Deputat: “Həkimlərimiz koronavirusa qarşı mübarizədə əsl fədəkarlıq nümayiş etdirirlər”.

Bunu “Ölkə.Az”a açıqlamasında millət vəkili Kamran Bayramov deyib.

Onun sözlərinə görə, bu gün koronavirus pandemiyası müasir səhiyyə sistemi üçün son dərəcə çətin sınaqdır və bu infeksiyaya qarşı mübarizəni müharibə ilə müqayisə edirlər:

“Bütün dünya hazırda sözün əsl mənasında, gözəgörünməz düşmənlə müharibədədir və buna qarşı mübarizə aparır. Bu amansız infeksiyaya qarşı Azərbaycanda da fövqəladə tədbirlər görülməkdədir. Bu məqsədlə ölkə başçısı tərəfindən ciddi qərarlar qəbul edilib və həmin qərarlar Nazirlər Kabineti yanında yaradılan Operativ Mərkəz təərfindən həyata keçirilməkdədir.

Artıq ölkə ərazisində ciddi karantin rejimi tətəbiq olunub. Pandemiyaya qarşı mübarizəyə müxtəlif  peşə sahibləri cəlb olunub. Amma pandemiyaya qarşı mübarizədə ən ağır, məsuliyyətli vəzifə tibb işçilərimizin, həkimlərimizin, tibb bacılarımızın, texniki heyət və laborantlarımızın üzərinə düşür. Onlar epidemiya ilə mübarizədə ön cəbhədədirlər. Birinci vitse-prezident Mehriban xanım Əliyevanın da dediyi kimi, həkimlərimizin qəbul etdikləri qərarlar, peşəkar bilik və bacarıqları, fədakarlıq və şəfqəti bizim əsas silahımız və ümidimizdir.

Birinci vitse-prezidentin  bəyan etdiyi kimi, bu gün bizim tibb işçilərimizdən həm də böyük şəxsi cəsarət tələb olunur. Onlar bu çətin sınaqdan şərəflə çıxırlar. Birmənalı olaraq demək olar ki, bu gün tibb işçilərimiz koronavirus pandemiyasına qarşı mübarizədə əsl fədakarlıq nümayiş etdirməkdədirlər. Çünki onlar işlərinə çox məsuliyyətlə yanaşaraq, pandemiya ilə mübarizədə öz töhfələrini verməkdədirlər.  Tibb işçilərimiz öz həyatlarını təhlükə altına ataraq təhlükəli virusa yoluxan insanların həyatını xilas edirlər. Bu işdə onlara uğurlar arzulayırıq”.

Mürtəza

Ölkə.Az