Mətn ölçüsü:
  • 100%

Bu il 150 minə yaxın daşınmaz əmlaka çıxarış verilib

Əmlak Məsələləri Dövlət Komitəsi tərəfindən bu ilin yanvar-sentyabr ayları ərzində görülmüş işlər və qarşıda duran vəzifələrə dair geniş müşavirə keçirilib.

Komitədən “Ölkə.Az”a verilən məlumata görə, Əmlak Məsələləri Dövlət Komitəsinin sədri Kərəm Həsənov müşavirəni açıq elan edərək qeyd edib ki, Azərbaycanda biznes və investisiya mühiti davamlı olaraq yaxşılaşdırılır, məşğulluq səviyyəsi artırılır, vətəndaş məmnunluğu təmin edilir.
 
Həyata keçirilən islahatlar çərçivəsində komitə də fəaliyyət istiqamətləri üzrə cari ilin 9 ayında da ardıcıl olaraq mühüm işlər görüb. “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” Strateji Yol Xəritələrinin hesabatlarında da komitənin fəaliyyəti yüksək qiymətləndirilir. Belə ki, Strateji Yol Xəritələrinin 2017-ci ilin I yarısının monitorinq və qiymətləndirmə nəticələrində bütün istiqamətlər üzrə qiymətləndirilməsi aparılan 47 dövlət qurumu arasında komitə 8-ci yeri tutmaqla, ümumi hədəflərin 53%-nin icrasını təmin edib. Komitə milli iqtisadiyyatın perspektivi üzrə isə Strateji Yol Xəritəsindən irəli gələn məsələləri 70% icra edib. Komitə 9 istiqamət üzrə birinci icraçıdır. Bu  sənədin icrasının təmin edilməsi məqsədi ilə Əmlak Məsələləri Dövlət Komitəsi tərəfindən tədbirlər planı hazırlanmış və həmin istiqamətlər icra edilməkdədir.
 
Qeyd edilib ki, cari ilin 9 ayı ərzində dövlət əmlakının qorunub saxlanılması və ondan səmərəli istifadə olunması ilə bağlı 1032 yaxın monitorinq aktı təhlil edilmişdir. 5000-dən çox dövlət müəssisə və təşkilatlarından illik xüsusi hesabatlar elektron qaydada yığılmış, hazırda sahəvi təhlillər aparılmaqdadır.
 
Bildirilib ki, müasir yanaşmalar tətbiq etməklə özəlləşdirilmə sürətləndirilir, prosedurlar elektronlaşdırılır. Bu sahədə şəffaflığın, operativliyin təmin olunması, rəqabət mühitinin formalaşdırması, iqtisadiyyata investisiyaların cəlb edilməsi istiqamətində işlər davam etdirilib. Prosesə yerli investorların daha fəal cəlb edilməsi məqsədi ilə Azərbaycan Sahibkarlar (İşəgötürənlər) Təşkilatları Milli Konfederasiyası və AZPROMO-nun iştirakı ilə 120-yə yaxın iri yerli holdinq, şirkət, assosiasiya və iş adamının qatıldığı işgüzar forum keçirilib. Forum çərçivəsində Azərbaycan Sahibkarlar (İşəgötürənlər) Təşkilatları Milli Konfederasiyası (ASK) ilə əməkdaşlıq haqqında memorandumun imzalanıb.
 
Komitə tərəfindən istifadəyə verilmiş Özəlləşdirmə portalından yanvar-sentyabr ayları ərzində istifadə edənlərin sayı 600 minə yaxın olub. Ümumilikdə fəaliyyətə başladığı dövrdən portaldan istifadə edənlərin 960 mini keçib.
 
Cari ilin 9 ayı ərzində dövlət əmlakının özəlləşdirilməsi ilə bağlı Bakı və respublikanın rayonları da əhatə olunmaqla ümumilikdə 40-a yaxın hərrac keçirilib.
 
Müşavirədə bildirilib ki, komitə özəlləşdirmə sahəsində innovativ yenilik, xüsusi model olan elektron hərracı istifadəyə verib. İlk olaraq daşınar əmlakın özəlləşdirilməsini həyata keçirən elektron hərrac vasitəsilə ölkə vətəndaşları və iş adamları dünyanın istənilən nöqtəsindən özəlləşdirmə hərraclarına onlayn olaraq qatılıb dövlət əmlakının özəlləşdirilməsində iştirak edə bilərlər.
 
Torpaqların elektron kadastr uçotunun aparılması istiqamətində aparılan işlər çərçivəsində elektron kadastr uçotunun işləri yekunlaşmış 12 rayonda bələdiyyə xəritələrinin hazırlanması üzrə işlər davam edir. Cari ildə 14 rayonunda torpaqların elektron uçotuna alınması işinin tam yekunlaşması nəzərdə tutulur. Ümumi ərazisi 130 min hektar olan 53 rayon mərkəzi və ona bitişik şəhər və qəsəbələrdə  daşınmaz əmlaklar barədə elektron kadastr məlumat bazasının yaradılması, ərazinin rəqəmsal kadastr xəritəsinin tərtibi işləri davam edir. Bu ilin yanvar-sentyabr ayları ərzində 600 min hektara yaxın ərazidə çöl torpaq tədqiqatı, 200 min hektar ərazidə çöl geobotaniki tədqiqat işləri yerinə yetirilib.
 
