\"Cəbhə xəttində vəziyyətin gərginləşdirilməsi birbaşa daxildə olan məsələlərlə bağlıdır\"

Bəzi ekspertlər iddia edir ki, bu gərginlik aktiv döyüşlərin yenidən başlaması ilə nəticələnə bilər. Erməni politoloqlar isə hətta aprel ayında savaşın qızışacağı ilə bağlı siqnallar veriblər.

Cəbhədə baş verən gərginlik və bunun səbəbləri barədə hərbi ekspert Üzeyir Cəfərov fikirlərini "Ölkə.Az"-la bölüşüb: 

"Erməni politoloqları, siyasətçiləri çox fikir səsləndirirlər. Onların dediklərinin 30%-nə inanmaq olmaz. Son günlər cəbhədə baş verənlər Sərkisyanın Ermənistanın müdafiə nazirliyində keçirdiyi görüşdən sonra baş verir. Həmin görüşün açıq hissəsindən əlavə qapalı hissəsində Sərkisyan generallara və nazirliyin rəhbərliyinə ciddi tapşırıqlar verib. Tapşırıqlar ondan ibarətdir ki, hakimiyyətin ömrünü uzatmaq lazımdır.

Aprel ayında Ermənistanda keçiriləcək parlament seçkiləri Sərkisyan komandasının taleyini həll edə bilər. Cəbhə xəttində vəziyyətin gərginləşdirilməsi birbaşa daxildə olan məsələlərlə bağlıdır. Əvvəllər kiçik çaplı silahlardan istifadə edirdilərsə, artıq artilleriyadan da istifadə edirlər. Bu da onunla əlaqədardır ki, Ermənistanda vəziyyət Sərkisyan üçün arzuolunmaz bir həddə çatıb. Onun ən yaxın silahdaşlarından biri, Seyran Ohanyan Sərkisyandan və onun fəaliyyətindən narazı olduğu barədə bəyanat verib. Əgər Seyran belə bir bəyanat verirsə, digərləri Ermənistanda hakimiyyət dəyişikliyinə çalışan şəxslərdir.

Cəbhədə baş verənlər adi məsələ deyil. Bundan sonra hadisələr bir qədər də gərginləşəcək. Ordumuz son dərəcə ehtiyatlı, diqqətli olmalıdır. Lokal xarakterli də olsa, toqquşmaların baş verməsi mümkündür".

Səxavət Məmməd
Ölkə.Az