslam Respublikasında dini təhsil almış bəzi şəxslər hələ də sakitləşmir və polemika və müzakirəni başqa bir müstəviyə yönləndirirlər. Ən təhlükəlisi isə odur ki, bu qaraguruhlar Azərbaycanın suverenliyini, onun ərazi bütövlüyünü və təhlükəsizliyini heçə sayaraq sosial şəbəkələrdə dini-ekstremist fikirləri ilə əhalini dövlətçiliyin əleyhinə çıxmağa, cəmiyyətdə xaos yaratmaq kimi fikirlərlərlə ictimaiyyəti çaşdırmağa çalışırlar. Partiya olaraq bizi daha çox narahat edən bu məsələdir.

Bu hadisə artıq həyəcan siqnalıdır, çünki, bu kimi şəxslər “Nardaran hadisələri”ndə baş verən üzücü olayların yenidən təkrarlanmasına səbəb ola biləcək potensial qüvvələrdirlər. Buna misal olaraq, həmin şəxslərdən biri və ya bir neçəsi - “Facebook” sosial şəbəkədə Bermeki Muttəqi və Əkrəm Hacızadə eləcə də, onların şəbəkələrinin tərəfdarları profillərində dövlətimizin konstitutsiya quruluşu, ərazi bütövlüyü və suverenliyinə təhdid yaradan təbliğatla yanaşı, eələcə də bu dəyərləri müdafiə edən AXCP-yə, onun ideyasına, sədrinə və partiya rəhbərliyinə qarşı təhqiramiz ifadələr işlədir, partiya üzvlərinə çoxsaylı hədə mesajları göndərirlər. 

Azərbaycan Xalq Cəbhəsi Partiyası bu şəxsləri və onların havadarlarını qətiyyətlə pisləyir, sadə vətəndaşları onların toruna düşməməyə çağırır.

Bu dövləti biz əsrlər boyu burada yaşayan çoxluq və azlıqlarla birlikdə yaratmışıq. Azərbaycan hamımızın vətənidir və bizim mübarizəmiz vətəndaşların layiq olduqları həyatı onlara verməkdir. Lakin, dövlətçiliyə qarşı çıxmaq, separatizm meylləri, konstitusiya quruluşunu dəyişmək və ölkədə çaxnaşma yaratmaq cəhdləri qəbuledilməzdir. Eyni zamanda, şəxslərə və siyasi qurumlara qarşı təhqir və hədə-qorxu gəlmək şantaj yolu ilə insanların iradəsinə qarşı zor işləməkdir.

Xalqımızı, siyasi partiyaları, siyasətçiləri və hökuməti bu kimi meyillərə qarşı barışmaz olmağa səsləyirik.

Ölkə.Az