Vurğulanıb ki, respublikanın 57 şəhər və rayonu, o cümlədən, 156 qəsəbə və 1 533 kənd yaşayış məntəqəsi üzrə 30 minə yaxın küçə və prospekt, 600 mindən artıq giriş ünvan nömrələri Ünvan Reyestri İnformasiya Sisteminə daxil edilib. Cari ilin fevral ayında vətəndaşların istifadəsinə verilən AzNav - ilk rəsmi naviqasiya sistemi istifadəçilərinin sayı 180 minə yaxın olub.
 
Komitə tərəfindən torpaqların səmərəli istifadə olunması və mühafizəsinə nəzarət məqsədilə Bakı və regionlarda monitorinqlər və reydlərin keçirilməsi işləri davam etdirilmişdir. Hesabat dövrü ərzində Azərbaycan Respublikasının İnzibati Xətalar Məcəlləsinin tələblərinə əsasən 744 hal üzrə inzibati protokollar tərtib olunub. Ümumilikdə indiyədək, 1900-a yaxın inzibati protokol tərtib edilib.
 
Müşavirədə bildirilib ki, kənd təsərrüfatı məqsədi ilə 165 min hektara yaxın torpaq sahəsi hüquqi və fiziki şəxslərə icarəyə verilib.
 
Bildirilib ki, daşınmaz əmlakın qeydiyyatı sahəsində 2 yeni elektron xidmət istifadəyə verilib. “Çoxmərtəbəli yaşayış binasında daşınmaz əmlakın dövlət reyestrindən çıxarış almış mənzillərin mövcudluğu barədə məlumatların verilməsi”, “Mənzillərin alqı-satqı müqavilələri üzrə satış qiymətləri barədə məlumatların verilməsi”dir. Növbəti innovativ addım çıxarış və arxivlərin elektronlaşmasıdır. Bununla əhaliyə əmlaklar üzərində çıxarışların elektron formatda təqdim edilməsi mümkün olub.
 
İlk 9 ay ərzində keçirilmiş 17 “Kütləvi çıxarış” kampaniyasının 4-ü paytaxt rayonlarında, 13-ü isə respublikanın müxtəlif şəhər və rayonlarında baş tutub. Daşınmaz əmlakın qeydiyyatı ilə bağlı fəaliyyət göstərən mobil ofislər vasitəsilə 9 ay ərzində vətəndaşlardan 60 mindən çox müraciət qəbul olunub. Ümumilikdə bu il ərzində ölkə üzrə 150 minə yaxın daşınmaz əmlak obyekti üzərində mülkiyyət hüquqları qeydiyyata alınıb.
 
Hesabat dövrü ərzində Əmlak Məsələləri Dövlət Komitəsi ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi arasında əməkdaşlıq memorandumu imzalanıb. Memoranduma əsasən tərəflərin fəaliyyət sahələri üzrə göstərilən xidmətlərdə şəffaflığın artırılması, birgə layihələrin həyata keçirilməsi, innovasiyaların tətbiqi üçün geniş platforma yaradılır.
 
Komitənin çağrı mərkəzinin fəaliyyətinin təkmilləşdirilməsi məqsədilə komitənin aparatında müasir standartlara cavab verən 193 nömrəli vahid çağrı mərkəzi yaradılıb. Komitənin fəaliyyət sahələri üzrə təşkil edilmiş 36 elektron və onlayn xidmətlər vasitəsilə hüquqi və fiziki şəxslər tərəfindən yanvar-sentyabr ayları ərzində 130 mindən çox müraciət daxil olmuş və cavablandırılıb.
 
Cari ilin ilk 9 ayı ərzində regionlarda 9 vətəndaş qəbulu keçirilib, 84 vətəndaş qəbul edilərək müraciətlərinə baxılıb.
 
Müşavirənin sonunda K.Həsənov qarşıdakı fəaliyyətlə bağlı tapşırıqlarını səsləndirib. Strateji Yol Xəritəsindən irəli gələn məsələlərin icrası ilə bağlı işlərin yerinə yetirilməsi və monitorinqlərdə əldə olunan göstəricinin daha da yüksək olması üçün lazımi tədbirlərin vaxtında görülməsi tapşırığını verib. Eyni zamanda Komitənin fəaliyyətinə uyğun olaraq torpaq münasibətlərinin tənzimlənməsinin effektiv aparılması, torpaqların elektron kadastr uçotu sisteminin yaradılması, torpaqların kəmiyyət və keyfiyyət göstəricilərinin müəyyən edilməsi ilə bağlı görülən işlərin sürətlənməsi kimi tədbirlərin icra edilməsini bildirib. Bundan başqa, torpaqların mühafizəsinə dövlət nəzarətinin daha da gücləndirilməsi, daşınmaz əmlakın qeydiyyatı sahəsində şəffaflığın daha da artırılması, vətəndaş məmnunluğunun təmin edilməsi, dövlət əmlakının idarə edilməsi, onun özəlləşdirilməsinin sürətlənməsi  istiqamətində zəruri işlərin görülməsi barədə tapşırıqlarını verib. Qeyd edilib ki, komitə fəaliyyəti üzrə ictimai xidmətlərdə əlçatanlığın və vətəndaş məmnunluğunun təmin edilməsinə xüsusi önəm verir. Bu fəaliyyət istiqamətlərində elektronlaşmanın təmin edilməsi, elektron hərracların daha geniş şəkildə tətbiq olunması, yeni innovativ layihələrin davamlı olaraq həyata keçirilməsi ilə bağlı tapşırıqlarını verib.