Dənizin dibindən 4 ton nasist qızılı tapıldı

"Ölkə.Az" xəbər verir ki, 1500 metr dərinlikdə olan qızılların dəyəri 250 milyon manatdır.

İkinci dünya müharibəsinin ilk günlərində 115 metrlik "SS Minden" adlı gəmi 1939-cu ilin 6 sentyabr tarixində Braziliyanın Rio de Janeyro şəhərindən yola çıxır. Gəmi nasistlərin nəzarətində olan Almaniyaya getməli idi. 24 sentyabr tarixində gəmi İslandiya sahillərində batır. Gəminin yükü hər zaman marağa səbəb idi. Bir iddiaya əsasən gəmi Almaniyanın Cənubi Amerikada saxladığı 4 ton qızıl ilə yüklənmişdi.

Uzun illərdir ki, dəfinə ovçuları üçün böyük bir hədəf olan gəminin izini 78 il sonra bir ingilis komandası tapdı. Bir neçə aydır okeanın dibində axtarış aparan komand 1500 metr dərinlikdə gəminin qalıntılarına rast gəlib. İngilislər İslandiyadan gəmi qalıntılarını çıxarmaq üçün rəsmi icazə istədilər. Amma İslandiya hökuməti bu tələbə cavab verməyib. Qızılların çıxarılacağı təqdirdə kimə aid olacağı da müzakirə mövzusudur.

"SS Minden" adlı gəminin heyətinə Adolf Hitler tərəfindən "ingilislər sizi görsə, gəmini batırın" əmri verildiyi iddia edilir. Gəminin heyəti isə ətrafdakı ingilis gəmiləri tərəfindən xilas edilib. Bəzi iddialara görə isə ekipaj qızılın  bir hissəsini oğurlayıb və sonra gəmini batırıb. Bəzi tarixçilər isə bildirir ki, gəmi heç bir şey daşımayıb. Sadəcə zir-zibil yüklü olub.

Hikmət Həsənov
Ölkə.Az