Dələduz sabiq prokurorluq işçisi azadlığa çıxmaq istəyir
"Ölkə.Az"ın məlumatına görə, 9 saylı cəzaçəkmə müəssisəsində cəza çəkən Şükürov Ələmşah Nəsib oğlu bunula bağlı Xəzər Rayon Məhkəməsinə müraciət edib. Ancaq 1-ci instansiya məhkəməsi məhkumun şikayətini təmin etməyib. 20 iyun tarixində Bakı Apellyasiya Məhkəməsində hakim Mirzəli Abbasovun sədrliyi ilə Ələmşah Şükürovun şikayətinə baxılacaq.
Xatırladaq ki, Şükürov Ələmşah Nəsib oğlu uzun müddət prokurorluq orqanlarında çalışıb. Qusar rayon Prokurorluğunun böyük müstəntiqi olan Ələmşah Şükürov prokurorluq işçisinin nüfuzuna xələl gətirən və müstəntiq vəzifəsi ilə bir araya sığmayan hərəkətlərə yol verdiyinə və “Azərbaycan Respublikası Prokurorluğu işçilərinin Etik Davranış Kodeksi”nin tələblərini kobud şəkildə pozduğuna görə Baş Prokurorluq üzrə 25 noyabr 2009-cu il tarixli əmrlə rütbədən məhrum olunmaqla prokurorluq orqanlarından xaric edilib. Aparılmış araşdırmalarla müəyyən edilib ki, Ə. Şükürov xidməti vəzifəsinin icrası ilə əlaqədar qulluq səlahiyyətlərindən qulluq mənafelərinə qəsdən zidd olaraq istifadə etməklə ayrı-ayrı vətəndaşların etibarından sui-istifadə edərək dələduzluq yolu ilə onların əmlakını ələ keçirib, bununla da fiziki şəxslərin qanunla qorunan hüquqları və qanuni mənafelərinə mühüm zərər vurub. Faktla bağlı Azərbaycan Respublikası Cinayət Məcəlləsinin 308.1, 178.2.3 və 178.2.4-cü maddələri ilə cinayət işi başlanıb.
Daha sonra cinayət işi tamamlanaraq məhkəməyə göndərilib. Məhkəmə Ə.Şükürovu həbs etməyib və vətəndaşlara vurduğu ziyanı ödəməsi ilə bağlı qərar çıxarıb. Lakin Ə.Şükürov növbəti instansiya məhkəməsinə şikayət edib və ona irəli sürülən ittihamlar sübuta yetirilməyib. Məhkəmə qeyd olunan maddələrlədə ona bəraət hökmü çıxarıb. O, məhkəmə zalından azadlığa buraxılıb.
2013-cü ildə isə Ə.Şükürov dələduzluğa görə yenidən həbs edilib. Bakı Ağır Cinayətlər Məhkəməsinin hökmü ilə 7 il müddətinə azadlıqdan məhrum edilib. Onun əməlləri bununla da yekunlaşmayıb. Belə ki, Ə.Şükürov barəsində başqa epizod üzrə yenidən şikayət olunub. Şikayətə əsasən o, şəhər sakinindən prokurorluq orqanlarına qəbulla bağlı külli miqdarda pul alıb.