“Cibgir Sevda” yenidən saxlanıldı
Bu barədə "Ölkə.Az"a Daxili İşlər Nazirliyinin mətbuat xidmətindən məlumat verilib.
Belə ki, Nizami Rayon Polis İdarəsinin 24-cü Polis Bölməsinin əməkdaşları tərəfindən yanvarın 12-də C.Naxçıvanski küçəsində yerləşən bazarda Bakı şəhər sakini S.Babayevanın çantasından içərisində 139 manat olan pulqabısını oğurlamaqda şübhəli bilinən Şirvan şəhər sakini, əvvəllər məhkum olunmuş Sevda Qənbərova saxlanılıb.
Xatırladaq ki, Sevda Qənbərova analoji əmələ görə, dəfələrlə məhkumluq həyatı yaşayıb. Sonuncu dəfə isə 2014-cü ildə Bakı Ağır Cinayətlər Məhkəməsinin hökmü ilə azadlıqdan məhrum edilən 1964-cü il təvəllüdlü Sevda Qənbərovanın əvvəllərdə oğurluq cinayətinə görə 5 il müddətinə azadlıqdan məhrum edildiyi məlum olub. Ancaq cəzasının çəkilməmiş hissəsindən (7 ay 9 gün) Xətai Rayon Məhkəməsinin 5 iyun, 2014-cü il tarixli qərarına əsasən vaxtından əvvəl şərti olaraq azad edilib.
Cəmisi 4 ay azadlıqda olan Sevda Qənbərova yenidən cibgirliyə əl atıb. O, 19 noyabr, 2014-cü ildə günorta saatlarında “8-ci km bazarı”nda Səbirə Dəmirovanın çantasından içərisində cəmisi 41 manat olan pulqabını oğurlayıb. Nizami Rayon Polis İdarəsinin (RPİ) 24-cü polis bölməsinin (PB) əməkdaşları tərəfindən hadisə yerində yaxalanan S.Qənbərova cinayət əməlini başa çatdıra bilməyib. Qeyd edək ki, Sevda Qənbərova “Cibgir Sevda” ləqəbi ilə məşhurdu.
