Daşkənddə Müslüm Maqomayevin xatirə gecəsi keçirilib

“Ölkə.Az” AZƏRTAC-a istinadən xəbər verir ki, Özbəkistan Nazirlər Kabinetinin nəzdindəki Millətlərarası Münasibətlər və Xarici Ölkələrlə Dostluq Əlaqələri Komitəsinin binasında keçirilən tədbirdə hər iki mərkəzin, eləcə digər mədəniyyət qurumlarının rəhbərləri, üzvləri, Daşkənddə yaşayan soydaşlarımız iştirak ediblər.

Tədbir iştirakçıları əvvəlcə böyük sənətkarın həyat və fəaliyyətini, eləcə də ümummilli lider Heydər Əliyev ilə görüşlərini əks etdirən fotosərgi ilə tanış olublar.

Respublika Azərbaycan Milli Mədəniyyət Mərkəzinin sədri Firdovsi Hüseynov Müslüm Maqomayevin həyat və yaradıcılığı barədə məlumat verərək deyib ki, böyük sənətkar nəinki Azərbaycanda, bütün dünyada tanınır və sevilir.

Rus Mədəniyyət Mərkəzinin sədri Aleksandr Aristov bildirib ki, Müslüm Maqomayevin mahnılarını bütün millətlər və xalqlar özününkü kimi qəbul edir. Ona görə də böyük sənətkarın mahnıları insanları və xalqları birləşdirir.

Konsert müğənni Valeri Klimovun ifasında “Azərbaycan” mahnısı ilə başlayıb. Sonra Salix Absalamov müəllifi olduğu və böyük sənətkara həsr etdiyi “Azərbaycan sevgi diyarıdır” mahnısını ifa edib. Konsertdə Ulyana Semyonovanın, Roman Muravlevin və başqalarının böyük sənətkarın mahnılarını ifa etmələri tamaşaçılar tərəfindən böyük maraqla dinlənilib.

İfaçılara Respublika Azərbaycan Milli Mədəniyyət Mərkəzinin və Rus Mədəniyyət Mərkəzinin fəxri fərmanları təqdim olunub.

Ölkə.Az