\"Dağlıq Qarabağ probleminin memarı, yaradıcısı və bu gün status-kvonun dəyişməməsinin əsas səbəbkarı Rusiyadır\"

Təlimlərin keçiriləcəyi vaxtda Türkiyə prezidenti Rusiyaya səfər edəcək. Erməni mediası bu məsələni gündəmdə saxlayır və daha çox diqqət ayırır.

Ümumiyyətlə, son dövrlər erməni tərəfi hərbi təlimlərinin sayını artırıb. Bu isə ekspertlər tərəfindən Ermənistanın müharibəyə hazırlaşması kimi qiymətləndirilir.

Azərbaycan-Türkiyə birgə hərbi təlimləri və ermənilər tərəfindən hərbi təlimlərin sayının artırılmasını hərbi ekspert Üzeyir Cəfərov "Ölkə.Az"-a şərh edib:

"May ayının 1-dən başlayacaq təlimlər Azərbaycan silahlı qüvvələri üçün çox önəmlidir. O nöqteyi-nəzərdən ki, bu günə qədər Azərbaycanla Türkiyə bir neçə dəfə birgə hərbi təlimlər keçirib, ancaq Türkiyədə baş verən son olaylardan sonra bu təlimlər bir qədər arxa plana keçmişdi. Bundan sonra bu təlimlərin davamı gələcək. Hesab edirəm ki, hər iki ölkə üçün bu, lazımi təlimlərdir.

Türkiyə prezidenti mayın-3-də Rusiyaya səfər edəcək. Erməni mətbuatı təlimlə bu səfərin eyni vaxta düşməsini özünəməxsus şəkildə yozmağa başlayıb. Burada yozulası heç nə yoxdur. Azərbaycan-Türkiyə hərbi təlimləri çoxdan planlaşdırılmışdı. Ərdoğanın Rusiyaya səfəri Suriya və digər məsələlərlə bağlıdır. Bu səfərdə Dağlıq Qarabağla bağlı məsələlər də müzakirə olunacaq, ancaq müzakirələrdən heç bir nəticə əldə edilməyəcək. Çünki Dağlıq Qarabağ probleminin memarı, yaradıcısı və bu gün status-kvonun dəyişməməsinin əsas səbəbkarı Rusiyadır. Rusiyadan isə hər hansısa bir addım gözləməyin mənası yoxdur.

Təlimlər bizim silahlı qüvvələrimiz üçün yeni bir məşqdir. Bundan əvvəl də Azərbaycan silahlı qüvvələri Türkiyənin iştirakı ilə həm gündüz, həm də gecə təlimləri icra etdi. Bundan əlavə, Azərbaycan silahlı qüvvələri həm Türkiydən, həm də digər ölkələrdən müəyyən silahlar, sursatlar əldə edib. Həmin silah-sursatlar təlimdə sınaqdan keçiriləcək. Bu təlimlər Azərbaycan silahlı qüvvələri üçün bilik və bacarıq əldə etmək üçün gözəl şansdır".

Erməni tərəfinin təlimlərin sayını artırması məsələsinə gəldikdə isə hərbi ekspert bildirdi ki, erməni tərəfinin təlimlərin sayını artırması Azərbaycanı təxribata çəkmək cəhdidir:

"Erməni ordusunda Rusiyanın göstərişi və təhriki ilə bu təlimlər keçirilir. Ermənilərin keçirdiyi bu təlimlər Azərbaycan silahlı qüvvələrini açıq-aşkar təxribata çəkməkdir. Son vaxtlar Ağdamda, Uzundərədə neçənci dəfədir ki, təlimlər keçirirlər. Bu təlimlər Azərbaycan tərəfinin əsəbləri ilə oynamaqdır. Erməni tərəfi bu təlimləri ona görə keçirir ki, Azərbaycan tərəfi qıcıqlansın, toqquşma baş versin. Məqsəd isə toqquşmanin nəticəsi kimi iki ölkə prezidentini bir araya gətirməkdir. Erməni tərəfi çalışır ki, iki prezident arasında, nəyin bahasına olursa olsun, görüş keçirilsin. Bu, ATƏT üçün son dərəcə önəmli məsələdir. Bu gün ATƏT-i Dağlıq Qarabağ məsələsi ikinci dərəcəli məsələ kimi maraqlandırır. Onlar üçün əsas məsələ hesabat tərtib etmək, öz varlığını sübut etmək, iki prezidenti danışıqlar masası arxasına gətirməkdir. Rəsmi Moskva çalışır ki, Elmar Məmmədyarovla Elbard Nalbadyanı bir araya gətirsin. İncə hazırlanmış bir senari həyata keçirilir. Bu senarinin tərkib hissəsi kimi öncə xarici işlər nazirlərinin görüşü, ATƏT sədrinin, Minsk qrupunun həmsədrlərinin regiona səfərləri və sonda prezidentləri bir araya gətirməkdir".

Səxavət Məmməd
Ölkə.Az