\"Bu, İlham Əliyevin xarici siyasət istiqamətində növbəti uğurudur\"

"Ölkə.Az" xəbər verir ki, bunu jurnalistlərə açıqlamasında Milli Məclisin sədr müavini Bahar Muradova deyib. 

B.Muradova qeyd edib ki, Azərbaycan və Belarus strateji tərəfdaşdır: 

"Dövlətlərimiz bir çox vacib məsələlərdə qarşılıqlı faydalı əməkdaşlıq həyata keçirir. Bir çox məsələlərdə möbqe birliyi var. Bu səfər zamanı səsləndirildi ki, hər hansı bir xəbərdarlıq müzakirə olunmadan hər iki dövlət bir-birinin maraqlarını qarşılıqlı şəkildə bütün müstəvilərdə qoruyur və bunun nümunələrini bu günə qədər göstəriblər"

Vitse-spiker deyib ki, bu səfər həm müzakirə olunan məsələlər, həm imzalanan sənədlər, həm də hər iki prezidentin verdiyi bəyanatın ruhu ilə diqqəti çəkdi: 

"Dağlıq Qarabağ münaqişəsi, o cümlədən bu tip konfiliktlərin beynəlxalq hüququn prinsipləri, dövlətlərin ərazi bütövlüyü və suverenliyi prinsipləri əsasında həll olunmasının vacibliyinin vurğulanması onu göstərir ki, getdikcə dünyada bu mövqeni dəstəkləyən ölkələrin sayı çoxalır. Azərbaycan və Belarus da bu kimi məsələlərdə öndə gedən dövlətlərdir. Eyni zamanda bizim xalqlarımızın, müvafiq dövlət qurumlarının, o cümlədən prezidentlərimizin möhkəm dostluğunun münasibətlərə çox müsbət təsir göstərdiyinin şahidi oluruq. Hesab edirəm ki, bu prezident İlham Əliyevin xarici siyasət istiqamətində növbəti uğurudur".

Vasif Həsənli
Ölkə.Az